Hato phi la jaw syep ???

Hato phi la jaw syep ?

Mynne ka janmiet katba nga dang iaid lynti ban wan phai na ka jingleit ministry na Riatsamthiah, U Trai u la ai ia nga ia kane ka khubor kaba long ha ka dur ka jingkylli, bad kata ka long "Hato phi la jaw syep na ka bynta U Trai?" 

Kane ka long ka jingkylli ba ngi hap ban kylli ia lade shimet shimet, katno nga la jaw syep na ka bynta U Trai.

Ngi im ha ki sngi ha kaba ka pyrthei ka beh tang ia kaei kaei kaba suk, kim da kham sngewtynnad ia kaei kaei kaba kham eh, kata ka long ka pyrthei ba ngi im mynta. Kumta ngi shem wat ha ka rukom shakri Blei ruh ka la long kumta, ki briew kim da sngewtynnad ban shah shitom, bad ban mih syep ha kaba shakri ia U Blei, ki la kwah tang ban shakri jem met beit, da sngew kwah leit jingiaseng leit, da sngewthait, thiah noh ha ïing, lada leit jingiaseng ruh shisien, bad arsien ha ka Sunday ka lah dei maximum, kim kwah shuh ban pynmih syep ha ka jingshakri ia U Trai.

U Jisu, tang ba ngin im ma ngi u la jaw syep ong ka Ktien jong U Blei, bad kata ka syep ba U Jisu u la jaw kam dei satia kaba malu mala, hynrei ka syep kaba U Jisu u la jaw ka la long kum ka snam. Hynrei watla katta ruh kam pat biang, u la jaw ruh sa ka snam ong ka Ktien U Blei.

LOUKAS 22:39-46 Ha kper Gethsemane ha ka por ba u la duwai, ka syep ka la jaw kum ka snam.

Nangta haba la kem ia U bad la rai pynrem ia U, la ialam noh ban sah narphna, bad ha shi lynter lynti ban leit sha u lum Kalbari u la shah sympat da ki shabuk ha baroh kawei ka met jong U, ha kaba ka met jong U ka la phlei snam lut, bad ym tang katta, hynrei haduh ba un da kiew halor ka diengphna ruh u dang iai jaw snam na ka bynta jong ngi. ÏOANNIS 19:32-34

Pyrkhat, haduh katne U Jisu u la jaw bad syep bad snam tang ba ngin im ma ngi, ngi pat ngi dang tyngkai ia lade, ngim kwah ban jaw syep wat tang khyndiat ruh na ka bynta ka jingshakri ia U Trai. Kaba sngewsih ka long lada ngi thew ia ka jingjaw syep jong ngi, ngin shem ba ngi dang jaw syep kham bun na ka bynta kiwei pat ki daw, ban ia kaba ngi jaw syep ha kaba shakri ia U Trai.

*** Ngi dang kham jaw syep bun ha kaba          leh fitness ia ka met ban ia ha kaba              shakri ia U Trai.

*** Ngi dang kham jaw syep bun ha ka              ban pyntbit ia lade ban ioh ia ki 

      medals ban ia ha kaba shakri ia U Trai.

Para bangeit baieit, U Jisu um shym la tyngkai na ka bynta jong ngi, U la jaw syep kum ka snam, hato kam dei ia ngi ruh ba ngin jaw syep lem khyndiat na ka bynta ka jingshakri ia U? Peit ia ka nuksa na kiba bun ki synran jong U ki la ia jaw syep ha ka jingshakri ia U Trai, don ruh kiba la jaw wat ka snam ruh na ka bynta ka jingshakri, ka la dei ia ngi ruh ban shakri shitrhem ia U Trai bad ka kam jong U, kampher wat la ka dei ban jaw syep jaw syar ruh.

Nga duwai ba U Blei un pynthymmai bor ia ngi, ba ngi lah ban leh kumta, Amen 

© Jester Mawlong | June 18, 2023 | 6:35 pm