Ka jingiadei jingmut

KA JINGIADEI JINGMUT

Ka jingiadei jingmut ka long kaba donkam haduh katta katta ha ka jingim jong ngi ki briew. La ka long ha ïing ha sem, ha shnong ha thaw, bad kham tam ha ka Balang, para bangeit, para Nongialam bad kumta ter ter.

Ha kine ki sngi ngi iohi ka jur bha ka jingbym iadei jingmut lane ka jingbym ia sngewthuh jingmut, la ka long ha ïing, ha Balang bad kiwei kiwei.

U Apostol Paul u thoh sha ki bangeit ha Philippi u ong, ²To phin pyndap noh ïa ka jingkmen jong nga, ba phin ïalong kajuh ka jingmut, kiba don kajuh ka jingïa-ieit, kiba shi mynsiem hi, kiba ïadei jingmut; ³wat leh ei ei ruh da ka jingïapyneh lane da ka jingsarong; hynrei, da ka jingsngewrit da ñiew phi ïa ki paralok kiba kham bha ban ïa lade; ⁴khlem da khmih uwei pa uwei tang ïa la ki jong hi, hynrei, uwei pa uwei na phi ïa ki jong kiwei pat keiñ. PHILIPPI 2:2‭-‬4

Nangta u ong shuh shuh ha ki nong Korinth, Te nga kyrpad ïa phi, ko parabangeit, da ka kyrteng U Jisu Khrist uba U Trai jong ngi, ba phi baroh phin ïakren ïa kajuh, bad ba kin ym long ki jingïaprat hapdeng jong phi; hynrei, ba phin long ïa kiba la pynjanai lang ha kajuh ka jingmut bad ha kajuh ka jingïapyrkhat. 

1 KORINTH 1:10 

 

U kyrpad ruh ïa ka Ïuodia, bad ïa ka Suntukhi, ban ïalong kajuh ka jingmut ha U Trai. PHILIPPI 4:2

Hangne ngi iohi u Apostol Paul u da don ka jingsngewkhia kaba khraw ban iohi ba ki bangeit kim don ka jingiadei jingmut para ma ki, u kyntu bad u kyrpad ba kin don kata ka jingiadei jingmut para bangeit. 

Lehse ngi lah ban pyrkhat, balei u Apostol Paul u da don kata ka jingpyrkhat (concern) na ka bynta kata? Ka jubab ka long, namar lada kam don ka jingiadei jingmut, yn nym lah satia ban iatrei lang, ban ia iaid lang bad yn nym lah satia ban pyntyllun shaphang ia ka kam U Trai. Phin iohi ia kane, shisien ba ki briew kim iadei jingmut, ka lah eh ban ia iaid lang, trei lang, phin shem suki suki kan don beit ka jingiakhlad lok.

U Amos u buh ia kane ka jingkylli, “Hato ar ngut kin ïaïaid lang lymda ki ïadei jingmut? AMOS 3:3. Ngim lah satia ban ia iaid lang lada ngim don ka jingiadei jingmut. Kumta ka jingkhot ia ngi ki bangeit ka long to ngin ialeh ban poi sha kata ka jingiadei jingmut para bangeit.

Kumno ngi lah ban iadei jingmut?

Ngi la pule shakhmat ia ka PHILIPI 2:2-4 hangne ngi iohi ia ki lynti ki ban wanrah ia ka iadei jingmut.

1. Kiar na ka jingiapyneh.

U Paul u ong, wat leh eiei ruh da ka jingiapyneh. Ka jingiapyneh, ka jingiapynksan la ka jong ka nia ka jutang ka wanrah ia ka jingbym ia sngewthuh jingmut, bad ynda ym ia sngewthuh jingmut, ka wan sa ka jingbym iadei jingmut shuh. Uwei u sngewdei la ka jong ka jingleh, uwei ruh u sngewdei la ka jong ka jingleh, kumta suki suki kim lah shuh ban ia iaid lang, ki hap ban ia iaid noh la ka jong ka jong ka lynti. 

2. Kiar na ka jingsarong

Ka jingsarong ka dei kata kaba kyntiew ialade, kaba sngew ba kaei ba nga leh ka biang beit, kaei ba kiwei ki leh kam long. Kane phin shem suki suki ka wanrah ia ka jingbymiadei jingmut, kan pynlong ba ki briew kin kiar bad kin pyllait met, kumta ka kam jong U Trai kam lah ban iaid shaphrang. 

Ka jingkhot ka long, to ngin kiar na ka jingsarong.

3. Don ka dohnud ba sngewrit

Ka lynti ba bha tam, ka ban wanrah ia ka jingiadei jingmut ka long ka jingsngewrit. Haba baroh arliang ngi don ka jingsngewrit, da kaba suk kan don ka jingiadei jingmut. Dei namar kata kadaw u Paul u ong ia ki bangeit ha Philipi, "To ïoh ïa kane ka jingmut ha phi, kaba la long ruh ha U Khrist Jisu: uba haba u long ha ka dur U Blei, um shym la ñiew eh ïa ka ban bat ban long marryngkat bad U Blei, hynrei, u la pynsuda ïa lade, u da shim ïa ka dur mraw, haba u la jia long ha ka jingsyriem ki briew; te haba la shem ïa u ha ka rukom kum u briew, u la leh rit ïa lade, haba u la jia long uba kohnguh wat haduh ka jingïap, ho-oid, ka jingïap ka diengphna keiñ." 

PHILIPPI 2:5‭-‬8 

Ngi donkam ban ioh ia ka jingmut jong Khrist, haba ngi ioh ia ka jingmut U Khrist, ngi lah ruh ban iadei jingmut para bangeit, para ba ia trei lang.

4. Ñiew ia kiwei kiba kham bha ban ia lade

Ka jingsngew ba ma nga, nga biang tam, ma nga nga lah tam, kiwei kim nang, kiwei kim tip, tang ma nga, kane phin shem kan wanrah ia ka jingbymiadei jingmut. Hynrei lada ngi don ia kata ka dohnud ban ñiew ia kiwei ba ki kham lah ban ia nga, ki kham tip, ki kham stad ban ia nga, kata kan wanrah ia ka jingiadei jingmut. Ki briew kin sngewtynnad ban ia iaid ia ieng, ban iatrei ban ia tuid lang.

Balei ngim lah ban ñiew ia kiwei kiba kham bha ban ia lade? Ka daw ka dei namar ba ngi sheptieng.

5. Pyrkhat na ka bynta ka jingbha kiwei pat, ym tang na ka bynta ia lade

Ha ka dkhot ba 4 Phillipi 2 lynnong u Paul u ong, "khlem da khmih uwei pa uwei tang ïa la ki jong hi, hynrei, uwei pa uwei na phi ïa ki jong kiwei pat keiñ"

Ka jingiadei jingmut kan wan dei haba ngim khmih shuh tang na ka bynta ka jingbha lade, jingbit jingbiang lade, hynrei ban pyrkhat ruh na ka bynta ka jingbha kiwei pat.

U Khrist haba u la wan sha kane ka pyrthei, um shym la wad eh tang na ka bynta ka jingbha lade, hynrei u la wan na ka bynta ka jingbha jong nga jong phi. To ngin ioh ia ka jingmut jong U Khrist ha ngi.

1 PETROS 3:8

Te ha kaba wai noh, to da long baroh kiba ïamut kajuh, kiba ïashah lem, kiba ïa-ieit kum shipara, kiba jemnud, kiba sngewrit: Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | March 4, 2023