Ka dor jong ka ïing shongneh jong ngi
Ka dor jong ka ïing shongneh (bneng) ka dei kaba ym lah shuh ban pyniaryngkat badno badno, ym nym don ïing dulan paki, yn nym don ïing syiem, ïing bakhraw batri ka ban ia ryngkat bad ka.
Ngi lah ban sngewthuh haduh katno ka dor jong ka na kaei ba U Jisu u ong.
ÏOANNIS 14:1-3
¹“Wat khih khuslai na ka dohnud jong phi: to ngeit phi ha U Blei, to ngeit ha nga ruh. ²Ha ka ïing U Kpa jong nga don bun ki pulit shongneh; lymda kumta, nga la ïathuh ha phi; naba ngan sa leit noh ban khreh ka jaka ïa phi. ³Ynda nga la leit noh, bad ba nga la khreh ïa phi ka jaka, ngan wan pat, bad ngan shimti ïa phi ha lade hi, ba ha kaba nga long ma nga, phi ruh phi lah ban long.
Ka temple u Solomon la tei tang hapoh 7 snem (1 SYIEM 6) bad la tei ia ka tang da u briew, katta ruh ki ong ba ka la long kaba itynnad haduh katta katta, mut dur haduh katno kata ka jaka shongneh jong ngi kan long kaba kham itynnad shuh shuh, la pynkhreh mynta palat 2000 snem, bad u nongtei ia ka um u briew, hynrei la tei ia ka da U Blei hi. HEBRU 11:8-10.
Nga ngeit wat haduh mynta ruh U Trai u dang iai pynwan dur, u dang iai pynitynnad ia ka.
U Apostol Ïoannis u la iohi ia ka jingithuhpaw shaphang kane ka ïing shongneh jong ngi kaba long ka bneng, kumno la tei ia ka, bad haba ngin pule hangne ngin sngewthuh haduh katno ka dor jong ka. (Pule JINGPYNPAW 21:18 ter ter
U Jisu kum u nongpynkhreh uba lah iohi lypa ia ka jinglong jong kane ka ïing shongneh, u la ai lypa ia ka pharshi shaphang ka jingkynshew ba la buhrieh bad ruh shaphang u mawlynnai bakordor.
MATHAIOS 23:44; 45-46
U briew uba sngewthuh ia ka dor jong kane ka ïing shongneh, un nym bynnud ban die lut ia kiei kiei baroh ki jong ka doh bad ki jingsngewbha pyrthei tang ban ioh ia kane ka ïing shongneh.
U Jisu u ong, kan myntoi aiu ia ngi ba ngin don lut ia kiei kiei baroh, hynrei ngin duh pat ia katei ka ïing? Kam don jingmyntoi.
MARKOS 8:36
U Apostol Paul kum uta u briew uba sngewthuh ia ka dor jong katei ka ïing shongneh, u ong ba u don ka jingkwah ban leit noh.
PHILIPPI 1:23
Hynrei, nga sngewlyngngoh ha kine baroh ar, haba nga don ka jingkwah ïa ka ban ïoh leit noh bad ban long lem bad U Khrist; naba ka long kham bha shikatdei eh:
U Abraham watla u long u briew uba riewspah, u don lut ia kiei kiei baroh hynrei um shym la tei ka ïing dulan paki ha kane ka pyrthei, u jied ban shong ha i ïing trep, namar u don kata ka jingkwah hir hir ban leit noh sha kata ka nongbah ba kham bha ban ia kane ka pyrthei. HEBRU 11:8-10
Para bangeit baieit, kat katei ka dor jong ka bneng, hato ngin dang nud ban shu lehkai ia ka jingim Khristan, ngin shu pynkhreh malu mala. Em, ka lah dei ia ngi ruh ban ialeh tyngeh bad ban da pynkhreh bha ia lade ha kata ka rukom ba da lei lei ngin nym duh ia ka bad haba ngin leit hangta ruh ngin ia ryngkat dor bad kata ka ïing shongneh jong ngi.
E.g: Haba leit khawai, ngi hap ban khreh bad riam kat kum ka dor jong kata ka jingkhawai.
Katno tam leit ban leit sha kata ka jingkhawai bakhraw jong U Khunlangbrot.
To ngin pynkhreh janai, to ngin ri khuid ia lade, bad to ngin shakri shitrhem ia U tat haduh ba un da wan shaw ia ngi sha kata ka jaka shongneh bad ba ngin ioh ban long lem bad U junom junom.
To U Blei un kyrkhu ia phi, Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 17, 2023
Comments
Post a Comment