Ki dak jong ki sngi bakhadduh

Ki dak jong ki sngi bakhadduh

Lehse phi lah ban pyrkhat lane ban kylli kiei kita ki sngi bakhadduh?

Ki sngi bakhadduh kidei ki sngi shuwa ba U Jisu un wan ban rongnoh ia ka Balang lane ia ki riewkhuid.

U Jisu mynba u dang don ha kane ka pyrthei u la iathuhlypa ha ki synran jong u ba un sa leit noh ban khreh ka jaka ia ki, bad u ong, ynda u la dep ban khreh ka jaka ia ki, un sa wan pat ban shimti ia ki ha lade hi… IOANNIS 14:1-3

Kumta khnang ba ngin nang ban pynkhreh bad ba ngin nym duh ban iashem bad u, u la pyni lypa ia ki dak ki shin ba shuwa ba ma u un wan, kin don ki jingjia bapher bapher.

MATHAIOS 24:3-14

1. Ki thma - v.6

Ki thma barit, ki thma bakhraw ki la jia na ka por sha ka por. Dang mynshymsnem ngi dang sakhi ia ka thma Russia & Ukraine, ha kaba la don ka jingiather bom kaba shyrkhei, ka jingiap ka jingduh ka bym nang ong shuh. 

Kine baroh ki pynshisha ia kaei ba U Jisu u ong. Nga lah ban ong ba ki long ruh kum ka alarm na ka bynta jong ngi ba ngin nang ban pynkhreh bad pynbeit ia la ka jong ka jingim.

2. Ka jingialeh makynti - v.7a

Ha kine ki sngi ngi sakhi ia kita ki jingialeh makynti, kumba la ong ka ktien U Blei.

Kawei ka hima ka ialeh ia kawei pat ka hima, kawei ka state ka ialeh makynti bad kawei pat ka state. i.e: Assam - Meghalaya, Assam - Mizoram, etc. 

Wat ha ïing ha sem ka don ka jingialeh makynti ka jur ha kine ki sngi.

3. Nemsniew & jingiapthem - v.7c

Ka nemsniew ka dei kata ka jingkyrduh bam kyrduh dih, kaba ym long ka thung ka tep, kam seisoh kumba dei ban seisoh. Ngi juh iohsngew na ka por sha ka por ia ka jingud jong ki nongrep namar bym seisoh ka rep kumba dei. Kiba bun ki nongrep sha RI dkhar ki pyniap noh wat ia lade namar bym long ka rep bad ka jingdapram.

Na ka nemsniew, ka wan sa ka jingiapthem. 

Iapthem ka mut ka jingiap briew kaba jur. Dang ha u snem 20-21 ngi dang sakhi ia ka jingpang Corona, lah ban ong ba kane ruh ka lah dei kawei na ki nemsniew ha kaba lah sniew lut ki kam ki jam, lah sniew lut ka koit ka khiah jong ki briew, sniew lut ka pule puthi etc, bad wat ka jingiap ruh, kaba lah jan long shisha kum kata ka jingiapthem, hangto ruh iap, hangto ruh iap.

4. Ki jingkhynniuh jumai ha shibun ki jaka - v.7c

Ki jingkhynniuh jumai ruh ki la jia ter shi ter. Tang kiba ngi kynmaw dang kham shen ia u jumai ha Nepal ha u snem 2015, ha kaba la iap kumba 8,964 ngut eiei ki mynsiem, 21,952 eiei kiba mynsaw. Ka jingduh jingjulor kaba shyrkhei.

Nangta mynta u snem (6th Feb, 2023) ngi sakhi ia u jumai bah hapoh Turkey & Syria, ha kaba da ki phew hajar ki briew ki la iap. Haduh mynta ka jingiap briew ka dang kiew shi kiew. 

Ki building bah ki la twa lut, ki surok bah ki la kad lut, ka jingjulor kaba ym lah shuh ban batai.

5. Ka jingiathut, iashun, iadie paralok - v.10

U Jisu u la iathuhlypa ba shuwa ba ma u un wan, ki briew kin ia thut paralok, kin ia shun paralok, bad kin ia die paralok. 

Lada phi bishar bha ha kine ki sngi phin shem ba ka la long kumta kumba U Jisu u la iathuhlypa. Ka don ka jingiathut paralok kaba khraw, naduh kiba heh haduh kiba rit, ka jingiathut kaba jur. 

Para Marjan ruh thut, para bangeit ruh thut, shu ia thut klumar. Bad na ka jingiathut ka wanrah ia ka jingiashun. 

Mynshuwa te iadei paralok bha, ia ieit ia thoin hynrei mynta lah iathut lah iamong, ym long shuh ban ia kren ia khana, ban ia iaid ia ieng.

Ym tang katta, hynrei ngi sakhi ruh ia kata ka jingiadie paralok, ka jingiashet paralok. Naduh ki politicians haduh u paidbah paidlang, la shu ia shet la shu ia die paralok, ym don jingia shaniah shuh.

6. Ka pop kan man bun - v.12a

Shuwa ba U Jisu un wan lah dep iathuhlypa ba ka pop kan man bun. 

Kaei ka pop? Ka pop ka dei ka jingpalat hukum.

Ngi la im shisha ha ki sngi ha kaba ki briew ki sngewtynnad ban pynkhein hukum. Lada ong wat leh kumto ki leh khnang, la ka dei ia ka hukum briew ne ka hukum Blei. Dei namar kata ka daw ha kine ki sngi ngi iohi ki mih ki jaid pa ki jaid pop. Ka pop ka la man bun shisha.

Ngi iohi ia ka jingjyllei jong u drugs, ka jingjyllei jong ka kyiad, iaid tang kumba katto katne meter lah iohi ia ki dukan kyiad. Ka jyllei jong ki kam sniew kam smeh ba laiphaw jaid ha kine ki sngi. 

Kine baroh ki pynshisha ba ngi lah im ha ki sngi bakhadduh.

7. Ka jingieit kan man khriat - v.12b

Lada phin tynjuh phin shem ba ka jingieit jong kiba bun ha kine ki sngi ka lah man khriat shisha. La ka long ka jingieit ia U Blei ruh kiba bun ki lah man khriat. Kam don shuh ka jingbang ban shakri Blei, ban leit jingiaseng wan jingiaseng. Kam don shuh ka jingbang ban duwai ban pule Bible. Kam don shuh ka jingbang ban ialap ban phla ia U Trai. 

Nangta lada ngi peit ha ka jingiadei briew, ka jingieit para briew ruh ka lah man khriat, ka la hiar haduh katta katta. 

Ka jingieit jong kiba bun ha kine ki sngi ka long sa tang ka jingieit pyrthei.

Lada pynlong jingiaseng ñiar ba ki briew kin leit, hynrei lada pynlong tamasa, ym ngiam wat kaja ruh. Kata ka dei kaba ngi iohi ha kine ki sngi.

2 TIMOTHI 3:4‭-‬5

"...kiba ieit ïa ki jingsngewbha kham tam ban ïa kaba ki ieit ïa U Blei; kiba don ka dur ka jingriewblei, hynrei, kiba la len ïa ka bor jong ka; na kine ruh to phai noh."

Ka jingieit jong kiba bun kaba ki don mynta ka long sa tang ka jingieit ia lade. U Apostol Paul u ong ba ki briew ha ki sngi bakhadduh kin long kiba ieit tang ia lade. 

2 TIMOTHY 3:1-2

Balei ka hiran, ka jynjar ka pyrthei katne katne, ka daw ka dei namar ba ka jingieit jong ki briew ka lah man khriat, sah satang ka jingieit ia lade. Tang ban biang ban bit ia lade, ia kiwei ym don jingpyrkhat shuh. Kata ka long kaei kaba ngi iohi.

Paralok baieit, kine kiei kiei baroh kiba jia, ki pyni ba U Trai Jisu u la jan ban wan, ban wan shaw noh ia la ki jong, ia kita kein kiba la pynkhreh.

Ka jingkylli ka long, Hato lada U Jisu u wan noh ngi lah pynkhreh mo ia lade, nginlah long ready mo ban ia shem bad U? 

Lada ngim pat sngew thikna, phi donkam ban kylla bamut bad pdiang noh ia U Jisu ha ka dohnud jong phi ha kane ka miet. Wat nym ap lashai, wat nym ap la shisngi, hynrei mynta.

Wat nym ap ban kyrpad Blei ynda lah khih u jumai bah ha shnong jong phi, wat nym ap ban kyrpad Blei ynda phi la poi ha dujok kum uto u Riewspah ba la iathuh khana U Jisu. Hynrei khot kyrpad noh ia U mynta.

2 Kor 6:1-2 Ka jingpynim ka long mynta.

Mynta katba phi dang iohsngew ia ka sur jong U Trai kaba khot ieit iaphi, wat pyneh ia ka dohnud jong phi. Wan sha u, aiti ia la ka jingim ha U.

HEBRU 3:7‭-‬9 KHB

⁷Naba kumta, kumba U Mynsiem Bakhuid u ong: “Ha kane ka sngi, lada phin sngew ïa ka ktien jong u, ⁸wat pyneh ïa ki dohnud jong phi, kumba ha kata ka jingpynkhih bitar, kum ha kata ka sngi ka jingtynjuh ha ka ri khlaw, ⁹ha kaba ki kpa jong phi ki la ïapynkhih bitar ïa nga, ki la ïatynjuh ïa nga, bad ki la ïohi ïa ki kam jong nga sawphew snem.

 

Lada ngi pyneh, lada ngi leh bymsuidñiew, ka jingpynjot ba kyndit kyndit kan long ia ngi.

PROBERB 29:1

Uta haba la sneng ïa u bunsien u pyneh ïa la ka ryndang yn pynlwet kyndit ïa u, bad kata bymdon jingshna shuh.

Haba U Blei u pynlwet, ym don ba lah ban shna shuh, ym don jingkyrmen shuh da kumwei pat, sa tang ka jingbabe kaba ap.

Ki briew ha ka por u Noah la sneng ia ki bunsien da u Noah, hynrei ki pyneh ia la ka ryndang, bad haba U Blei u la pynlwet ia ki, ym don ba lah ban shna shuh, iam katba iam, kyrpad katba kyrpad, ym don jingshna shuh. MATHAIOS 24:37-39

Ki briew jong ka Sodom la maham da u Lot, la maham da ki angel, hynrei ki pyneh ia la ka ryndang, bad haba ka jingiaishah slem jong U Blei ka la kut, la pynjot kyndit ia ki da u kyndok bad ka ding, la thang ingkhong khait ia ki.

Kumta paralok baieit, katba ka jingiaishah slem jong U Blei ia dang don, phai noh kloi sha U Jisu. Ngeit bad pdiang noh ia U mynta un pynim ei ia phi.

U Blei un kyrkhu ia phi. Amen

© Jester Mawlong | Feb 12, 2023