Intro: Ka long kaba donkam ba ngin sngewthuh shai ia kine ar tylli ki bynta, kata, "Ka jingwan U Trai" bad "Ka jingwan ka sngi U Trai". Haba ngi pule ha ka Bible ngi ju iohi kine ar ki don ka jingiasyriem kawei ia kawei pat, kumta khnang ba ngin ym klumar, ngi donkam ban da pule bniah bha ia ka Bible khnang ba ngi lah ban pyniapher kawei ia kawei pat. Lada ngim pule bniah ngin sa pyniakhleh lang ia kine ar ha kawei ka bynta. Teng teng ki dkhot Bible ba kren ia ka jingwan U Trai, ngi pyndonkam ha ka jingwan ka sngi jong U Trai bad ia ka dkhot ba kren ia ka sngi jong U Trai, ngi pyndonkam ha ka jingwan U Trai. Kata ka dei kaba shait jia. To ngin ia peit mynta:
1. Ka jingwan U Trai:
Ka jingwan U Trai ka kren ia ka jingwan rong noh ia ki riewkhuid ne ka Balang. Ha ka ktien nongwei la ong 'rapture', kaba la thoh ha ka shithi sha ki Thessaloni.
1 THESSALONI 4:15-17
Namar kane, ngi ong ha phi da ka ktien U Trai, ba ma ngi kiba dang im, ïa kiba la pynsah haduh kata ka jingwan U Trai, da lei lei ngin ym ïoh leit shuwa ïa kita kiba la ïohthiah. Naba U Trai hi un wan hiar na bneng bad ka jingrisa, da ka ktien sawa u angel rangbah, bad da ka turoi U Blei: bad kita kiba ïap ha U Khrist kin ïamihpat shuwa. Ynda kumta, ma ngi kiba dang im, ïa kiba la pynsah, yn rong noh ïa ngi lem bad ki ha ki lyoh, ïa ka ban ïashem ïa U Trai ha ka suiñbneng: te kumta, ngin ïailong junom junom lem bad U Trai.
Hangne ngi iohi ia ka kyntien 'ka jingwan U Trai' bad ka kyntien 'rong noh'. U apostol Paul u ong ba ha kata ka sngi ba U Trai un wan, baroh kita kiba iap ha U Khrist kin ia mihpat shuwa. (Kiwei pat kiba iap khlem U Khrist kin ym pat mih ha kane ka por, hynrei tang kita kiba iap ha U Khrist). Bad ia ngi kiba dang im haduh kata ka jingwan jong U Trai, yn pynkylla dur ia ngi ha ka shi khyllipmat bad yn rong noh ia ngi lem bad ki ha ki lyoh ban iashem bad U Trai ha suiñbneng.
Nangta u apostol Petros ruh u thoh kumjuh.
2 PETROS 3:1, 3-4
Ïa kane ka shithi ka ba-ar, ko hep ba-ieit, nga thoh mynta ha phi, bad ha ki baroh ar, nga pynkynroi ïa ki jingmut basngur jong phi da kaba pynkynmaw keiñ ïa phi; da kaba phi tip ïa kane nyngkong, ba ha ki sngi ki bakhatduh kin wan ki nongkrenbeiñ da ka jingkrenbeiñ, kiba ïaid katba kum ki jingkwah brai la ki jong hi, bad ki da ong, “Hangno kata ka jingkular ïa ka jingwan jong u? namar naduh kaba kita ki kpa tymmen ki la ïohthiah noh, kiei kiei baroh ki ïaisah kumba ki ju long naduh myndanglong ka pyrthei.”
U Petros u da pynkynroi ia ka jingmut jong ki bangeit, u pynkynmaw ba kim dei ban klet shaphang ka jingwan U Trai, namar don ki bym ngeit ba U Trai un sa wan pat kumba u la kular. Ki ia ong, “Hangno kata ka jingkular ïa ka jingwan jong u?
U Jisu mynba u dang don bad ki synran u ju kular u ong ba ngan sa leit noh ban khreh ka jaka ia phi, bad u ong ba ngan sa wan pat ban shimti ia phi ha lade hi (ÏOANNIS 14:2-3). Kumta kine ki briew ha ka por u Petros haba ki iohi ba kata ka jingkular jong U Trai kam shym pat jia long, ki la sdang kren beiñ, ban pyn-artatien ia ki bangeit. Ki da ong ruh ba ka dei ka jinglehtud, hynrei u Petros u batai ba kam dei satia ka jinglehtud, hynrei ka dei Ka jingiaishahslem jong U Trai u bym da mon iano iano ruh ban jot noh.
U Trai um leh tud shaphang la ka jingkular, kumba don kiba ïañiew ka jingleh tud; hynrei, u ïaishah slem bad phi, u bym da mon ïano ïano ruh ban jot noh, hynrei, ba baroh kin poi sha ka jingkylla-ka-bamut.
2 PETROS 3:9
Kumta u Petros u la kyntu ia ki bangeit ba kin ieng skhem bad kin iai sharai na ka bynta ka jingwan U Trai.
Nangta ngi iohi u apostol Ïoannis ruh u thoh kumjuh.
1 ÏOANNIS 2:28
Te mynta, ko ki khun hep, to ïaisah ha u; khnang ba lada yn pynpaw ïa u, ngin ïoh ka jingsngewshlur, bad ba ngin ym lehrain ha khmat jong u ha kata ka jingwan jong u.
2. Ka jingwan ka sngi U Trai:
Ka jingwan ka sngi U Trai ka kren ia ka jingwan ban bishar bad pynjot noh ia ki bymman (ba pop), ki bym treh ban kylla bamut bad kiba kyntait ia U Jisu mynba ka jingaiei jong U Blei ka dang don.
MALAKHI 4:1
“Naba, ha khmih, kata ka sngi ka wan, ka ing kum ka lawar ding; te kiba sarong baroh, bad baroh kiba leh bymman, kin long u skum: bad kata ka sngi kaba wan kan pyningkhong ïa ki,” ong U Trai ki paid, “kat ban ym pynsah ïa ki lymne u thied lymne ka tnat.
Cf. Isaiah 13:6,9; Jer 46:10; Ezekiel 30:3; Joel 1:15; 2:1,11,31; Amos 5:18,20; Sephanaiah 2:2-3;
Ha kine ki dkhot 'Ka sngi jong U Trai' ka thew ia ka sngi jingbitar lane ka sngi ban pynhiarkput ia kita kiba sarong, ki bymngeit, kiba kyntait ia ka jingaiei U Blei.
Kane kan long hadien jong ka jingrongnoh ia ki riewkhuid. Hadien ba la rong noh ia ki riewkhuid ka pyrthei kan don ha ka jingklumar ba shyrkhei, kan don ka jingiawad briew, namar ba kiba ha ïing ha sem jong ki kiba la shah rong noh. Kan don ka jingpluh (crash) jong ki aeroplane, ki accident jong ki Kali, ki Train bad kiwei kiwei. Bad hapdeng kata ka jingklumar, un mihpaw u Mradkhlaw bad un pynjai jai ia ka pyrthei baroh, bad hangta kin ong, une te u lah dei u blei. Un synshar ha ka jingsuk shipor (3 snem shiteng), bad ha kata ka por ki briew kin ong o lah suk shisha, kat kane ka jingsuk, ka jingsngewskhem te ym don shuh. Hynrei kata ka sngi jong U Trai kan wan kyndit kum u nongtuh mynmiet.
1 THESSALONI 5:1-3
Hynrei, shaphang kita ki por bad ki aïom, ko parabangeit, phim donkam ban thoh ei ei ha phi. Namar phi hi, phi ïatip biang ba kata ka sngi U Trai kan wan kumjuh kum u nongtuh mynmiet. Katba ki dang ong, “Ka jingsuk bad ka jingskhembha”, ynda kumta, ka jingjot bakyndit kyndit kan ngat ha ki, kum ka jingsuh khun ha ka briew kaba punkhun; bad kin ym ïohlait shuh da lei lei.
Katba ki dang ong, 'Ka jingsuk bad ka jingsngewskhem bha', ki dang pyrkhat ba katto te ym don ba lah pynkhih shuh, hynrei kyndit kyndit ka jingjot kan ngat ha ki, bad kin ym ioh lait shuh.
Ha ka jingwan U Trai ban rong noh ia ka Balang, un da put turoi ba kita ki bangeit kin iohsngew bad kin ia her da ka jingkmen ban iashem bad U Trai ha sahit bneng.
1 KORINTH 15:51-53
Ha khmih, nga ïathuh ha phi ïa ka jingmaïan: ngin ym ïohthiah baroh, hynrei, yn pynkylla ïa ngi baroh shisyndon, ha kaba shi khyllipmat keiñ, ha ka turoi ka bakhatduh. Namar ka turoi kan sawa, ynda kumta, ïa ki baïap yn pynmih pat ki bympyut, bad ïa ngi yn pynkylla. Namar ka dei da lei lei ïa kane kaba pyut ban phong ïa ka bympyut, bad ïa kane ka baïap ban phong ïa ka bymïap.
Hynrei ha ka jingwan ka sngi U Trai, un wan kum u nongtuh mynmiet, (kaba mut ha ka por ba kim poi pyrkhat). Un wan kynsan kynsan ban pynjot ia kita ki bym ngeit. Bad hangta kan long ka jinglynniar lympat ong ka Ktien U Blei.
Kumta ka jingkyntu ka long, To ngin pynkhreh ia la ka jong ka jingim khnang ba ngi lah ban iashem bad U Trai ha kata ka sngi jong ka jingwan rongnoh jong u, ba ngin ym ia kynduh ia kata ka jingwan ka sngi U Trai kaba long ka sngi jong ka jingbitar bad ka jingpynhiar kput ia ki bymman.
Nga ngeit ngi la ioh jingmut katto katne halor kine ar bynta. U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | Feb 19.02.2023
Written on June 12, 2021
Comments
Post a Comment