Bat skhem ia ka jingithuhpaw

Bat skhem ia ka jingithuhpaw

Intro: Ka jingiathuhpaw ka dei kata ka jingiohi lypa ia kaei ka ban sa long. Ka lah ban wan lyngba ka jingphohsniew, ka lah ban wan da kaba U Blei u pyni ha ka jinglong mynsiem bad ha kiwei ki rukom ruh. Kumta haba ngi don ka jingiohipaw ngi donkam ban bat skhem ia ka.

Ngin ia peit na ka jingim jong u Joseph uba long u briew uba la ioh ia ka jingiohipaw ia kaei ka ban sa long ha ka jingim jong u. Ngin ia peit ia kane na ka kitab JENESIS 37:2‭, ‬5‭-‬11 

²"...U Joseph, haba u la khathynñiew snem ka rta, u la ju ap ïa ki kynhun lem bad ki hynmen jong u;.... ⁵bad u Joseph u la wan ïalap ïa ka ktien bymbha shaphang jong ki ha u kpa jong u. Bad u Joseph u la phohsniew ïa ka jingphohsniew, bad u la ïathuh ïa ka ha la ki hynmen: te ki la nang kham isih ïa u. ⁶Bad u la ong ha ki, “To sngew mynta, nga kyrpad ïa phi, ïa kane ka jingphohsniew ïa kaba nga la phohsniew; ⁷namar, ha khmih, ngi dang ïateh song ïa ki thup kba ha ka lyngkha, bad ha khmih, ka song jong nga ka la khie joit bad ka la ïeng beit ruh; bad ha khmih, ki song jong phi ki da ïeng lyngwiar bad ki da ïanguh ruh ïa ka song jong nga.” ⁸Ynda kumta, ki hynmen jong u ki la ïa-ong ha u, “Shisha men synshar halor jong ngi? ne me shisha men ïoh long trai halor jong ngi?” Bad ki la nang kham isih shuh ïa u namar kita ki jingphohsniew jong u, bad namar ki ktien jong u. ⁹Bad u la phohsniew pat sa kawei ka jingphohsniew, bad u la ïathuh ïa ka ha la ki hynmen, u la ong ruh, “Ha khmih, nga la phohsniew sa kawei pat ka jingphohsniew; bad ha khmih, ka sngi bad u bnai bad khatwei ki khlur ki la ïanguh ïa nga.” ¹⁰Bad u la ïathuh ïa ka ha la u kpa, bad ha la ki hynmen: bad u kpa jong u, u la sneng pyrshah ïa u, bad u la ong ha u, “Hato kaei kane ka jingphohsniew ïa kaba me la phohsniew? Ma nga bad ka kmie jong me, bad ki hynmen jong me, shisha ngin ïawan ban ïanguh ngon ma ngi ha khmat jong me haduh khyndew?” ¹¹Te ki hynmen jong u ki la ïabishni ïa u; hynrei, u kpa jong u, u la kynshew ïa kata ka jingong ha la ka dohnud.

Kane ka dei ka jingphohsniew jong u Joseph kaba long kum ka jingiohipaw ia kaei kaba un sa long. Bad haba u la iathuh ia kane ha la ki hynmen jong u, pynban ki la bishni, bad ki la isih eh ia u ong ka Ktien jong U Blei. 

Lada ngi pule ter ter shaduh ka dkhot ba 18-24 ngi iohi kumno ba ki hynmen jong u ki la mut ban pyniap noh ia u, da ka jingmut ba kata ka jingphohsniew jong u kan kut noh, kumta ki la bret ia u ha ka thliew um, hynrei U Blei u la leh kambah ha kaba ka um kam shym la don ha kata ka thliew um. Bad kaei ba ngi iohi u Joseph u la bat skhem ia kata ka jingiohipaw wat hapoh jong kata ka thliew. 

Hadien ba ki la iohi ba um shym la iap ha kata ka thliew um, ki la sei noh ia u bad ki la die mraw ia u ha u kynja Ishmael tang 20 ki sbai rupa - (v.25-28). 

Ha kito ki por ia ki mraw la die kumba die blang die masi. Uto uba thied ynda u pyntrei katto katne por lada um sngewiahap u die noh sha uwei pat bad kumta ter ter. Ia u Joseph ruh la die mraw na uwei u kynrad sha uwei pat. 

Ha kata ka jingshah die mraw ngi shem ba u la poi ha ka ïing jong u Potiphar uba la thied mraw ia u (GENESIS 39:1-19).  Bad ngi iohi kumno ba U Trai u la don ryngkat bad u Joseph, haduh ba une u kynrad jong u, u la ieit bad shaniah lut ha u Joseph ia ka ïing ka sem jong u baroh. Hynrei hapdeng jong kata ka jingshem sngewbha bad ka jingsuk kaba la sdang wan ha ka jingim jong u, kynsan kynsan u la iakynduh jingeh kaba kham shyrkhei shuh shuh, kaba lada bakla kan ktah ia ka bneng bad ka dujok. Bad kata ka long ba ka tnga jong u Potiphar (u kynrad jong u) ka la iapmat ia u Joseph bad ka la pynshoi ba un thiah bad ka, hynrei u Joseph u la kyntait bad um treh ban ia thiah bad ka. Ka la pynbor bad iai pynbor, u iai kyntait ia ka, bad haba ka iohi ba um treh, ka la sdang ban pharep sniew noh ia u, da kaba ka la iathuh ha la u tnga (Potiphar) ba u Joseph u mut ban lehbor ia ka, bad une u Potiphar khlem da kylli pyrthew bha u la shu kem ia u Joseph bad bret ia u sha byndi. (v.19-23)

Hynrei ka Bible ka iathuh ba U Blei u la donryngkat bad u Joseph wat ha kata ka byndi ruh, ha kaba u la pynshem sngewbha ia u ha khmat u nongap byndi haduh ba uta u nongap byndi u la shem sngewbha bad u la shaniah ha u Joseph ia kiei kiei baroh, bad wat ki para ba sah byndi lang bad u ruh ki shem sngewbha ia u.

Ngi la iohi ia ka story jong U Joseph, kumno wat hapdeng shibun kita ki jingiashem jingiakynduh jong u pynban u la iai bat skhem ia kata ka jingithuhpaw ba u la iohi, bad ha kaba kut ngi shem kumno U Blei u la kyrkhu shisha ia u bad kata ka jingithuhpaw ka la urlong shisha ha ka jingim jong u.

#-1. GENESIS 40:1-23; 41:1-36 - La ai ha u ia ka jingstad bad jingshemphang ban sngewthuh ia ki jingmaian, kat ban batai ia ki jingphohsniew kiba eh. 

#-2. GENESIS 41:37-57 - Na byndi la kyntiew sha ka khet nongsynshar. 

#-3. GENESIS 42:1 ter ter - Ki hynmen ki la wan shisha ban dem ha khmat jong u bad ban wad jingiarap na u ha ka por jong ka nemsniew. 

#-4. GENESIS  41:53-57 - U la long ka jingkyrkhu ia ka ïing ka sem, ia ka jaid ka kynja, bad ia ki ri bapher bapher.

Jinghikai: Bun ki briew kiba don ia ka jingithuhpaw (vision) kaba U Blei u ai ha ki, hynrei kim lah ban poi sha ka thong, ka daw ka long ba kim lah shah haba ki ia kynduh ia ki jingeh (challenges) ha ka jingim. Ki nang pyrkhat ba namar ba ki lah ioh ia ka vission na U Blei kan shu iaid smooth (jlih) beit, yn nym ia kynduh jingeh shuh, hynrei em ngi lah ban ia kynduh. Lada ngim nang ban bat skhem kan pynlong ba ngin nym poi satia sha ka thong, hynrei lada ngi nang ban bat skhem, khlem artatien ngin poi sha ka thong.

Jingkyntu: Paralok baieit, lehse phi don ka jingithuhpaw (vision) ha ka jingim, hynrei haba phi peit sawdong phi shem ba kam i poi shaei shaei, phi pyrshang ban iathuh ha ki briew hynrei ki leh bym patiaw ia phi, lehse ki rkhie beiñ ia phi, bad phi sngew kum ban sangeh noh (give up). Hynrei ha kane ka por nga kwah ban pynshlur ia phi, bat skhem ia kata ka jingithuhpaw bad iaineh ban shakri ia U Trai, long kiba beit ka jingim bad U Trai, phin shem ha kaba kut U Trai un pyndonburom ia phi kumba u la pyndonburom ia U Joseph. Wat nym ong satia, imat ngan nym poi shano shano, katto ka lah kut ia nga. Nga kwah ban ong ia phi, wat pat duh jingkyrmen, dang don kaba bha kaba ap ia phi. Nga la pyni ia phi kumno lada ngi iaineh ha U Trai bad ngi bat skhem ia kata ka jingithuhpaw (vision), U Blei un pyndonburom ia phi.

U Blei un kyrkhu, Amen.

Copyright © Jester Mawlong | July 25, 2022

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.