Balei ba ngi dei ban da sngew skhem bha ia kaei kaba ngi ngeit? Namar ka jingsngew skhem ka iarap ia ngi ba ngi lah ban ieng skhem.
HEBRU 11:1
Te ka jingngeit ka long kata ka jingsngew skhem ïa kita kiei kiei ïa kiba ngi kyrmen, kata ka jingtynjuh ïa kita kiei kiei ki bymïohi.
Ka long kaba donkam ba ngin pynthikna ba ngi la sngewskhem ia kaei kaba ngi ngeit. Ka jingbym sngewskhem ia kaei kaba ngi ngeit ka pynlong ban artatien, ban synjor ka jingngeit bad wat ban phaidien ruh na ka jingngeit.
Balei ki briew ki leh tlot, ki artatien? Balei ki phaidien wat haba ki lah ngeit? Ka dei namar ka jingbym sngewskhem ia ka jingngeit kaba ki lah ngeit. Ki briew kiba lah sngew skhem ia kaei kaba ki ngeit kim khih la iap la im ruh.
U Joshua uba la sngew skhem bha ia kaei kaba u ngeit u la rai kut ban iaineh ha kata kaba u ngeit. U ong ia kita kiwei, lada phim idei ban shakri ia U Trai, to jied ma phi, iano phin shakri, hynrei ma nga bad ka ïing jong nga ngin shakri ia U Trai.
JOSHUA 24:15
Bad lada kam idei ïa phi ban shakri ïa U Trai, to jied phi ha kane ka sngi ïano phin shakri; ïa kita kiba ki kpa jong phi ki la shakri kiba la don sha shiliang kata ka Wah, lane ïa kita ki blei ki Amor, kiba phi shong ha ka ri jong ki: hynrei, ma nga bad ka ïing jong nga ngin shakri ïa U Trai.”
U Joshua u nud ban ong ia kine ki kyntien ka dei namar ba u lah sngew skhem 100 na ka 100 ia kaei kaba u ngeit, u ong ia kiwei lada phi phim sngew dei, to leh katba phi mon, hynrei nga ngan ngeit bad iaineh ha kane ka jingngeit ha U Blei ba im bad ba shisha.
Nangta ngi iohi ruh shaphang u Apostol Paul, kumno ba ma u ruh u don kata ka jingsngewskhem ia kaei kaba u ngeit. Ha ka shithi sha u Timothy u ong, Namar kane ka daw, nga shah ruh ïa kine kiei kiei: pynban, ngam sngewlehrain; namar nga la ithuh ïa uta ha uba nga la ngeit, bad nga ngeit skhem ba u long uba lah ban da ïa kata kaba nga la aiti ha u hamar kata ka sngi. 2 TIMOTHI 1:12
NOTE: Ka jingsngew skhem ia kaei kaba ngi ngeit ka pynlah ia ngi ba ngin shah ia kiei kiei baroh.
Kumta ha ka shithi sha ki Nong Rom 8:35 ter ter u la ong ba ka lanot lane ka shipa, jingduk jingthngan, etc kim lah ban pyniakhlad ia nga na kata ka jingieit kaba ha U Khrist Jisu. Hallelujah
ROM 8:35-39
³⁵Uei u ban pynïakhlad noh ïa ngi na kata ka jingieit ka jong U Khrist? ka lanot lane ka shipa, lane ka jingpynshitom beiñ, lane ka jingthngan, lane ka jinglyngkhuit, lane ka jingma, lane ka waitlam? ³⁶Kat kumba la thoh: “Na ka bynta jong me la dang pynïap ïa ngi baroh shi sngi, la ñiew ïa ngi kum ki langbrot ïa ka jingpynïap.” ³⁷Hynrei, ha kine kiei kiei baroh keiñ ngi jop thiaw da uta uba la ieit ïa ngi. ³⁸Namar nga ngeit skhem ba ka jingïap, lymne ka jingim, lymne ki angel, lymne ki nongsynshar, lymne kiba don bor, lymne kiei kiei ruh kiba long mynta, lymne kiei kiei ruh ki ban sa long, ³⁹lymne ka jingjrong, lymne ka jingjylliew, lymne kaei kaei ruh kawei pat ka jingthaw, kan ym lah keiñ ban pynïakhlad noh ïa ngi na kata ka jingieit ka jong U Blei kaba ha U Khrist Jisu uba U Trai jong ngi.
Ka jingsngewskhem ia kaei kaba ngi ngeit ka pynlong ba ngi lah ban ieng skhem wat hapdeng kiba bun ki jingeh, jingialeh ha ka jingim.
Ngi iohi ruh shaphang u Shadrak, u Meshak bad u Abednego, kumno haba u syiem Nebukhadnessar u la shna ia kata ka dur blei ksiar bad la hukum ia baroh ki briew ha Babilon ban mane ia kata ka dur blei ksiar, bad kat ki bym mane yn bret sha ka lawar ding, hynrei ngi shem ba kine lai ngut kim shym la mane dem satia ia kata ka dur blei jong u Nebukhadnessar, wat haba ki iohi ia ka ding ba la pynrhem hynniew shah, hynrei kim shym la sheptieng, namar ba ki don kata ka jingsngew skhem ba uta U Blei uba ki la ngeit u lah ban iada bad ban pyllait im ia ki wat na kata ka lawar ding. DANIEL 3:1-30
Jingkyntu: To ngin da sngew skhem ia kaei kaba ngi ngeit khnang ba ngi lah ban iaineh haduh ka jingwan U Trai.
U Blei un kyrkhu, Amen
© Jester Mawlong | June 23, 2023
Comments
Post a Comment