U Blei haba u khot iano iano um kwah satia ba uta u briew un sah hajuh, hynrei ba un iaid shaphrang haduh ba un da poi shaduh ka jingjanai bad ba ngin ioh ia kata ka jaka kaba u la kular ia ngi.
Ngi iohi haba U khot ia ki khun Israel na ri Ijypt um khot tangba kin shu mih sharud khyndiat na Ijypt bad ba kin ia shong sah noh hangta, hynrei u khot ia ki ba kin iaid shaphrang, ban iaid, iaid, iaid, haduh ban da poi sha ka ri jingkular (Ri Kanaan).
Eksodos 14:1 - 15
Kumjuh na ka bynta jong ngi, U Blei um kwah tangba ngin shu mih sharud khyndiat na ka pyrthei, na ka hima jong ka jingdum, hynrei u kwah ba ngin nang iaid shaphrang. Hallelujah!
* Heb 6:1, Ia ngin ia nang iaid shaduh ka jingpynjanai.
* Pro 4:18, Ka lynti jong ngi ka dei ban nang iai phyrnai haduh kaba janai ka sngi.
* Phil 3:12-16, U apostol Paul ruh u ngeit ha ka jingiaid shaphrang. U ong beh sha pyrshah ka dak.
Ki jingai jingmut ba ngi lah ban iaid shaphrang:-
1. Nud ban im ka jingim kaba iapher
Rom 12:2, To wat pynsyriem ia lade bad kane ka pyrthei.
Ngi hap ban pyniapher ia lade na kane ka pyrthei. Lada ngi dang pyniasyriem bad ka pyrthei ngin nym lah ban iaid shaphrang, kan long kum u tyllai ba skhem ba teh ba bat ia ngi ba ngim lah ban iaid shaphrang. Ngi hap ban pyndkut lut, ngi hap ban tip ruh kiei ngi long.
*** Ngi long ka jingshai ka pyrthei - Mat 5:13-16
*** Ngi long ka jaid bynriew ba la jied - 1 Pet 2:9
2. Ithuh ia ki nongshun bad jop ia ki
Ha ka jingiaid shaphrang, kin don ki nongshun ki ban pynwit, ban khanglad ia ngi, ngi hap ban ithuh bad ban jop ia ki.
1) Nongshun jong ka jingbymtip: Don ki briew ki bymtip ba ki dei ban iaid shaphrang, ki pyrkhat ba tangba lah kylla bamut, pynbaptis ka lah biang, shu shong aram noh. Hynrei U Trai u khot ia ngi ban iaid shaphrang.
2) Nongshun jong ka jingbymngeit: Ka jingbymngeit ka dei kawei kaba bat ia ngi ba ngim lah ban iaid shaphrang. Kumta ngi hap ban sumar ba ka jingbymngeit kan ym ioh jaka ha ngi. Heb 3:12
3) Ka pop: Haba ka pop ka ioh jaka ha ka dohnud u briew, u briew um kwah shuh ban iaid shaphrang. Dei namar kata ka daw u apostol Paul u ong, Wat ai jaka ia u Soitan ne ka pop - Eph 4:27
Lada kumno re kumno ngi leh pop, kloi lan kylla bamut. 1 Ioan 1:7-9
4) Ki jingeh: Ngi hap ban sngewthuh ba wat la ngi lah ngeit ia U Jisu ngin dang ia kynduh jingeh. Shibun ki bynta na ka ktien U Blei kiba iathuh ia ngi ba ngi hap ban iaid lyngba ki jingeh jingtynjuh. Hynrei la kumno kumno ngi hap ban jop ia ki bad ban iaid shaphrang. Hallelujah!
Ngi iohi ki khun Israel ruh haba ki la iaid lynti lyngba kata ka ri khlaw ki la ia kynduh shibun ki jingeh, shibun ki nongshun. Kita kiba shlur ki jop bad ki iaid shaphrang.
5) Nongshun jong ka jingsngewbiang: Ka jingsngewbiang ka dei kawei ka nongshun kaba ngi hap ban jop. Bunsien ki briew haba ki la sngewbiang ia kaei ba ki im, kim kwah shuh ban iaid shaphrang. Ia kane ngi iohi ia ka Balang ha Laodikaia. Kane ka Balang ka don kata ka jingsngewbiang ha ka, haduh ba ka la pynlong ia U Blei ban da maham tyngeh ia ka. Jpw 3:14-22
Para bangeit baieit, to ngin kiar ka mynsiem kaba sngewbiang, hynrei to ngin thrang ia ka ban iaid shaphrang.
3. Ki jingma ban kiar
Ha ka jingiaid shaphrang, ngi hap ban sngewthuh ruh ba ki don ki jingma ba ngi hap ban kiar. Lada ngim phikir ngi lah ban liat bad ban hap ha ki, ngin nym lah ban iaid shaphrang.
Kawei na ki jingma ba ngi dei ban kiar ka dei na ki jinghikai ba bakla. 1 Tim 4:1; 2 Pet 2:1
U apsotol Paul u ong ia u Timothy ba u dei ban phet iap na kita ki jinghikai ba khyllah. 1 Tim 6:11
4. Ki kabu ban shim
Haba ngi ioh kano kano ka lad ban leh eiei ha ka kam U Blei, ngi dei ban shim ba kata ka dei ka kaba ia ngi. Ngi hap ban shim da ka jinglong lakloi, namar kata ka dei kawei na ka lynti ba ngi lah ban san bad ban iaid shaphrang. Bunsien, ka jingpyllait met palat ka ialam sha ka ban sah hajuh. Kumta kum ki bangeit, to ngin shim kabu ban leh eiei na ka bynta U Trai, la ka long kano kano.
5. Shah shkor biang biang ia ka ktien U Trai
Ba ngi lah ban iaid shaphrang, ngi hap ruh ban shah shkor biang biang ia ka ktien U Trai. U Blei u ong ia u Joshua ba u dei ban shah shkor biang biang ia ka ktien U Trai. Joshua 1:9 Cf. Salm 119:105; 133
6. Peit barobor sha U Trai
Bunsien ki briew namar ba ki peit sha ki briew, ki peit sha ki sawdong jong ki, kumta kim lah shuh ban iaid shaphrang. Ki iohi une u long kumta, kane ka long kumta. Hynrei ba ngi lah ban iaid shaphrang ngi donkam ban peit barobor sha U Trai. Na U ka wan ka jingpynthymai bor. Isaiah 40:31
Jingkyntu: To ngin iaid shaphrang da kaba ngin:
1) Ngin nud ban im ka jingim ba iapher
2) Ithuh ia ki nongshun & jop ia ki
3) Kiar na ki jingma ba ngi ia kynduh
4) Shim ia ki kabu ba ngi ioh
5) Shah shkor biang biang ia ka ktien U Trai
6) Peit barobor sha U Trai
To ngin iaid shaphrang haduh ba ngin da iashem ia U Trai bad haduh ba ngin da poi sha kata ka ri kaba U Trai u la kular ia ngi kaba long ka bneng bymjukut. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | 12.09.2022
First written on 21.2.2019 @ 7:30 PM
Comments
Post a Comment