Pynkhreh ia lade na ka bynta ka jingshah pynshitom beiñ

PYNKHREH IA LADE NA KA BYNTA KA JINGSHAH PYNSHITOM BEIÑ

Ngi la ju ioh jinghikai na ka por sha ka por ia ki subject bapher bapher ki ban pynsan ia ngi ha ka jinglong mynsiem, ka long ruh kaba donkam ba ngin ioh jinghikai shaphang kumno ba ngi dei ban pynkhreh ia lade na ka bynta ka jingpynshitom beiñ. Hooid ngim kwah ba ka jingpynshitom beiñ kan wan, hynrei ngim lah ruh ban tip ba ha kano ma kano ka por ka lah ban wan. 

Mynshuwa ngi iohsngew ia ka jingpynshitom beiñ tang sha ki ri ba kham jngai, hynrei mynta ngi la iohsngew ba ka la nang wan kham hajan. Dang ha kine ki khyndiat sngi ngi la iohi lyngba ki lad pathai khubor, ki social media kumno ba ka jingpynshitom beiñ ia ki Khristan ka la sdang ha Assam (ka jylla ba marsyndah bad ka jylla Meghalaya jong ngi), nangta ha Tripura, bad kiwei kiwei ki jaka ha kaba la pynpra ia ki ïingmane, shoh ia ki Pastor, ki Nongialam Balang; kumta kum ki bangeit ngi donkam ban long kiba la pynkhreh lypa ba lada jia ba ka wan ruh ngin lah ban ieng bad ban jop. Hallelujah!

Ki khynnah skul kiba lah pynkhreh lypa na ka bynta ka exam, kumta haba ka wan ki lah ban thoh bad ban ioh kheit ia u soh jong ka jingjop. Kumjuh ruh ma ngi haba ngi la pynkhreh lypa, lada jia ba ka wan ruh ngi lah ban jop. Ki synran U Jisu ki la lah ban ieng skhem wat hapdeng ka jingshah pynshitom beiñ kaba jur bha, ka dei namar ba ki la long kiba la khreh lypa, namar U Jisu mynba u dang don bad ki u lah dep hikai lypa ba ki dei ban long kiba la pynkhreh na ka bynta ka jingshah pynshitom beiñ. (MATHAIOS 10:16…) Kumta ngi iohi wat ka waitlam, ka jingma, wat ka jingiap hi, kim lah satia ban pynphaidien ia ki. Hallelujah! Ngi ruh ngi lah ban jop lada ngi la pynkhreh ia lade na ka bynta kata. 

Kumno ngin pynkhreh? 

Ka jubab ka long pynmlien ban shah shitom shuwa ha i ei i ei iba khyndiat lane ha kiei kiei kiba rit.

Nuksa 1: Ha ka jingleit jingiaseng, wan jingiaseng: Ngi donkam ban sngewthuh ba baroh ki test, donkam ban sdang shuwa na kaba rit lane na kaba kham suk. Nuksa: Khynnah skul, weight lifter, etc. Kumta ruh ha kaba iadei bad ka jingshah shitom na ka bynta U Trai. 

Ha kine ki sngi bun ki briew kim kwah shuh ban pynshitom ia lade wat ha kaba leit jingiaseng. Don kiba la shu sngewhun noh tang ban peit lane sngap jingiaseng lyngba ki online, lyngba ki YouTube etc, da kaba shu shong ha ïing. Hooid ngam mut ba ym long shuh ban sngap online, ngi lah ban sngap, hynrei ngim dei pat ban klet noh ia ka jingiaseng lang. Ka Ktien U Blei ka ong, To phin beh sha ka jingiaseng lang, wat iehnoh, leit sha ka jingiaseng lang man ka por.

HEBRU 10:25

"...khlem da iehnoh ïa ka jingïaseng lang jong ngi hi, kumba long ka rukom kiwei, hynrei, da ïakyntu paralok hi; bad kata kham tam, katba phi ïohi ïa kata ka sngi ba ka nang jan."

Lada ha kaba leit jingiaseng lane ha kaba shakri ia U Trai ngim lah ban shah shitom, ka long kaba artatien ba ngi lah ban shah lada ka wan ka jingpynshitom beiñ kaba kham eh.

Nuksa 2: Ha ka jingialap ne phla ia U Jisu sha kiwei pat: U Apostol Paul u shem ba ka jingialap ia U Khrist ruh ka dei kawei na ka dak jong ka jingshah shitom. Na ka bynta ka gospel jong U Trai, u la shah shitom wat jin haduh ka jingiap, dei namar kata ka daw u la kyntu ruh ia ki para ba iatreilang kum ia u Timothy bad kiwei ba ki dei ban shah shitom na ka bynta ka jingphla ia U Trai.

2 TIMOTHI 4:5 “Hynrei, ma me, to sharai ha kiei kiei baroh, to shah shitom, to leh ïa ka kam u nongïathuhkhana, to pyndep ïa kata ka kam jong me.”

2 TIMOTHI 2:3 “Ma me, namar kata, to shah shitom bad nga, kum u shipai babha U Jisu Khrist.”

Ngan iathuh ia phi, ngi ruh haba ngi leit ialap ia ka gospel, shibun kiei kiei kiba ngi hap ban shah. Ka jingshah rkhie beiñ, kren beiñ, ki jingeh - jingthngan, etc. Hap ban shah na ka bynta ka gospel.

Nga kyntu ruh ia phi ki bangeit, to ngin long la kloi ban shah shitom na ka bynta ka gospel U Khrist, da kaba phla ia U sha kiwei pat, kampher ki briew kin ong kumno.

U Jisu haba u phah ia ki synran ban leit ialap, u la iathuhlypa ba kin sa shah kren beiñ, shah lehbeiñ. Hynrei u ong phi dei long lakloi ban shah. MATHAIOS 10:16-22

Balei ngi dei ban shah shitom?

U Apostol Paul u thoh ha ka shithi sha ki PHILIPI 1:29, u ong ba la ai ia U Khrist ha ngi ym tang ban ngeit ha U, hynrei ban shah shitom ruh na ka bynta jong U. Lehse ngi lah ban pyrkhat, balei haba U Jisu u la shah na ka bynta jong ngi, ngi dang donkam ban shah shitom kumta? 

Ngan iathuh ia phi ba ka jingshah shitom ka dei ka dak ba ngi ieit ia U Trai. U Jisu namar ba u ieit ia ngi, u la shah shitom na ka bynta jong ngi. Kumta, kumba U Khrist u la shah shitom na ka bynta jong ngi, ngi ruh kadei ban shah shitom na ka bynta jong U.

1 PETROS 4:1

Namar kata, haba U Khrist u la shah shitom ha ka doh, te ma phi ruh, to phin kieng atiar ïa lade da kata kajuh ka jingmut; naba jar uba la shah shitom ha ka doh u la wai noh na ka pop.

U Petros u ong, ngi hap ban kieng atiar ialade da kata ka juh ka jingmut. Man ka Good Friday lane haba ai jingkhawai U Trai la kren tang shaphang ka jingshah U Khrist, ngi shu enjoy beit ha kata, ym ju kham iohsngew ban hikai ba katne U Khrist u la shah na ka bynta jong ngi, ka dei ia ngi ruh ban shah shitom na ka bynta jong U.

1 PETROS 3:18 

Naba U Khrist ruh, u la shah shitom shi sien namar ki pop, U Bahok na ka bynta ki bymhok, khnang ba un ïoh ïalam ïa ngi ha U Blei; haba la pynïap ïa u ha ka doh, hynrei, ba la pynlong im ïa u ha U Mynsiem.

U Khrist u bahok, u la shah shitom na ka bynta jong ngi ki bymhok. Kumta ka jingkhot ia ngi ka long to ngin pynkhreh ban shah shitom na ka bynta U Trai wat la ka long ha kano kano ka rukom ruh.

Kumno ngi lah ban shah shitom?

1. Sngewthuh ia ka dor ka jingieit U Khrist: Haba ngi sngewthuh haduh katno U Khrist u ieit ia ngi bad u la shah na ka bynta jong ngi, ngin jin da la long lakloi ban shah ruh na ka bynta jong U. U Paul u thoh ha ka shithi sha ki Nong Rom u ong ba lada ngi la sngewthuh ia ka jingieit U Khrist, ym nym don ba lah ban pyniakhlad ia ngi. (Pule ROM 8:35 ter ter.)

Ai ba ngi ruh ngin da sngewthuh jylliew, ngin da ngam kham jylliew ha kata ka jingieit jong U Khrist khnang ba ngi lah ban shah shitom ruh na ka bynta jong U. Lym kumta shibun ki daw kin mih. Lada ong ban leit jingaiseng, mih ki daw, ong ban leit ialap, mih ki daw, ong ban leh eiei na ka bynta U Trai mih ki daw, ki daw kat shaba phai.

2. Iohi ia ka jingkhraw jong ka bainong ba U Trai u la pynkhreh ha bneng: Ki jingshitom ba ngi mad ha kane ka pyrthei kim long eiei ban ia nujor bad kata ka bainong ba U Trai u la pynkhreh ha bneng.

ROM 8:18 “Namar nga kheiñ ba kita ki jingshahshitom ki jong ka pyrthei sngi kaba mynta, kim long ei ei ruh em ban ïanujor bad kata ka burom ka ban sa pynpaw ha ngi.”

U Paul bad U Silas ki la shah sympat, shah shoh namar ka gospel U Khrist, la set byndi ia ki, hynrei ha ïing byndi ki shad kmen, ki rwai iaroh ia U Trai. KAM 16:16-40. Kumno ki lah ban rwai iaroh bad shad kmen? Namar ba ki tip kaba khraw ka bainong jong ki ha ki bneng. Para bangeit baieit, ka bainong kaba U Trai un ai ka khraw palat!

MATHAÏOS 5:10‭-‬12 Suk kiba ïoh pynshitom na ka bynta ka hok: naba jong ki, long ka hima ki bneng. Suk ma phi haba kin ïakrenbeiñ, bad pynshitom ïa phi, bad ba kin ong ki ktien bymman baroh ruh ïa phi na ka bynta jong nga, haba ki shu lamler. To ïakmen, to ïashadkmen ruh: namar ka bakhraw ka bainong jong phi ha ki bneng: naba kumta ki la ïa-pynshitom ïa ki nongïathuhlypa kiba la mynshuwa jong phi.

Kane ka bainong kaba khraw ka ap ia kita baroh kiba lah ban shah shitom na ka bynta U Khrist tad haduh ba un wan. U Apostol Paul hadien ba u la shah shitom ha kiba bun ki bynta, bad ha kaba kut u ong ba mynta ia nga la pynkhreh ia ka pansngiat, bad ym tang ia nga, hynrei ia kita baroh kiba ieit ia U Trai bad kiba shah shitom na ka bynta jong U.

2 TIMOTHI 4:8 “Naduh mynta, ïa nga la buh ïa kata ka pansngiat jong ka hok, ïa kaba U Trai, uta U Nongbishar bahok, un ai ha nga ha kata ka sngi: bad ym tang ha nga hi, hynrei, ha kita baroh ruh kiba ieit ïa kata ka jingmihpaw jong u.”

U Apostol Petros haba u iohi ia kata ka jingkhraw jong kata ka bainong ba U Trai un ai, u la kyntu ba ngi donkam ban shah shitom na ka bynta ka hok. (1 PET 3:14). U ong ruh ba ngim dei ban lehraiñ haba ngi shah shitom na ka bynta ka hok, lada ngi shah shitom kum ki nongtuh, nongpyniap briew, ngi dei hok ban lehraiñ. 1 PET 4:12-19

Ngi iohi ia ki Apostol U Jisu Khrist kim ju sngewlehraiñ ban shah shitom na ka bynta U Trai. KI KAM 5:17....; 41 "Ki la ñiew ia lade kiba bit ban shah jah burom." Ka Bible ka ong, 'Ki da ia kmen' namar ki tip, kaba khraw ka bainong jong ki ha ki bneng. To ngin ioh ia kaba kum kane ka jingmut.

Jingpynkut: U Petros u ong, ba ynda ngi la shah shitom khyndiat por, U Trai un da pynjanai ia ngi, un da pynskhem, un da pynshaitbor ia ngi.

1 PETROS 5:10 “Te U Blei ka jingaiei baroh, uba la khot ïa phi sha kata ka burom bymjukut jong u ha U Khrist, ynda phi la shah shitom khyndiat por, ma u hi keiñ, un da pynjanai ïa phi, un da pynskhem, un da pynshaitbor.”

U Trai un nym iehnoh ia ngi hapdeng ki jingshah pynshitom beiñ, hynrei ma u hi un pynjanai ia ngi, un pynskhem ia ngi bad un pynshaitbor ia ngi ba ngi lah ban ieng skhem haduh kaba kut.

U Blei un kyrkhu ia phi baroh. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | February 19.2.2023