Ka jingmih na ka jingshah shitom na ka bynta U Khrist

Ka jingmih na ka jingshah shitom na ka bynta U Khrist

Ha ka post kaba lah dep nga la thoh shaphang Pynkhreh ialade na ka bynta ka jingshah pynshitom beiñ , bad mynta pat nga kwah ban ia peit ia ka jingmih haba ngi shah shitom na ka bynta U Khrist.

1. Ka pynsngewbha ia U Blei.

2 TIMOTHY 2:3-4

Ma me, namar kata, to shah shitom bad nga, kum u shipai babha U Jisu Khrist. Ym don uba pynsuh sat ïa lade da kiei kiei ki jong kane ka jingim haba u leit ïaleh thma; khnang ba un ïoh pynsngewbha ïa uta uba la thung shipai ïa u.

U Apostol Paul u ong ia u Timothy ba un ia shah shitom lem bad u na ka bynta U Khrist, da kaba u ai ia ka nuksa na u shipai kumno ba u shipai u shah shitom tang ban ioh pynsngewbha ia uta uba la thung shipai ia u, kumjuh u ong ngi ruh ngi dei ban shah shitom khnang ba U Trai kum uta u rangbah shipai jong ngi un shem sngewbha.

Ngi iohi ruh shaphang U Jisu kumno u la kloi ban shah shitom wat haduh ka jingiap, bad kata ka ka pynsngewbha eh ia U kpa, haduh ba U kpa (U Blei) u la ong, une u long u khun jong nga, ha uba nga sngewbha eh. MATHAIOS 3:17; 17:5

2. Ngin ioh ia ka Pansngiat.

JINGPYNPAW 2:10

To wat sheptieng ïa kita kiei kiei ruh kiba phan sa shah: ha khmih, uta u Soitan un sa bred ïa kiba na phi ha ka ïing byndi, ba yn ïoh tynjuh ïa phi; te phin ïoh ïa ka jingshahshitom shiphew sngi. To long pha kaba ïaineh haduh ka jingïap, bad ngan ai ha pha ïa kata ka pansngiat jong ka jingim.

U Trai u ong ia ka Balang Smyrna, wat sheptieng ia kita kiba phan sa shah (jingshah pynshitom beiñ), bad ha kaba lada pha iaineh, ngan ai ha pha ia kata ka pansngiat jong ka jingim. 

U Petros u kylli ia U Jisu, ngin ioh aiu haba ngi bud ia Me, bad ngi shah shitom na ka bynta jong Me? U Jisu u jubab da kaba ong, men ioh....

Paralok baieit, to ngin iaineh skhem ha U Trai haduh kaba kut, watla ngi mad ia ki jingeh kiba bun ha kaba shakri ia U Trai, namar nhi tip ha kaba kut ngin ioh ia ka bainong kaba biang.

3. Ngin ioh ban synshar lem bad U

2 TIMOTHY 2:12

lada ngi ïaishah, ngin ïasynshar ruh lem bad u; lada ngin len ïa u, u ruh un len ïa ngi:

Ka jingiaishah hangne ka kren ia ka jingshah shitom. Haba ngi shah shitom na ka bynta jong U, ngin sa ioh ban ia synshar ruh lem bad U.

Jingpynkut: U Petros u ong, ba ynda ngi la shah shitom khyndiat por, U Trai un da pynjanai ia ngi, un da pynskhem, un da pynshaitbor ia ngi.

1 PETROS 5:10

Te U Blei ka jingaiei baroh, uba la khot ïa phi sha kata ka burom bymjukut jong u ha U Khrist, ynda phi la shah shitom khyndiat por, ma u hi keiñ, un da pynjanai ïa phi, un da pynskhem, un da pynshaitbor.

Nga duwai ba U Trai un da pynshaitbor ia ngi iwei pa iwei kum ki bangeit, ba ngi lah ban iaineh haduh kaba kut, kampher watla ngi ia kynduh ia ki jingshah kren beiñ, jingshah rkhie beiñ bad wat ki jingshah lehbeiñ ba bun jaid haba ngi shakri ia U Trai. 

To U Blei un kyrkhu, Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | March 7, 2023