U Blei u pyndonkam ïa kiba shlur

U Blei U pyndonkam ïa kiba shlur 

Sngap ruh ha YouTube da kaba click hangne 👈

U Blei um da peit eh phi duk, phi riewspah, phi rit phi khraw, phi bieit phi stad, ne uba kumno phi long, hynrei u peit phi don ne em ka jingshlur, phi long ne em uba shynrang mynsiem. Bad ïa kita kiba shlur bad kiba shynrang mynsiem U Blei u jied bad u pyndonkam na ka bynta jong U.

Ngi iohi ïa kane na ka Ktien jong U Blei, kiba bun hi kiba U Blei u pyndonkam ki dei ki briew kiba shlur, kam pher ki wan na ka background kaba kumno.

Ngin ia peit katto katne ki nuksa na ka Ktien jong U Blei.

1. U Gideon

Ha ka por ba ki khun Israel ki la leh pop ia U Blei, U Blei u la aiti noh ia ki Israel ha ka kti ki Midian, bad kine ki Nong Midian ki la pynjynjar, pynsohsat ïa ki khun Israel haduh ba ki khun Israel ki la lynniar bad kyrpad ha U Trai ba un pyllait noh ia ki.

NONGBISHAR 6:6

Ki Israel te ki la shipa eh na ka bynta ki Midian: bad ki khun Israel ki la lynñiar ha U Trai.

Ha kata ka por U Blei u la iohsngew ia ka jingkyang bad jinglynniar kyrpad ki khun Israel, kumta U Blei u la sdang ban wad ia u briew u ban leit ban pyllait noh ia ki Israel na ka kti ki Midian, bad ha kata ka jingwad, U Blei u la shem ia uwei u samla uba kyrteng u Gideon katba u dang shoh kew ha kawei ka jaka. (dkhot 11)

NONGBISHAR 6:12

Te u angel U Trai u la paw ha u, bad u la ong ha u, “U Trai u don ryngkat bad me, me u briew uba shynrang.” 

Hangne ngi iohi U Blei haba u la ia shem bad u Gideon, u la ong ia u, ‘me u briew ba shynrang’. Ka ktien ‘shynrang’ ka kren ia ka jingshlur, kaba mut ‘me u briew uba shlur’. 

Haba ngi pule ha ki dkhot ba kham sha khmat, ngi iohi kumno ba u Gideon u la sdang ban ai daw da kumne kumtai, da kaba ong ia U Blei, ba nga wan na ka longïing ba duk tam, nga long uba rit tam bad kumta ter ter. (U Blei um shym ong satia ia u Gideon, oh me long uba duk khie shong noh ha ïing, ngam lah ban pyndonkam ia me, lane oh me long uba rit, khie shong noh ha ïing, ngam lah ban pyndonkam ia me). Hynrei U Blei u ong ia u, khie leit, me lah beit ban pyllait im ia ki Israel na ka kti ki Midian namar me long u briew uba shlur.

NONGBISHAR 6:15-16

¹⁵U te u la ong ha U, “A Trai, kumno ngan pyllait ïa ki Israel? ha khmih, ka kur jong nga ka baduk tam ha Manasseh, bad nga ruh u barit tam ha ka ïing u kpa jong nga.” ¹⁶U Trai te U la ong ha u, “Shisha ngan long lem bad me, bad men jop ïa ki Midian kum ïa uwei u briew.” 

Hadien shibun ki jingaidaw, u Gideon u la kohnguh bad leit, kumta ngi iohi kumno ba U Blei u la pyndonkam bor bah ia u Gideon, bad da shisha u la jop pyrshah ia ki Midian bad u la pyllaitluid ia ki Israel na ka kti jong ki Midian.

Hangne ngi iohi ba ka jingduk, jingrit, jingbieit, lane kaba kumno kumno, kam lah satia ban khang lad ia ka jingpyndonkam jong U Blei, haba ngi long kiba shlur. 

U Blei um peit phi duk, phi rit, phi bieit, phi riewspah, phi khraw, phi stad, hynrei u peit phi don ne em ka jingshlur, phi don ne em kata ka jinglong shynrang? Hooid phi lah ba long kynthei, khynnah, ne tymmen hynrei haba phi don ka jingshlur, U Blei un ong ia phi ba phi long ‘uba/kaba shynrang’. Bad haba ngi long kiba shlur bad kiba shynrang, U Blei un pyndonkam beit ia ngi. Hallelujah!

2. U David 

Ha ka por ba ki khun Israel ki don ia ka jingialeh thma pyrshah ia ki Philistia, ngi iohi haba uwei u radbah (giant) na kita ki shipai Philistia uba kyrteng u Goliath u la mih ban kob (challenge) bun bun sngi ba ki Israel kin jied ia u briew u ban nud ban ia khun bad u, bad ha kata ka jingkob jong u, baroh ki shipai ba kynsai jong ki Israel ki la sheptieng bad ki la khynñiuh naduh khlieh haduh kjat, haduh ba ki la hap ban buhrieh ia lade, ym don ba nud ban mih pyrshah ia uta u radbah Goliath. Hynrei ka la jia ba u David u leit poi shata ban leit jngoh ia la ki hynmen kiba long ki shapai Israel kiba don shata, u la iohi ia uta u radbah Goliath ba u beiñ, u kob pyrshah ia ki shipai Israel, ha kata ka por la pyndap ia u David da ka jingbitar pyrshah ia uta u Philistia, ban pynlyngkot ia ka jingiathuh, u David u la pan jingbit, ban leit iakhun pyrshah ia uta u Philistia, bad haba u la ioh jingbit u la mih ban leit iakhun, bad ngi shem ba u David u la jop pyrshah ia uta u radbah Goliath bad ia ki shipai Philistia baroh. Hallelujah!        1 Samuel 17:1-58

Ngi iohi hangne kumno U Blei u la pyndonkam ia u David uba long tang u khynnah ap langbrot, u bym shym la ioh training naei naei ruh ha ka kam shipai, hynrei kaei ba u David u don, ka dei ka jingshlur, bad haba U Blei u iohi ia kata ka jingshlur jong u, kata ka jinglong ba shynrang jong u, U la pyndonkam borbah ia u, palat ban ia kaba ki briew ki lah ban mut dur. Hallelujah!

3. U Joshua 

Haba U Blei u la ialam noh ia ki khun Israel na Ijipt ban leit sha ka ri Kanaan, u la ong ha u Joshua ba nga la ai ia ka ri baroh kaba sha shiliang ka Jordan ban long ka jingioh kynti jong me, bad U Blei u ban sa kawei pat ka ktien, bad kata ka long, tangba me dei ban long uba khlaiñ bad uba shlur bha’. Joshua 1:6-7

Ka don ka kyntien kaba ong ‘tangba’, U Blei u lah te u lah ai, tangba u ong pat ia u Joshua ba me dei ban long uba khlaiñ bad ba shlur bha. Kane ka pyni ba U Blei um lah ban pyndonkam ia ki briew ki bym don jingshlur, kiba tyngkai ia lade. Kumta haba u Joshua u la iohsngew ia kata ka jingong jong U Blei ba u dei ban long uba khlaiñ bad ba shlur bha, u Joshua u la pynkhlain bad pynshlur bha ialade, um sheptieng, kumta ngi iohi u Joshua u la jop ia kawei ka shnong hadien kawei pat ka shnong, u la pynkyllon ia shibun ki radbah kiba ieng pyrshah ia u. (Pule kitab Joshua lynnong banyngkong ter ter)

Ngi iohi hangne kumno ba ka jingshlur ka long kaba donkam haduh katta katta, dei namar kata ka daw U nongthoh sha ki Hebru u ong, Namar kata, wat bred noh phi ïa kata ka jingshlur jong phi, kaba don ka nong ka bakhraw. Hebru 10:35

Ka jingshlur ka don ka nong ong ka Ktien jong U Blei. 

Kumta ka jingkyntu ka long, to ngin nym bud pud ia lade, uei kaei ngi long, ngi duk, ngi bieit, ngi rit ngi ria, U Blei u lah ban pyndonkam ia phi haba phi don ka jingshlur.

Kumta ieng joit ha kane ka sngi, kup ia ka jingkhlaiñ bad jingshlur jong U Trai, sdang ban ialap bad phla ia U Trai, pyllait im ia kiwei na ki kti u Soitan kum u Gideon, u David bad u Joshua, jop pyrshah ia u nongshun, bad iaid shaphrang da ka jingngeit na ka jingjop sha ka jingjop.

U Blei un kyrkhu ia phi. Amen 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | Nov 19, 2024