Nang ban sngewthuh ia ka sur u Soitan

U Soitan u don la ka buit bad ka sur ban kren bad ban pasiaw ha ki briew, u kren ha ki rukom bapher bapher bad ha ki por bapher bapher, u kren lyngba ki briew, u kren lyngba ki paralok, un pasiaw ruh wat ha ki bangeit bad kiba la jied jong U Blei ban shukor bad pynjot ia ki. (MAT 24:24) Lada ngim nang ban bishar bad ban sngewthuh, ngin shah shukor noh ha kata ka sur jong u.

Follow me on YouTube

Ka Im kam shym la nang ban sngewthuh ba kata ka sur kaba wan kren ha ka mynba ka don ha Kper Eden ka dei ka sur jong u Soitan, kam dei tang ka sur u bseiñ. Kumta haba kam shym la nang ban sngewthuh, ka la shah shukor bad ka la hap noh ha ka pop. JENESIS 3:1 ter ter 

Hangne nga don ia 3 tylli ki point kumno ba ngi dei ban nang ban sngewthuh ia ka sur u Soitan khnang ba ngin nym shah riam bad ngop ha ka sur jong u.

1. Nang ban sngewthuh ia ka sur u Soitan haba phi don ha ka jingkyrduh ne jingthngan.

U Soitan um ju shongthait, u iaid sharum shaneng ha ka khyndew, ong ka Ktien jong U Blei. (JOB 1:6-7 ; 1 PET 5:8) Ym dei ba u khlem kam khlem jam, u don ka kam, bad kata ka long ban tuh, ban pyniap bad ban pynjot ia ki briew. ÏOANNIS 10:10

Kumta ngi hap ban sngewthuh bha ia ka sur jong u, kham tam haba ngi don ha jingkyrduh bad ka jingthngan.

Ngi pule ha ka Bible ngi shem kumno haba U Jisu u la shah jingit 40 sngi bad 40 miet, u la thngan, bad ha kata ka por la wan mih u Soitan ban kren ha U Jisu da kaba ong, “Lada me long U Khun U Blei, to hukum ïa kine ki maw ba kin long ki kpu.” (MATHAÏOS 4:3) Hynrei namar ba U Jisu u sngewthuh ba kata ka sur ka dei ka sur jingpynshoi jong u Soitan, um shym la kohnguh bad leh ia kaei ba u Soitan u ong. (MATHAÏOS 4:4)

U Soitan u lah ruh ban wan pasiaw ha phi haba phi don ha ka jingkyrduh, ka jingduk jingthngan, un phah ia phi ban leh wat ia ka bym dei ban leh, wat ia kata kaba long ka pop. Kaba sngewsih ka long bunsien ki briew haba ki mad ia ka jingkyrduh, jingduk jingthngan, ha ka jaka ban duwai ha U Blei, ki leit tuh bad leh noh da ki buit kiba pasiaw da u Soitan. Kata kam long ka lynti kaba dei.

2. Nang ban sngewthuh ia ka sur u Soitan haba phi don ha ka jingeh bad ka jingpang jingshitom.

U Job u dei u briew uba la mad ia ka jingpang jingshitom bad ki jingeh ba bun jaid ha ka jingim, bad haba kata ka jingeh bad jingpang ka la ban ia u, u Soitan u la wan ban pasiaw bad ban kren ha u lyngba ka tnga jong u hi ban ong ia u Job ba me dei ban tim noh ia U Blei bad iap noh artad.  

JOB 2:9

Ynda kumta ka tnga jong u ka la ong ha u, “Me ïaineh katta ruh ha la ka jingjanai? To kyntait noh ïa U Blei, to ïap noh artad.”

U Job u sngewthuh ba kata ka sur kam dei tang ka sur ba mih na ka lok jong u hynrei kata ka sur ka dei ka sur jong u Soitan, kumta u la pynphai ktien ia ka da kaba ong, “Pha kren kumba kren kawei na ki riewbieit” JOB 2:10

Ah lada u Job um sngewthuh ia ka sur jong u Soitan, un jin da la ong, "Hooid keiñ Kmie ka dei kumba ong ma phi", bad un tim shisha ia U Blei, un jin da la iap bad duh ia ki jingkyrkhu jong U Blei. Hynrei ainguh ia U Blei, u Job u sngewthuh ba kata ka sur ka dei ka sur jong u Soitan, kumta um shym la tim ia U Blei, hynrei u la iaineh beit ha U Blei haduh bakut, kumta namar kata ka jinglong ba iaineh jong u, u la ioh ia ka jingkyrkhu kaba arshah ha kiei kiei baroh. (Pule JOB 42:10-17)

Note: Bun bah ki briew ki duh ia ka jingkyrkhu jong U Blei tang namar ba kim sngewthuh ia ka sur jong u Soitan. Haba ki mad jingeh - jingjynjar, haba ki pang ki shitom, ki ju thut noh ia U Blei da kaba pynshah shkor ia ka sur jong u Soitan ban ong, Oh imat U Blei um ieit ia nga. Oh balei katne nga shakri ia U Blei nga mad kat kane ka jingeh. Oh balei haba nga ai bha ia kawei na ka shiphew bad ki jingai bapher bapher balei nga duk nga jynjar kumne, kan bha ba ngan iehnoh ia une U Blei bad kumta ter ter.

Hynrei nga ong, to ngin ioh ia ka jingmut u Job, ba lada jia katba jia ngan shakri bad iaineh beit ha une U Blei, phin shem hadien phin ioh mad da shisha ia ka jingkyrkhu jong U Blei. Hallelujah 

3. Nang ban sngewthuh ia ka sur u Soitan haba phi jop.

Kumba nga ong ia phi, ba u Soitan um ju shongthait, un ialeh ban buddien ia ki briew, khamtam ia ki bangeit, kumno ban ioh shukor ia ki. Un apthap hangno, naei bad kumno ban ioh lad ban pasiaw bad ban shukor ia une u briew. Lada um iohlad ha ki jingeh, un wan ha ka por ba ki pang ki shitom, lada un iohlad lyngba ki jingpang jingshitom, un wan lyngba ki jingjop ba phi jop (success), la ka dei ka jingjop ha ka jingshakri ne ha kano kano ka bynta jong ka jingjop.

Kane ka la jia ia u Apostol Paul, haba u la ioh ia ki jingialap gospel kiba jop, la ioh ban pynbaptis ia ki briew, la ioh ban seng Balang, u Soitan u wan ban kren ha kata ka rukom ban pynsngew sarong ia u, da kaba u la pyndonkam da kawei ka briew kaba shong ksuid, ban ong ia u Apostol Paul bad ia ki paralok jong u, “Kine ki briew ki long ki shakri jong U Blei U Bahakhlieh Tam eh, kiba pynbna ha phi ïa ka lynti ka jingpynim!” (KI KAM 16:17). Lada u Apostol Paul um sngewthuh ba kata ka dei ka sur u Soitan, un jin da la sngewsarong, un jin da la sngewmeng, bad un jin da la ong, Oh kat ma ngi te ym don shuh, nga ngeit kumta hi un jin da la duh bor noh. Hynrei u Apostol Paul namar ba u sngewthuh ba kata ka sur ka dei ka sur jong u Soitan, um shym la sngew sarong, hynrei u la dumok pynban ia uta u ksuid ba don ha kata ka briew. 

KI KAM 16:18

Ïa kane te ka la leh bun sngi. Hynrei, u Paul, haba u la sngewsatia eh, u la phai dien, bad u la ong ha uta u ksuid, “Nga hukum ïa me ha ka kyrteng U Jisu Khrist ban mih noh na ka.” Bad ha kata kajuh ka por u la mih noh.

Paralok baieit, to ngin nang ban sngewthuh ia ka sur jong u Soitan haba ngi ioh ia ka jingjop ha ka jingim bad ka jingshakri (ministry) jong ngi, namar lada ngim nang ban sngewthuh, ha ka jaka ba ngin nang jop, ngin hiar noh pynban. To ngin long kiba husiar bha ha kane ka bynta.

To U Blei un kyrkhu ia phi. Amen 

 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 12, 2023