Ban long ki khun U Blei ka dei ban don ka dak ka ban pynshisha ba ngi long ki khun jong U Blei. Ngim lah ban ong ba ngi long ki khun jong U Blei lada kam don satia ka dak ba ngi long kumta.
Ngin ia peit mynta kiei ki dak ba pynshisha ba ngi long ki khun jong U Blei?
1. Ka jingngeit bad pdiang ia U Jisu
Ban long ki khun jong U Blei kaba nyngkong ngi donkam ban ngeit bad pdiang ia U Jisu ha ka dohnud jong ngi. U Ioannis u ong ba kat kita kiba la pdiang ia U (Jisu) la ai bor ban long ki khun U Blei.
ÏOANNIS 1:12
Hynrei, kat kiba la pdiang ïa u, ha kito, u la ai bor ban long ki khun U Blei, kata, ha kita kiba ngeit ha ka kyrteng jong u:
Ngim lah satia ban long ki khun U Blei da kaba shu kha pateng ha ka longïing Khristan, hynrei donkam ba u briew shimet shimet un da ia shem ia U Trai Jisu bad ngeit ia U ha ka dohnud. U Jisu u ong, kaba la kha na ka doh ka long doh, donkam ban pdiang ia U Jisu da lade shimet shimet. IOANNIS 3:5-7
Kumta lada phi kwah ban long ki khun jong U Blei phi donkam ban ngeit bad pdiang ia U Jisu ha ka dohnud jong phi.
2. Kaba iaid ha ka jingialam U Mynsiem
Kaba ar ka dak ba ngi long ki khun U Blei ka long ba ngi iaid ha ka jingialam U Mynsiem Bakhuid.
ROM 8:14
Namar, kat kiba la ïalam da U Mynsiem U Blei, kita keiñ ki long ki khun U Blei.
Ngim lah ban ong ba ngi dei ki khun U Blei katba ngi iaid pat ha la ka jong ka mon jong ngi, ngi leh ia kaei ba ka doh jong ngi ka kwah ym ia kaba U Mynsiem jong U Blei u kwah.
Ka jingkhot ka long, to ngin iaid ha ka jingialam U Mynsiem bad ngin leh ia kiei kiei kiba U Mynsiem jong U Blei u sngewbha, khnang ba ngin ioh long ki khun jong U Blei.
Haba U Mynsiem u ialam, un nym ialam sha kiei kiei kiba sniew, hynrei un ialam sha kiei kiei kiba bha.
ÏOANNIS 16:13
Hynrei, ynda u la wan ma u, U Mynsiem ka jingshisha keiñ, un ïalam ïa phi sha ka jingshisha baroh: namar un ym kren na lade, hynrei, ïa kiei kiei ruh katba un ïohsngew, un kren, bad un pynpaw ha phi ïa kiei kiei ruh ki ban sa wan.
U Apostol Paul u ong, Lada ngi im da U Mynsiem, to ai ba ngin ïaid ruh da U Mynsiem. GALATIA 5:25
Kaba sngewtynnad ka long, haba U Mynsiem Bakhuid u ialam, un ialam barobor sha ka jingjop. Hallelujah!
E g: Ka jingpynshoi ia U Jisu. MATHAIOS 4:
3. Kaba pyniasuk
U Jisu ha ka jingiathuhkhana halor u lum u kren ia kine ki kyntien ban ong, “Suk ki bapynïasuk: naba yn khot ïa ki, ‘ki khun U Blei.’ MATHAÏOS 5:9
Kaba lai ka dak ba ngi long ki khun U Blei ka dei ba ngi long ki nongpyniasuk. U Jisu ia lade la wan sha kane ka pyrthei ban long u nongpyniasuk ia ngi bad U Blei. Ka Bible ka iathuh ia ngi ba ma ngi shisien ngi la long ki nongshun jong U Blei, hynrei da ka jingwan U Jisu bad ka jingiap jong U halor ka diengphna, la pyniasuk noh ia ngi bad U Blei, kata, da kaba ngi ngeit ha U.
ROM 5:10
Namar lada, mynba ngi la long ki nongshun, la pynïasuk noh ïa ngi bad U Blei da ka jingïap U Khun jong u, te kham tam shibun, haba la pynïasuk ïa ngi, yn pynim ïa ngi da ka jingim jong u.
Hadien ba U la dep ban pyniasuk ia ngi bad U Blei, u la aiti ruh ha ngi ia kane ka kam jong ka jingpyniasuk.
2 KORINTH 5:18
Te kiei kiei baroh ki long na U Blei, uba la pynïasuk noh ïa ngi ha lade hi da U Jisu Khrist, bad uba la aiti ha ngi ïa ka jingpyntrei ïa ka jingpynïasuk.
Kumta haba ngi ruh ngi leh ia ka kam jong ka jingpyniasuk, ngin long ki khun jong U Blei.
Kynmaw: Ka kam jong ka jingpyniasuk ka dei ka kam jong ki khun jong U Blei. Ka kam jong ka jingpyn-iakajai, pyniashrut, ka dei ka kam ki khun u Soitan.
Tynjuh: Ngi dei ki nongpyniasuk ne ki nongpyn-iashrut?
Jingkyntu: Kum ki khun jong U Blei, ai ngin long ki nongpyniasuk, ban pyniasuk ia ki briew bad U Blei da kaba ngi ialap ia ki ia U Jisu, bad ngin long ruh ki nongpyniasuk ia u briew para briew, ym ban pynia-shrut, pynia-kajia majia, khnang ba ngin ioh long ki khun jong U Blei.
To U Blei un kyrkhu, Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | Sept 1, 2022
Comments
Post a Comment