Ka mut aiu 'Ialap haba dei por bad ha bymdei por de'

Ka mut aiu ialap haba dei por bad ha bym dei por de ?

2 TIMOTHI 4:1‭-‬8

¹Nga hukum ha khmat U Blei, bad U Jisu Khrist uba U Trai, u ban sa bishar ïa kiba im bad ïa ki baïap, bad da kata ka jingmihpaw jong u bad ka hima jong u, ²to men ïalap ïa kata ka ktien; to ïaiminot haba dei por, ha bymdei por de; to pynkynduh, to sneng, to kyntu da ka jingshahslem baroh bad ka jinghikai. ³Namar ka por kan jia, haba kin ym shahshkor ïa ka jinghikai bajanai; hynrei, haba ki don ki shkor ba-dait, kin ïakynton ha lade ïa ki nonghikai katba kum ki jingkwah brai jong ki hi; ⁴bad kin pynphai noh ïa la ki shkor jong ki na ka jingshisha, bad kin phai khmat sha ki puriskam. 

Kaba nyngkong ngi iohi U apostol Paul u la hukum ia U Timothy ba un ialap ia ka ktien U Blei. Um shym la kyntu, hynrei u hukum. 

Ngi hap ban kynmaw ba ka jingialap ia ka Ktien U Blei ka dei ka hukum, la hukum da U Trai Jisu (Mark 16:15; Mat 28:19-20). 

Kaba ar la kyntu ia U Timothy ba u dei ban minot ia ka ban ialap ia ka ktien U Blei la haba dei por ne ha bym dei por de.

Mynta ngin ia peit ka mut aiu 'Ialap haba dei por bad ha bymdei por de? '

Ngi la ju iohsngew ia ki jingbatai na kiba bun, don kiba ong ba 'ialap haba dei por' ka mut ialap ha ki ïingmane, ialap ha ki sngi U Trai, ialap ha ki jaka ba la pynkhreh kyrpang, bad 'ialap ha bymdei por de' pat ka mut ban ialap wat sha jaka iew jaka hat, ialap ha ki sngi pohia, ialap wat haba ym shym la pynkhreh bha ia ka jaka ialap. Hooid kata ruh ka dei, hynrei kaei kaba U Trai u ai jingshai ia nga ka long 'ialap haba dei por bad ha bymdei por de' ka mut ban ialap la ka long ha ka por basuk, bad ialap ruh wat ha ka por ba eh. 

Ha kawei pat ka kyntien nga lah ban ong, Ialap ha bymdei por ka mut 'ialap wat ha ka them ka syrngiew ka jingiap '.

Ngin ia peit mynta katto katne ki jingpynshisha na ka Ktien U Blei kumno ba ki Apostol U Khrist ki ialap ia ka gospel haba dei por bad ha bymdei por de.

1. Kaba nyngkong ngin ia peit shaphang u apostol Paul: Naduh ka sngi ba u la ioh ia ka jingpynkylla ha kata ka lynti sha Damaskos, u la ialap ia ka ktien U Trai. Wat haba la kem bad la lynthem maw ia u ruh, um sangeh hynrei u iai ialap ia ka ktien U Trai. (Kam 14:8-23) Lada phin pule hangne phin shem kumno ba la lynthem maw ia U Paul ha Lystra, hadien ba la shah lynthem maw, u la kyllon ha madan, hynrei u ieng biang joit ban ialap ia U Trai Jisu. (Dk.19-21). Ha kane ka jingialap shibun ki briew ki la ngeit ia U Trai. 

Mut dur, ka dei ka por ia u ban phet iap ia la ka jong ka jingim, hynrei u ialap ia ka ktien U Trai. Lada phin pule ter ter haduh ka lynnong ba 28 phin shem na ka por sha ka por la rah ia u ha khmat ki nongsynshar, ban shah bishar, hynrei ngi iohi na ka por sha ka por u ialap beit ia U Jisu.

Bunsien ha ka jinglong briew hi, lada kiei kiei ha ka jingim kim iaid beit, kim long kumba dei ban long, ka long kaba eh ban ialap ia ka ktien U Trai. Ngi kham sngewtynnad ban ialap, ban phla ia U Trai bad ia ki jingleh jong U haba kiei kiei baroh ki iaid beit bad sngewtynnad. Kata ka dei ka jinglong briew. Hynrei u apsotol Paul u ong ba ngi dei ban ialap wat haba ngi sngew ba kam dei ka por ia ngi ban ialap, ka dei ka por ban kyrda iap shuwa ia lade, ban pynbit pynbiang shuwa ia lade.

2. Kaba ar ngin ia peit shaphang U Petros: Ngi pule ha ki Kam 4:1-22, ngi iohi kumno ba la kem ia U Petros bad U Ioannis bad la rah ia ki ha khmat ka dorbar ban bishar ia ki. Kaba sngewtynnad ka long ba U Petros ha ka jaka ban iada ia lade, hynrei u la ialap pynban ia U Trai. Mut dur kane ka por ka dei ka por ia U Petros ban iasaid-da ia lade, hynrei U Petros u ialap pynban ia ka ktien U Trai. 

Haba la kylli ia ki da ka bor aiu ba la pynkhiah ia uta u briew ba dkoh, kim shym la khynniuh, kim shym la ong tip kein da ka bor aiu, hynrei da ka jingshlur ki phla ba dei da ka kyrteng U Jisu ia uba la sahnarphna ma phi, bad ki la sdang ban ialap shuh shuh.

3. Ngi ia peit shaphang U Stephan: Ha ka lynnong ba 6:8 Ki Kam ki Apostol ngi shem shaphang ka jingshah kem U Stephan uba long uwei na ki Deacon ka Balang ba nyngkong. Bad ha ka lynnong ba 7, ngi iohi shaphang kumno U Stephan u la iasaid-da ia lade, bad kane ka rukom iasaid-da U Stephan ka long pat ha ka rukom ka jingialap ia U Trai Jisu. Um shym la iasaid-da ban lait la ka jong ka jingim, hynrei u iasaid-da na ka bynta ka kyrteng jong U Trai. Um shym la sheptieng u la kren beit ia ka ktien ka jingshisha, haduh ba un da shah lynthem maw bad iap noh. 

Kine ki long ki nuksa ba ngi iohi ia ka jingmut ba shisha, 'Ialap haba dei por bad ha bymdei por de'.

Jingpynkut: To ngin duwai ba U Trai un ai ha ngi ka mynsiem bad ka jingshlur ban ialap shisha ia ka ktien U Trai la haba dei por ne ha bymdei por de. 

To U Blei un kyrkhu. Amen

Copyright © Jester Mawlong | July 25, 2022

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.