Introduction: U Jisu u lah dep iathuhlypa ba un sa leit noh bad un sa wan pat ban shimti ia ngi sha lade hi. (IOANNIS 14:1-4). Kumta um kwah ba iwei pa iwei na ngi ngin duh ia ka ban iashem bad U ha kata ka sngi ba un wan ban shaw ia la ki jong, dei namar kata ka daw u la ai lypa ki jinghikai ha ki rukom bapher bapher ban pyni kumno ki briew ki duh ia ka ban iashem bad U lane ki duh ia ka jingrongnoh khnang ba ngin nang ban pynkhreh ia lade ba ngin nym duh ia ka jingrongnoh bad ba ngi long kiba bitnam ban ia shem bad U.
Ngin ia peit na ki katto katne ki bynta na ka ktien U Blei kiba pyni kumno U Jisu u ai nuksa ba ki briew ki duh ia ka ban iashem bad U.
1. Ka jingbymdon ia U Mynsiem Bakhuid
Ngi pule ha ka gospel U MATHAIOS 25:1-13, ngi iohi shaphang ki shiphew ngut ki theisotti, san ngut kiba stad bad san ngut kiba bieit. Kiba stad ki don ia ka sharak, ki don ruh ia ka umphniang, kiba bieit pat ki don ia ki sharak, hynrei kim shym don ia ka umphniang.
Haba ngi peit ia kine ki shiphew ngut ki theisotti ngi shem ba ki ia syriem ha kiei kiei baroh, ki don ka jinglong khuid, jinglong sotti, ki ioh thiah kumjuh, hynrei kaei kaba kine ki san ngut kiba bieit ki dang duna ka dei ba kim shym la don ia ka umphniang ong ka Ktien U Blei.
Ka umphniang hangne ka kren ia U Mynsiem Bakhuid.
Kawei kaba ki dang duna ha kine ki san ngut ki theisotti ka dei U Mynsiem Bakhuid. Ka jingbym don jong ki ia U Mynsiem Bakhuid ka la pynlong ba kin duh noh ban iashem bad la u nongleit kurim. Kane ka long ka jinghikai ia ngi ba ngin long kiba stad ban pyndap ia lade da U Mynsiem Bakhuid khnang ba ngin nym shah iehnoh haba U Trai un wan.
U apostol Paul u ong ha ki nong EPHESOS 5:18, "To long kiba la dap da U Mynsiem…." Ngi donkam ban thrang barobor ia ka jingpyndap U Mynsiem Bakhuid. Ym ba ngin shu sngewhun noh tang ha kata ka jingmad ba nyngkong lane tang shisien, hynrei ban iai pyndap ia ka jingim jong ngi kaba long kum kita ki sharak jong ki theisotti.
U apostol Paul u thoh ha ka shithi sha ki Nong Rom, ba kita ki bym don ia U Mynsiem kim long ki jong U.
ROM 8:9
Hynrei, ma phi phim long ha ka doh, hynrei, ha U Mynsiem, lada U Mynsiem U Blei u shong sah hapoh jong phi. Hynrei, lada uno uno ruh um don U Mynsiem U Khrist, uta keiñ, um long u jong U.
Kumta ba ngin long ki jong U, ngi donkam ban long kiba la dap da U Mynsiem, bad haba u wan un sa rongnoh ia ngi sha kata ka jaka ba U la pynkhreh kyrpang. Hallelujah!
2. Ka jingbymleh ia kaei ba U Kynrad u ong ban leh
Sa kawei pat kaba U Jisu u pyni kumno ki briew ki duh ia ka jingrongnoh ka dei ba kim shym leh ia kaei ba la ong ia ki ban leh lane kim shym la pyndep ia kaei ba la ong ia ki ban pyndep. U Jisu u ai ia ka pharshi shaphang u shakri bymman, kumno haba u kynrad jong u u la bthah ia u kaei ba un leh bad ba u dei ban pyndep ia kata ha ka por ba dei biang, hynrei ka Ktien jong U Blei ka iathuh ia ngi ba uta u shakri bymman um shym la leh satia ia kaei ba u kynrad u kwah ia u ban leh. Ha ka jaka ban pyndep ia ka kam ba la aiti ha u, u shoh pynban ia ki para shakri bad u da iabam iadih ruh lem bad ki ba buaid. Kumta haba u kynrad u wan ha ka por ba um mut, la shem ia u uba rem, bad la shop noh ia u.
MATHAÏOS 24:45-51
“Naba kumta, uno uba long u shakri bangeit bad bastad, ïa uba u kynrad jong u, u la buh halor ki ba-ha-ïing jong u ïa ka ban ai ha ki, ïa ka jingbam ha ka por kaba biang? Suk uta u shakri, ïa uba u kynrad jong u haba u wan un shem ba u leh kumta. Shisha nga ong ha phi, ba un buh ïa u halor kiei kiei baroh kiba u don. Hynrei, lada uta u shakri bymman te un ong ha la ka dohnud, ‘U kynrad jong nga u tud ban wan;’ bad u sdang ban shoh ïa ki para shakri jong u, bad ban ïabam ïadih ruh lem bad ki babuaid; u kynrad uta u shakri un wan ha ka sngi ha kaba um mut, bad ha ka por ha kaba um tip; te un shop noh da sympat ïa u, bad un buh ïa ka bynta jong u lem bad kiba arsap; hangta yn long kaba lynñiar bad kum dait bniat.
Note: Ka jingpyrkhat ba U Jisu u dang pyntud ban wan ka pynlong ia u briew ban bam bam dih bad ban leh biang ia kiei kiei kiba kynja pyrthei. Kata ka dei ka buit u soitan kaba ngi hap ban dumok.
Une u shakri bymman ha ka jaka ban leh ia kaei ba U Kynrad jong u u ong, u pynsngewbha pynban ia lade da kaba ia bam ia dih bad ialeh sngewbha.
Kane ka long ka jingmaham ruh ia ngi ba ngi dei ban leh ia kaei ba U Trai u ong ia ngi ban leh bad ban pyndep ia ka ha ka por ba dei biang. Ym ban iashoh iadat para shakri, ym ban pynsngewbha tang ia lade da kaba iabam iadih, ialeh sngewbha bad kiei kiei ki jong ka doh bad ka pyrthei.
Note: Ha uwei pa uwei u bangeit, U Blei u ai la ka jong ka jong ka kam. Ka jingkylli ka long hato ngi la pyndep ia ka, hato ngi dang neh ha kata ka kam ba ka aiti ha ngi???
Kaba sngewsih ha kine ki sngi ka long, ha ka jaka ba ngin pyndep ia kaei ba U Kynrad u ong ia ngi ban pyndep, ngi iashoh pynban para shakri, para bangeit. Ngi iashoh da ka ktien ka thylliej, ngi ia shoh da ka nia ka jutang, ngi ia pharshi kylliang, ngi ia pharep bad kynnoh iwei ia iwei pat. Kane ka long ka jingma ka bakhraw, lada ngim kylla bamut kloi ngi lah ban duh ia ka jingrongnoh haba U Trai un wan.
Jingkyntu: To ngin leh ia kaei ba U Kynrad jong ngi (U Jisu) u kwah ia ngi ban leh, to ngin bsa ia kiba dei ban bsa, to ngin ai bam ia kiba dei ban ai bam, bad haba U Kynrad un wan ha kano kano ka por, un shem ba ngi leh kumta, bad ba un sa ong ha ngi, Bha me u shakri babha bad ba ngeit. Hallelujah!
3. Ka jingiathut paralok
Kaba lai, ki briew ki lah ban duh ia ka jingrongnoh namar ka jingiathut paralok. U Jisu u la iathuhlypa ia kane, ba ha ki sngi ba khatduh shuwa ba U Jisu un wan shibun ki ban iathut bad iadie paralok.
MATHAÏOS 24:10, 12-13
¹⁰Ynda kumta te, shibun kin ïathut, bad kin ïadie paralok, bad kin ïashun paralok. ¹²Te namar ba ka pop kan man bun, ka jingieit kiba bun kan man khriat. ¹³Hynrei, jar uba da ïaineh haduh ka bakut, uta keiñ u ban ïohlait im.
Iathut paralok = Man khriat ka jinglong mynsiem
Bun bah ki briew tang namar ba ki thut iano iano (ia ki Nongialam, para bangeit) kim treh shuh ban leit jingiaseng, ki shong noh ha ïing, bad na kata ka jingshong ïing, wan sa ki jingpynshoi ba bun jaid, kumta suki suki ki tlot bad pjah noh ka jinglong mynsiem, bad lada U Jisu u wan ha kaba kum kata ka por kin duh ia ka jingrongnoh.
Jingkyntu: To ngin sumar ban ym ai jaka ia kano kano ka jingthut jingmong iano iano. U nongthoh sha ki Hebru ruh u ong, ba lada ngi don ia ka jingthut, jingmong, jingkthang, ngin nym kot satia sha ka jingaiei U Blei.
HEBRU 12:14-15
To beh brai ïa ka jinglong suk bad ki briew baroh, bad ïa ka jingpynkhuid, khlem kata, uno uno ruh un ym ïohi ïa U Trai: da kaba khmih bniah ïoh don uno uno u briew u ban ym kot sha ka jingaiei U Blei; ïoh ba uno uno ruh u thied ka jingkthang uba da mih shluiñ un pynkhuslai ïa phi, bad da uta, yn ïoh pyntngit ïa kiba bun:
U Trai um kwah satia ia ngi ba ngin duh ia ka jingrongnoh noh. U la leit khnang sha bneng 2000 snem tam mynshuwa, ban pynkhreh ka jaka ia ngi, bad u ong ba ynda u la dep khreh ka jaka un sa wan pat ban shimti ia ngi ha lade hi. Kumta to ngin pynkhreh ia lade da kaba ngi pyndap da U Mynsiem Bakhuid, to ngin pynkhreh da kaba leh ia ka mon jong U Trai, to ngin kiar ruh na kano kano ka jingiathut iamong paralok hi bad to ngin shakri shitrhem ia U Trai.
U Blei un kyrkhu, Amen.
N.B: U Trai u ai ia kane ka khubor ha ka 29th June, 2022 por 5:20 A.M.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | Sept 8, 2022
Comments
Post a Comment