Ka jingieit parabangeit ka long ka bynta ba kongsan bha ha ka jingim Khristan. Balei ka jingieit ka long kaba kongsan? Namar ka dei ka jinglong jong U Blei.
1 ÏOANNIS 4:8
Uta u bymieit um ithuh ïa U Blei, naba U Blei u long ka jingieit.
Ïa ka jingïa-ieit parabangeit lane ka jingïa-ieit paralok la hikai da U Jisu Khrist ia ki synran jong u. Lada ngi pule ha ka gospel u Ïoannis ngin shem shibun ki jinghikai bad ki jingkyntu U Jisu shaphang ka jingïa-ieit paralok. ÏOANNIS 13:34,35; 15:12; 17.
U Jisu u ong kane ka long ka hukum bathymmai.
Note: Ka jingïa-ieit parabangeit, ka dei ka hukum. Bad haba ngi pyndep ia kane ka hukum da kaba ia ieit parabangeit, la pynpaw noh sha ka pyrthei ba ngi long da shisha ki synran jong U.
Lada ngi peit ha ka ktien jong U Blei ngi iohi la jan ha baroh ki shithi la kyntu ia ngi ba ngi dei ban ïa-ieit parabangeit, ban ïa-ieit paralok hi.
Ngin ia peit mynta kumno ki Apostol ki kyntu ha kaba iadei bad ka jingïa-ieit parabangeit.
1. Ka jingkyntu U Apostol Paul
ROM 12:9-10
"To ka jingieit kan long kaba khlem arsap. To kiar noh sngewtriem na kata ka basniew, to snoh ha kata ka babha. Ha ka jingïa-ieit parabangeit, to long kiba ïa-ieit noh paralok hi; ha ka jingïañiew burom, to long kiba ïañiew kor paralok hi"
PHILIPPI 2:1-2
¹Lada don, namar kata, kano kano ka jingpyntngen ha U Khrist, lada don kano kano ka jingpynshngain ka jingïa-ieit, lada don kano kano ka jingïasyllok U Mynsiem, lada don kino kino ki jingisynei bajem bad ki jingïasngewsynei, ²to phin pyndap noh ïa ka jingkmen jong nga, ba phin ïalong kajuh ka jingmut, kiba don kajuh ka jingïa-ieit, kiba shi mynsiem hi, kiba ïadei jingmut.
Note: Ngi dei ban don ka juh ka jingïa-ieit, kaba mut mut ym dei ban ieit shiliang.
U Apostol Paul u pyni ia ka jingkmen na ka bynta kitei kiei kiei kiba ki bangeit ki don, hynrei u ong kata kam pat pyndap pura ia ka jingkmen jong nga, ha ka dkhot ba ar u ong, to phin pyndap noh ia ka jingkmen jong nga, ba phin ia long kajuh ka jingmut, kiba don kajuh ka jingïa-ieit. Ka jingiadei jingmut bad ka jingïa-ieit parabangeit, kata ka ban pyndap noh ia ka jingkmen jong u Paul. Nga ngeit kane kan long ruh bad U Blei. Haba U Blei u iohi ba ngi don ka jingiadei jingmut, ka jingïa-ieit parabangeit, kata kan pyndap noh ia ka jingkmen jong U Blei. Amen
EPHESOS 4:1-3
¹Namar kata, nga, u nongsah byndi ha U Trai, nga kyrpad ïa phi ban ïaid kumba dei ïa kata ka jingkhot da kaba la khot ïa phi, ²da ka jingsngewrit bad da ka jingjemnud baroh, da ka jingïaishah-slem, da kaba ïaishah paralok hi ha ka jingïa-ieit; ³da kaba ïaleh minot ban bat ïa ka jinglong kawei jong U Mynsiem ha ka jingkhum ka jingsuk.
Note: Ka jingieit bad ka jinglong kawei kadei kaba ngi hap ban bat. Kaba mut lada ngim bat, kan lait, kan jah, bad kan duh noh. Ngi hap ban bat, ong u Apostol Paul.
U nongthoh sha ki Hebru u ong, "To kan ïaineh ka jingïa-ieit parabangeit." HEBRU 13:1. Kaba mut ba ka jingia-ieit parabangeit ka dei ban iaineh, ban iaisah, kam dei ban duh lane ban jah noh shiteng por.
Haba nga puson ia ka jingïa-ieit parabangeit mynshuwa bad mynta ka lah iapher shibun. Mynta nga i ba ka lah hiar shibun shah ban ia kaba ngi don mynshuwa. Ha ka por mynshuwa kata ka jingïa-ieit parabangeit ka da khia haduh katta katta, hynrei mynta nga shem ba ka lah kham sting. Ngam ong ba kam don shuh, ka don, hynrei ka lah kham sting.
Ha ka por mynshuwa haba leit jingiaseng shano shano ynda lah poi ka sngi ban ia khlad noh, ngi da bynnud, ngi da iam bad jaw ummat, namar bym kwah shuh ban ia khlad namar kata ka jingieit parabangeit ka khlaiñ bha. Nangta ynda ia khlad ruh ki da ia leit on lynti shaduh station haduh ban da kiew kali, haduh ban da iaid ka kali. Hynrei mynta lah kham duna kata ka leit on lynti, sa tang tyngkhat hangno, mynno re.
Ngi donkam ban iaibat ia kane ka jingïa-ieit parabangeit. Ym da kata ka jingieit ba arsap, hynrei da ka jingieit ba sngur kum shi mynsiem hi kumba ong u Apostol Paul ha ka PHILIPI 2:1-2 ba ngi la pule haneng.
KOLOSSAI 3:12-14
¹²Namar kata, kum kiba la jied, ki bakhuid bad ba-ieit eh jong U Blei, to phin ïakup ïa ka dohnud ka jingsngewsynei, ka jingsbun, ka jingsngewrit, ka jingjemnud, ka jingïaishah-slem; ¹³da kaba ïaishah paralok, bad da kaba ïamap paralok, lada uno uno u don ka jingmudui ïano ïano; kumba U Trai u la map ïa phi, kumta ruh, to leh ma phi; ¹⁴bad nalor kine kiei kiei baroh, to phin kup ïa ka jingïa-ieit, kaba long ka panpoh jong ka jingpynjanai.
Note: Nalor kitei baroh…to phin kup ïa ka jingïa-ieit. Kaba mut kitei baroh kiba ngi la leh haneng, lada kam don ka jingïa-ieit, ki dang long incomplete. Dei ka jingieit ka ban pyndap pura (complete) ia kiei kiei baroh. Amen
Ha ka shithi sha ki Nong Korinth la thoh ba ka jingieit ka long kaba kham donkam ban ia kiwei pat. 1 KORINTH 13:1-4
2. Ka jingkyntu U Apostol Petros
Kumno u Apostol Petros u thoh ha kaba iadei bad ka jingïa-ieit parabangeit.
1 PETROS 1:22
Haba phi la pynkhuid ïa ki mynsiem jong phi ha kaba kohnguh ïa ka jingshisha da U Mynsiem, ïa ka ban ïa-ieit parabangeit khlem arsap, to phin da ïa-ieit shitrhem paralok hi naduh ka dohnud:
Note: Khlem arsap, shitrhem, naduh ka dohnud. Ym tang na-jrong na-sla.
U Apostol Petros u ong, Haba phi la pynkhuid ïa ki mynsiem, phi la kohnguh ia ka jingshisha. Kaba sah nangta ka dei sa tang ka jingïa-ieit parabangeit.
Ai kane ruh kan long na ka bynta jong ngi ki para bangeit ha ka Balang, ba ngin don ia kata ka jingïa-ieit parabangeit kaba khlem arsap.
3. Ka jingkyntu U Apostol Ïoannis
Ia u Apostol Ïoannis la tip ia u kum u Apostol ka jingieit. Haba ngi pule ha ki shithi u Ïoannis ngi shem bun ba u kren shaphang ka jingieit. Dei ha ka shithi u Ïoannis la batai shaphang ka jinglong jong U Blei ba U long ka jingieit. Bad u ong ba lada ngim ieit, ngim ithuh lane ngim long na U Blei.
1 ÏOANNIS 4:7-8
⁷Ko hep ba-ieit, to ngin ïa-ieit paralok hi, naba ka jingieit ka long na U Blei; te uwei pa uwei baroh uba ieit, la kha ïa u na U Blei, bad u ithuh ïa U Blei. ⁸Uta u bymieit um ithuh ïa U Blei, naba U Blei u long ka jingieit.
U Apostol Ïoannis u kyntu namarkata, kumba U Blei u la ieit ia ngi, ngi ruh ka dei ban ïa-ieit noh paralok hi 1 ÏOANNIS 4:11
Ha ka dkhot ba 20 u ong, Lada uno uno ruh u ong, “Nga ieit ïa U Blei”, bad u shun ïa la u parabangeit u long uba lamler; namar uta u bymieit ïa la u parabangeit ïa uba u la ïohi, um lah ban ieit ïa U Blei ïa uba um shym la ïohi. 1 ÏOANNIS 4:20
Ha kawei pat ka bynta u ong, uta u bym ieit ia la u para bangeit bad uba shun pynban ia u, u long u nongshohnoh briew. 1 ÏOANNIS 3:15
4. Ka jingkyntu U Apostol Judah
U Judah haba u thoh shaphang ka jingieit u thoh ha ka rukom jong ka jingduwai ba U Blei un pynman bun, un pynroi kyrhai.
JUDAH 1:1-2
¹U Judah, u shakri U Jisu Khrist, bad u para u Jakob, Ha kita ïa kiba la khot, kiba ieit ha U Blei U Kpa, bad ïa kiba la ri noh khnang ïa U Jisu Khrist: ²Ïa ka jingisynei ha phi, bad ka jingsuk bad ka jingieit to ai ba yn pynman bun.
Jingpynkut & Jingkyntu: To ngin ioh ia ka nuksa na ka Balang ha Thessaloni. Ka Balang ha Thessaloni ka dei ka Balang kaba la ioh jinghikai na U Blei ban don ia kata ka jingia-ieit parabangeit kaba khlem arsap.
1 THESSALONI 4:9
Hynrei, shaphang ka jingïa-ieit parabangeit phim donkam ban thoh ha phi: namar ma phi hi, phi long kiba la ïoh hikai na U Blei keiñ ïa ka ban ïa-ieit paralok.
U Paul u ong, ym da donkam ban hikai ia phi, namar da lade hi phi la nang ban iaieit, namar ba phi la ioh jinghikai na U Blei. Ngi donkam ban bud ia kane ka nuksa jong ka Balang ha Thessaloni.
To U Blei un kyrkhu bad pynroi kyrhai ha ngi ia ka jingieit jong u ba ngi lah ban ïa-ieit parabangeit. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 7, 2023
Comments
Post a Comment