Jop pyrshah ïa ka jingshah rkhie beiñ
U Joseph kum u khynnah samla u la iohi ïa ka jingithuhpaw ba un sa long u nongsynshar ha kawei ka sngi, ha kaba wat ka kmie, u kpa bad ki hynmen jong ki kin sa wan ban dem ha khmat jong u. Bad ïa kane u la iohipaw haduh arsien, bad u la iathuh ïa kane ka jingithuhpaw ha la ki jong ki hynmen, pynban ki hynmen jong u ki la ïa rkhie beiñ ïa u. Jenesis 37:5-10. Hynrei kaba sngewtynnad ka long ba u Joseph u la jop pyrshah ïa kata ka jingshah rkhie beiñ ha la ki hynmen. Bad ha kaba kut u la poi shisha sha ka thong ha kaba u la kylla long u nongsynshar ha Ijipt kham hapoh ïa u syiem Pharaoh, nga lah ban ong kum u Prime Minister ka ri Ijipt. Jenesis 41:37 Bad ha kane ka por ki hynmen ki la wan shisha ban dem ban kyrpad jingiarap na u Joseph. Jenesis 42:1 ter ter.
Shu mut dur, lada u Joseph un sangeh noh ha kata ka por ba ki hynmen jong u ki ïa rkhie beiñ ïa u, shaei un poi, un shu kut ka jingim jong u tang kum u riew madan, hynrei ainguh ïa U Blei ba u Joseph u la jop pyrshah ïa kata ka jingshah rkhie beiñ bad u la poi sha ka thong jong ka jingjop.
Nangta ngi iohi sa uwei pat u khynnah samla bad uta u dei u David, une ruh kum u khynnah samla rit, u la mad ia ka jingshah rkhie beiñ ha ka jingim jong u, ha kaba ki hynmen bad kiwei pat ki la ïa rkhie beiñ ïa u ha ka por ba u pynpaw ba u kwah ban leit ialeh pynshah ia u Goliath bad ki Philistia. 1 Samuel 17:1…; 28-33
Hynrei u David ruh u la jop pyrshah ïa kata ka jingshah rkhie beiñ, bad u la iaid shaphrang bad u la poi sha ka thong jong ka jingjop ha ka jingim. U la jop ia u Goliath bad u la kylla long u syiem uba khraw ha Israel.
Shuh shuh ngi iohi sa uwei u samla uba la shah rkhie beiñ ha ki briew bad uta pat u dei u Nehemiah. U Nehemiah u briew jong U Blei haba u mut ban tei pat ia ka kynroh Jerusalem kaba la shah pyntwa lut ploiñ ha u syiem Nebukhadnessar u la shah rkhie beiñ ha ki briew sawdong jong u, ki la pynduh mynsiem ia u shibun eh, hynrei u Nehemiah u la jop pyrshah ïa kata ka jingshah rkhie beiñ bad hadien ngi shem ba u Nehemiah u la lah ban pyndep ban tei pat ia kata ka kynroh Jerusalem.
Ha ka lynnong ba saw phin shem ia kane ka jingrkhie beiñ jong ki briew ia u Nehemiah.
NEHEMAÏAH 4:1-3
¹Hynrei, haba u Sanballat u la ïohsngew ba ngi la ïatei ïa ka kynroh, u la sngewbitar, bad u la ing khait, bad u la krenbeiñ ïa ki Jiw. ²Bad u la kren ha khmat la ki para bad ïa ka kynhun shipai Samaria, bad u la ong, “Kine ki Jiw ba khlem bor ki leh aïu? Kin ker kut ïa lade? Kin kñia? Kin pyndep ha kawei ka sngi? Kin khyllie pat ïa ki maw na kine ki lymbher tait, haba ki la ing ruh?” ³Bad u Tobiah u nong Ammon u la don hajan jong u, bad u la ong, “Wat ïa kata kaba ki tei, lada u ksar un kiew, un pyntwa noh ïa ka kynroh maw jong ki.”
Ki la rkhie beiñ haduh ban ong ba lada kiew wat tang u ksar (mrad rit) ruh kata ka kynroh u Nehemiah kan twa noh. La kren beiñ la insult shikatdei eh, hynrei u Nehemiah um patiaw u la iaid shaphrang bad u la jop. Hallelujah!
Kaba khadduh ngin iohi sa uwei pat u briew u ba la mad ia ka jingshah rkhie beiñ bad uba la jop pyrshah ïa kata, bad uta u dei u Nongpynim jong ngi U Jisu Khrist.
Ha ka Gospel u Mathaios 9:23-25 la iathuh ia ngi shaphang ka jingshah rkhie beiñ jong U, haba u leit ha ka ïing jong kawei ka briew kaba iap bad ba u ong kam pat iap hynrei ka iohthiah, da kata ka jingmut ba un pynim pat ia ka, hynrei ki briew sawdong kata ka ïing ki la ia rkhie beiñ ïa u ong ka Ktien jong U Blei, hynrei U Jisu u la jop ia kata ka jingshah rkhie beiñ bad u la pynim pat ia kata ka khynnah kaba la iap.
Ym tang shisien, hynrei U Jisu u la iai mad ia ka jingshah rkhie beiñ na ka por sha ka por. Ngi iohi shuh shuh ha ka Gospel u Ïoannis ha ka por ba U Jisu u ong ba kin sa pyntwa ia kane ka temple, hynrei lai sngi ngan pynieng pat ia ka (kaba long ka dur lane ka pharshi ia ka jingiap bad ka jingmihpat jong u), ki briew kham tam ki Jiw lane ki Pharisi ki la ïa rkhie beiñ ïa u.
ÏOANNIS 2:19-20
¹⁹U Jisu u la ïathuh bad u la ong ha ki, “Phin pynjot ïa kane ka templ, te lai sngi ngan pynïeng pat ïa ka.” ²⁰Ynda kumta, kita ki Jiw ki la ïa-ong, “Sawphew hynriew snem shu dang tei ïa kane ka templ, ma me te, lai sngi men pynïeng pat ïa ka?”
Kine ki briew ki la ïa rkhie beiñ ïa U Jisu ban ong, sawphew hynriew snem ka shim por ban tei ia kane ka temple, hynrei me te lai sngi men pynieng pat ïa ka? Ka long ka bym lah long bad ka bymlah ngeit ha khmat jong ki, kumta ki la ïa rkhie beiñ ïa u haba u ong kumta, pynban kaba sngewtynnad U Jisu ruh um shym la pynsngap ia kata ka jingkren beiñ lane ka jingrkhie beiñ jong ki, u la iaid shaphrang bad u la jop, ha kaba u la mihpat shisha tang ha kaba lai ka sngi. Hallelujah!
Ngi iohi hangne kumno haba kita kiba shah rkhie beiñ ki la iaid shaphrang bad ha kaba kut ngi iohi ia ka jingjop jong ki, kata ka jingrkhie beiñ jong ki briew kam lah satia ban bat ia kita kiba don ka jingkut jingmut ban iaid shaphrang.
Ai kane kan long ka jinghikai na ka bynta jong ngi ruh, ba ngi dei ban jop pyrshah ïa ka jingshah rkhie beiñ.
Lehse don napdeng jong phi, phi don ka jingkhot jong U Blei, phi don ka jingiohipaw ba phin long eiei, la ka long ha kano kano ka bynta, kham tam ha ka jingshakri (ministry) ha ka kam U Trai, hynrei phi mad ia ka jingshah rkhie beiñ, la ka long ha la ki jong kiba ha ïing, ki paralok ne mano mano, bad phi sdang ban leh thait noh, phi kwah ban sangeh noh, phi ong oh ngam poi shano shano, nga ong ïa phi sdang biang, jop pyrshah ia ka jingshah rkhie beiñ bad phin shem ba U Blei un pyndonkam borbah ia phi kumba u la leh ia u Joseph bad u David.
Kiba bun bah ki briew jong U Blei ha kaba sdang ki la shah rkhie beiñ, oh kum une un poi shano, oh uba kumne uba kumtai, hynrei haba ki nud ban ieng wat hapdeng jong kata ka jingshah rkhie beiñ bad ki jop ia ka, ki la poi shisha sha ka thong bad ki la kylla long ki briew kiba khraw jong U Blei haduh kine ki sngi. U Blei ruh un leh kumta ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester L Mawlong | Nov 29, 2024
Comments
Post a Comment