Intro: Ngi la ju ia kren bad iohsngew barobor shaphang ka jingaiei, hynrei kham bunsien
ngi iohsngew beit tang kumno ba ka jingaiei ka pynim ia ngi, hooid kata
ka long kaba shisha, ka jingaiei jong U Trai ka pynim ia ngi, hynrei lada ngi
pule ha ka Bible ngi shem ba ka jingaiei ka don ruh ia shibun ki jingkyrkhu ha ka.
Ka long kaei kaei kaba sngewtynnad ban ia kren shaphang ka jingaiei. Ngi pule ha ka shithi u Apostol Paul sha U Titos ngi shem ba ka jingaiei nalor ba ka wallam jingpynim, ka long ruh kata ka Nonghikai ia ngi.
TITOS 2:11-13 KHB
¹¹Namar ka jingaiei ka jong U Blei ka la paw, kaba wallam jingpynim ha
ki briew baroh, ¹²kaba hikai ïa ngi, khnang ba haba la len noh ïa ka
jingbymriewblei bad ïa ki jingkwah brai ka pyrthei, ngin ïoh im bakhan
adkar, bad bahok, bad bariewblei, ha kane ka pyrthei kaba mynta; ¹³kiba
ïakhmih ïa kata ka jingkyrmen basuk, bad ïa ka jingmihpaw ka burom jong
U Blei Bakhraw bad U Jisu Khrist U Nongpynim jong ngi.
1. Ka wallam jingpynim.
Kaba nyngkong bad kaba sngewtynnad eh ka long ba ka jingaiei jong U Blei ka
wallam jingpynim ia ngi kiba ngeit ha U Jisu Khrist. Ngin nym lah ban ioh
jingpynim da kano kano kawei pat ka rukom lane da ka jingleh jong ngi,
hynrei ngi ioh dei tang da ka jingaiei jong U Blei.
EPHESOS 2:8-9 KHB
Namar da ka jingaiei la pynim ïa phi, da ka jingngeit keiñ; kata ruh,
ym na phi hi; ka long ka jingai U Blei: ym da ki jingleh keiñ, ba uno
uno ruh un ym ïoh ban sngewsarong.
Lada dei ba ngi lah ban ioh da ka jingleh jong ngi, ngin jin da la sngew
sarong. Kynmaw U Blei um ju sngewtynnad ia ki briew kiba pynksan ha la ka
jingleh jong ki.
MATHAÏOS 7:22-23 KHB
Shibun kin ïa-ong ha nga ha kata ka sngi, ‘A Trai, A Trai, ngi ngim
shym la ïalap ha ka kyrteng jong me? Ngi ngim shym la beh noh ïa ki
ksuid ha ka kyrteng jong me? Ngi ngim shym la leh shibun ki kambah ruh
ha ka kyrteng jong me?’ Ynda kumta te, nga ruh ngan ong pyrshah ha ki:
Ngam ju la ithuh ïa phi; khie leit noh na nga, phi kiba ju trei
bymman.
U Blei un nym ithuh ïa kita kiba pynksan ialade ha ki jingleh jong ki,
hynrei u ithuh tang ia kita kiba ngeit bad pdiang ia ka jingaiei jong U
Blei.
2. Ka hikai ia ngi.
Kaba ar kaba ngi iohi, ka jingaiei ym tang ba ka pynim ia ngi, hynrei ka
hikai ruh ia ngi kumno ba ngi dei ban im kum kita kiba la pdiang ia ka
jingaiei U Blei.
Ngin ia peit mynta kumno kane ka jingaiei ka hikai ia ngi.
1) Ba ngin len noh ia ka jingbym riewblei
Ka jingmut 'len' ka mut ban ym ithuh, ban iehnoh shadien bad ban
ong 'em' ia ka jingbym riewblei bad ka pop.
Ka jinglong tynrai jong u briew hi ka hikai beit ia u briew ba un im ka
jingim bym riewblei. Kumta u briew katba um pat shem ia ka jingaiei jong U
Blei, u sngewtynnad beit ban leh ia kiei kiei ki ban ialam sha ka jingbym
riewblei. Hynrei hadien ba u la shem ia ka jingaiei jong U Blei, kata ka
jingaiei ka hikai ia u ba un im ka jingim ba riewblei.
Ngim lah ban ong ba ngi la shem ia ka jingaiei jong U Blei, lada ka jingim
jong ngi ka dang im ha ka jingbym riewblei. Ngi dang leh, ngi dang kren ia
kiei kiei kiba mar pyrshah bad kata ka jinglong riewblei.
2) Ba ngin len noh ia ka jingkwah brai ka pyrthei.
Naduh ba u briew banyngkong, u Adam u la hap noh, ka jingkwah brai ka la
synshar ha u briew baroh phar. Ka jingkwahbrai jong ka doh, ki jingkwahbrai
jong ki khmat, ki jingkwahbrai ba bun jaid. Hynrei haba u briew u shem ia ka
jingaiei jong U Blei, kata ka jingaiei ka hikai kumno ba ngin len noh ia
kata ka jingkwah brai ka pyrthei baroh, ka pynlah ia ngi ba ngin jop ia kata
ka jingkwah brai pyrthei baroh.
Da lade ngin nym lah, hynrei kata ka jingaiei ka hikai bad ka pynlah.
3) Ba ngin ioh im ba khan adkar
Ka jingim ba khan adkar ka dei kata ka jingim kaba im da sumar, husiar,
peitngor. U briew bym pat shem ia ka jingaiei, un nym lah satia ban im
adkar, u lah ban pyrshang hynrei un nym lah ban im. Hynrei haba u briew u la
shem ia ka jingaiei, kata ka jingaiei ka hikai ia u bad ka ai bor ruh ia u
ba u lah ban im ba khan adkar.
Ka jingaiei ym tang ba ka shu hikai, hynrei ka ai ruh ka jingaiei ba ngi lah
ban im ba khan adkar. Hallelujah!
4) Ba ngin ioh im ka jingim bahok.
U David u ong,
Ha khmih, la thaw dur ïa nga ha ka jingbymhok; bad ha ka pop ka kmie
jong nga ka la pun ïa nga.
SALM 51:5 KHB
Ka Bible ka iathuh ia ngi ba da ka jinghap noh jong u Adam, ka pop ka la
bsut sha ka pyrthei baroh phar.
ROM 5:12 KHB
Naba kumta keiñ, kat kumba da uwei u briew, ka pop ka la bsut sha ka
pyrthei; bad da kata ka pop, ka jingïap; bad kumta, kata ka jingïap ka
la wanhap ha ki bynriew baroh phar, namar ba baroh ki la leh pop.
Ka jinglong tynrai hi ka hikai ia u briew ban leh pop, ban leh pyrshah ia U
Blei. U Apostol Paul u thoh sha ki nong ROM 3:10 ter ter u ong ba ym don
shuh uba kwah ban leh bha, hynrei tang ban leh pop. Hynrei hadien ba u la
shem ia ka jingaiei, kata ka jingaiei ka hikai ia u ba un im ka jingim
bahok, kata ka jingim ka beit bad U Blei.
5) Ba ngin ioh im ka jingim ba riewblei.
Ka jingaiei ka hikai ruh ia ngi kumno ba ngin im ka jingim ba
riewblei.
Ka jingim ba riewblei ka long kaba donkam haduh katta katta. Ha ka Bible la
ju iaroh ia ki briew kiba riewblei, bad ym tang ban shu iaroh, hynrei ngi
shem ba U Blei u da kyrkhu kyrpang ruh ia u briew uba riewblei.
SALM 112
Kumno ngi lah ban sngewthuh, ngi don ne em kata ka jingim ba riewblei ha
ngi?
Nyngkong ngi donkam ban sngewthuh ba ka jingriewblei ka paw ha ka jinglong
jingim, ka paw ha ka ktien ka thylliej, ka paw ha ka jingleh bad kiwei kiwei
ki bynta jong ka jingim.
Ngim lah ban ong ba ngi la iohpdiang ia ka jingaiei, bad ngi la long kiba
riewblei lada kata ka dak jong ka jinglong riewblei kam don satia ha ngi. U
Apostol Paul u ong ba ki briew ha ki sngi bakhadduh ki lah ban don ia ka dur
riewblei, hynrei ha ki kam pat ki len noh ia ka bor jong ka. 2 TIMOTHY 3:5
Lada ngi sngewthuh ba ka jingleh, ka jingkren, ka jingim jong ngi ka dang
long thurmur, kam don ka jingriewblei ha ka, ngi donkam ban duwai bad shah
ba ka jingaiei kan hikai ia ngi. Kata ka long kaba donkam ban leh.
6. Ka jingaiei ka hikai ia ngi ba ngin iai apkhmih ia kata ka jingkyrmen
basuk.
Ka jingkyrmen basuk lane ba la kyrkhu ka dei kata ka sngi jong ka jingwan
rongnoh U Trai ia ka Balang. Ka jingkhot sha ka jingim ba la pynkhreh ka
long kaba donkam haduh katta katta. Kumta haba ngi ioh ia ka jingaiei jong U
Blei, kata ka jingaiei ka hikai ia ngi kumno ba ngin pynkhreh ia lade na ka
bynta kata ka jingkyrmen basuk, ban iashem bad U Trai.
Ainguh ia U Trai namar ka jingaiei jong U. To U Blei un kyrkhu ia ngi lang baroh. Amen
La shah laitluid ban SHARE ia kane ka post, hynrei yn nym shah ban
print ne pynmih ha kino kino ki jingthoh khlem ka permission.
@ Jester Mawlong | March 20, 2023
Comments
Post a Comment