Ka jingsuk
Ka jingsuk ka long kaba donkam haduh katta katta ha ka jingim jong u briew bad wat ha ka ïing ka sem ruh kumjuh.
U Solomon ha ka kitab Proberb 17:1 u ong, Lah kaba shikyntien ka ja suda haba bad ka jingsuk, ban ïa ka ïing kaba dap da ka jingkhawai lem bad ka jingïaleh.
U Solomon u dei u syiem uba riewspah haduh katta katta, la ong ba ha ka por jong u ka jingbun jong ka rupa ka la long kum u mawria, haduh ba ki briew kim khieñ kor shuh ia ka, kaba mut ka jingbun kaba lah palat. Ym tang ka rupa, hynrei ka ksiar bad kiwei kiwei ki mar rem dor ki jyllei ha ka hima jong u. U dei da shisha u syiem uba riewspah tam. Pule 1 Ki Syiem 10:14 ter ter phin iohi ia ka spah u Solomon. Pynban une u syiem u ong, Lah kaba shikyntien ka ja suda haba bad ka jingsuk, ban ïa ka ïing kaba dap da ka jingkhawai lem bad ka jingïaleh.
Kane ka pyni ba ka jingsuk ka kham kongsan ban ia kiei kiei baroh kiba ngi lah ban ioh ha ka jingim. Ngi lah ban don ka bam ka dih kyrhai, ngi lah ban don ki jingdon jingem kiba biang, hynrei lada ngim don ia ka jingsuk, kita baroh kim don dor eiei ruh em ha ka jingim jong u briew.
Ngi ju iohi bad iohsngew kiba bun bah ki briew kiba dap ba biang, kiba don ka spah, ka kyrdan, ka nam, ka burom pyrthei, hynrei ki pynkut ia la ka jingim ha u tyllai phasi, bad ha kiwei pat ki rukom pyniap ialade (suicide), ka daw ka dei namar ba kim don jingsuk ha ka mynsiem.
Ngi sngewthuh mynta ba ka jingsuk ka kham donkam ban ia kiwei pat ha ka jingim. Kumta ka jingkylli ka long, Kumno ngin ioh ia ka jingsuk?
Da kaba ngeit ha U Jisu.
U Jisu u ong ha ka gospel u Ïoannis 14:27, Ïa ka jingsuk nga iehnoh ha phi, ïa ka jingsuk ka jong nga, nga ai ha phi, ym kumba kata ka pyrthei ka ai, nga ai ma nga ha phi. Wat khih khuslai na ka dohnud jong phi, lymne wat sheptieng.
U Jisu u kren shai ba ka pyrthei kam lah ban ai jingsuk, dei tang ma U uba lah ban ai ia ka, namar ma U, u long U Syiem ka jingsuk (Isaiah 9:6).
Paralok baieit, lehse phi la duh ia ka jingsuk ha ka mynsiem jong phi, ha ka ïing ka sem jong phi, ha kane ka por phai sha U Trai, ngeit bad pdiang ia U Jisu uba long u Syiem ka jingsuk, une keiñ un ai ka jingsuk bashisha ia phi bad ia ka ïing ka sem jong phi kumba u la ong ha ka Ktien jong U Blei.
Da kaba shaniah ha U Trai.
Kitab Jeremaïah 17:7 ka ong, Suk uta u briew uba shaniah ha U Trai, bad uba ka jingshaniah jong u long U Trai.
Hangne u Jeremaïah u pyni ba kata ka jingshaniah ha U Trai ka wanrah ka jingsuk bad ka jingkyrkhu ha ka jingim u briew. Kumta ka jingkhot ia ngi ka long, to ngin nang ban shaniah ha U Trai na ka bynta ka jingim bad ka lawei jong ngi, na ka bynta ka ïing ka sem bad ki khun ki kti jong ngi.
Da kaba pyntip ia ki jingdonkam sha U Blei.
Philippi 4:6-7 ⁶Wat khuslai ïa kaei kaei ruh; hynrei, ha kaei kaei baroh da ka jingduwai bad ka jingkyrpad lem bad ka jingainguh, to phin pyntip ïa ki jingpan jong phi sha U Blei. ⁷Te kata ka jingsuk U Blei, kaba palat ïa ka jingshemphang baroh, kan ri jai jai keiñ ïa ki dohnud jong phi bad ïa ki jingmut jong phi ha U Khrist Jisu.
U Apostol Paul u ong, wat khuslai ia kaei kaei ruh, hynrei da ka jingduwai bad ka jingkyrpad lem bad ka jingainguh, to phin pyntip ia ki jingpan jong phi sha U Blei. Kumta ka jingsuk jong U Blei kan wan bad kan ri jai jai ia ka dohnud bad ka jingmut jong ngi baroh.
Kumta ka jingkyntu ieit ka long: To ngin ngeit ha U Jisu uba long U Syiem ka jingsuk, ngin shaniah lut ruh ha U Trai, bad ngin pyntip ia ki jingdonkam jong ngi baroh lyngba ki jingduwai sha U Blei.
To U Blei un kyrkhu ia phi baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong Nov 26, 2024
Comments
Post a Comment