U Shipai babha

U Shipai babha

Text : 2 TIMOTHY 2:1-13

Ha kane ka lynnong, u Apostol Paul u kyntu ia U Timothy ba u dei ban long kum u shipai. Bad haba ngi pule ter ter ngi iohi u batai kumno ba kum uta u shipai babha u dei ban long.

1. U shipai u donkam ban pynkhlaiñ shuwa ia lade.

Dkhot 1: "Ma me, namar kata, ko khun jong nga, to pynkhlaiñ ïa lade ha ka jingaiei kaba ha U Khrist Jisu."

Ka jingkhlaiñ ka dei ka bynta ba kongsan ha ka jingim jong u shipai. Kiba tlot kim lah ban long shipai. Dei namar kata ka daw U Blei u kyntu barobor ia ki shipai jong u ba kin long kiba khlaiñ.

JOSHUA 1:6-9

EPHESOS 6:10

Kumno ngin pynkhlaiñ?

1) Ktien U Blei

2) Ka jingiadei ba jan bad U Blei lyngba ki jingduwai, jingmane, etc.

 

2. U shipai u hap ban shah shitom.

Dkhot 3: "Ma me, namar kata, to shah shitom bad nga, kum u shipai babha U Jisu Khrist."

U shipai u dei ban don ka dohnud kaba long la kloi ban shah shitom, lada ngim treh ban shah shitom na ka bynta jong u, na ka bynta ka gospel bad ka kam jong U, ngin nym lah ban long ki shipai babha. Ngi lah ban long tang ki shipai bymler khaw.

Bun bah ki briew ki kwah ban ioh ia ka nam (title) shipai babha, hynrei ki bym kwah pat ban shah shitom wat tang khyndiat ruh na ka bynta ka gospel U Khrist. Ka jingkhot ka long, to ngin long ki shipai babha jong U Trai da kaba ngi long lakloi ban shah shitom na ka bynta U Khrist.

3. U shipai u hap ban im ban pynsngewbha ia uta uba la thung shipai ia u.

Dkhot 4: "Ym don uba pynsuh sat ïa lade da kiei kiei ki jong kane ka jingim haba u leit ïaleh thma; khnang ba un ïoh pynsngewbha ïa uta uba la thung shipai ïa u."

Ka thong jong u shipai ka long katba lah ban pynsngewbha ia uta uba la thung shipai ia u. Kumjuh ruh ma ngi kum kita ki shipai ba kynja mynsiem, ngi dei ban don ka thong ia ka ban pynsngewbha ia uta uba la thung shipai ia ngi ba long U Trai Jisu Khrist. Hallelujah

U Paul u ong, ngi pynlong ia ka thong ban pynsngewbha ia U Trai. 

2 KORINTH 5:9

Naba kumta ruh, ngi ïaleh tyngeh noh ban long kiba pynsngewbha eh ïa u, la ngi ïashong sah lane ngi ïaleit noh;

Ha ka NIV ka ong, So we make it our goal to please him, whether we are at home in the body or away from it. 2 CORINTHIANS 5:9 NIV

Ngi ruh ngi donkam ban don ka thong, bad ban ialeh tyngeh kumno ban long kiba pynsngewbha ia U. Amen

4. U shipai u hap ban sngewthuh ia la ka kamram.

Kum u shipai u hap ban sngewthuh kaei ka kamram ba ha khmat eh jong u, bad ia kata u hap ban pyndep hok. Lada ngi peit bniah ia ka kamram u shipai ngi shem ia kine harum:

1) Ban iada bad pyllaitim ia kiwei. v.8-10

Dkhot 10: "Namar kata, nga ïaishah ïa kiei kiei baroh na ka bynta kiba la jied, ba ma ki ruh kin ïoh ïa ka jingpynim kaba ha U Khrist Jisu, lem bad ka burom bymjukut."

 

U Soitan kum u nongshun, un ialeh thma pyrshah ia ki bangeit, ia ki mynsiem bakordor, ban pyniap, ban pynjot. Ka dei ka kamram jong ngi kum ki shipai babha ban iada bad pyllaitim ia ki na ki kti u Soitan.

IOANNIS 10:10

1 PETROS 5:8-9

Ngim dei ban pyllait jingkitkhlieh, ka kamram ka dei ka jong ngi. Lada ngim iada, lada ngim pyllait, U Blei un sa pan jingkheiñ na ngi. EZEKIEL 33

JINGPYNKUT:

1) Lada ngi iap ha ka thma - Ngin im lem bad U.

2) Lada ngi iaishah ia ki jingeh na ka bynta jong U, ngin ia synshar ruh lem bad U.

3) Lada ngim len ia U wat hapdeng ki jingeh, bad jingshah pynshitom beiñ, U ruh un nym len ia ngi ha khmat U Kpa ba ha bneng.

4) Lada ngi long kiba iaineh ha U, U ruh un long uba iaineh ha ngi.

To U Blei un kyrkhu ia phi baroh, Amen 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | June 7, 2023