Balei U Blei u pyndonkam ia kiba bieit, batlot bad bymlong eiei?

Balei U Blei u pyndonkam ia kiba bieit, batlot bad bymlong eiei?

Haba ngi peit ha ka Bible ngi iohi bun bah kita kiba U Blei u khot ki dei kiba bieit bad ki bym long eiei. U Apostol Paul ruh u iohi ia kata, na kata ka daw u thoh ha ka shithi sha ki Nong Korinth ha kaba iadei bad kane ka bynta. To ngin pule.

1 KORINTH 1:26-29

[26] Namar phi ïohi ïa ka jingkhot ïa phi, ko parabangeit, ba ym bun ki bastad katba kum ka doh, ym bun kiba don bor, ym bun ki bakhraw batri, ba la khot, [27] hynrei, U Blei u la jied ïa kita kiei kiei ruh ki babieit jong ka pyrthei, ba un pynlehrain khop ïa kita ki bastad; bad U Blei u la jied ïa kita kiei kiei ruh ki batlot jong ka pyrthei, ba un pynlehrain khop ïa kita kiei kiei ruh kiba don bor; [28] bad ïa kita kiei kiei ruh kiba poh jaid jong ka pyrthei, bad ïa kita kiei kiei ruh ïa kiba la ñiewbeiñ, U Blei u la jied keiñ, bad ïa kita kiei kiei ruh ki bymlong, ba un ïoh pynduh noh ïa kita kiei kiei ruh kiba long; [29] ba ka doh baroh kan ym ïoh leh sarong ha khmat U Blei. 

U Apostol Paul u pyndonkam da ka ktien 'YM BUN', u ong 'ym bun' kiba stad katba kum ka doh, 'ym bun' kiba donbor bad kumta ter ter. Kane ka pyni ba U Blei u kham jied ia kiba bieit, batlot bad bymlong eiei. Hooid U pyndonkam ruh ia kiba stad, kum ia u Apostol Paul u briew uba stad ba shemphang, hynrei 'ym bun' ong u Apostol Paul, kaba mut kiba bun hi ki dei kita ki bymlong eiei ha ka pyrthei. 

Hato ngi la ju pyrkhat balei U Blei u khot ia kiba kum kine? 

Ha ka jingsngewthuh jong nga, don tang kawei  ka daw, bad kata ka long ki briew kiba bieit, ba tlot bad bymlong eiei, haba U Blei u pyndonkam, borabor kin ai burom sha U Blei, ki sngewthuh ba khlem U Trai ngam long eiei, ngam lah ban leh eiei. Hynrei kiba bun hi ki briew kiba stad, kiba khlaiñ bor bad kiba la long eiei lypa, haba U Blei u pyndonkam ruh kin sngew ba dei ka jingstad jong ki, ka jinglah jong ki, ka nam bad ka burom jong ki, na kata ka daw, U Blei u bym sngewtynnad ba ki briew kin sngewsarong ha kata ka jingstad, ka jingkhlaiñ, ka nam bad ka burom jong ki, u kham jied pynban ia kita ki bymlong eiei. 

Ha ka kitab u ISAÏAH 42:8 U Blei u ong, Nga long U Trai; kata ka long ka kyrteng jong nga: te ïa la ka burom ngan ym ai ha uwei pat, lymne ïa la ka jingïaroh ha ki bleithaw.

U Blei um sngewtynnad ba ngin shim burom sha lade ne ai shawei pat haba ngi lah ban leh eiei, hynrei U kwah ba ngin nang ban ai ka burom sha U. 

Shuh shuh ha ka kitab u JEREMAÏAH 9:23-24 U Blei u ong, ¹²Kumne u ong U Trai, “Wat ai ba u riewstad un sarong ha la ka jingstad, lymne u bakhrawbor un ym sarong ha la ka bor, u riewspah to un ym sarong ha ki spah jong u: ²⁴hynrei, uta uba sngewsarong to un sngewsarong ha kane, ba u shemphang, bad ba u ithuh ïa nga, ba nga long U Trai uba leh ïa ka jingleh ieit, ïa ka jingbishar, bad ïa ka hok, ha ka khyndew: naba ha kine kiei kiei nga sngewbha keiñ,” ong U Trai.

Kiba bun bah ki syiem, ki nongsynshar ha ka Bible ki bym shym la nang ban ai burom sha U Blei namar ka jingjop, ka jinglah jong ki, kiba shim burom sha lade, U Blei u ju pynhiar khet noh ia ki. 

Nuksa 1: U Nebukhadnessar

DANIEL 4:28-33

[28] Kane baroh, ka la jia ha u Nebukhadnessar syiem. [29] Ha ka bakut khat-ar bnai u la dang ïaid kai ha kata ka ïingsyiem jong ka Babilon. [30] U syiem u la ïathuh bad u la ong, “Hato kane kam long ka Babilon bakhraw, ïa kaba nga la tei ma nga ban long ka jaka shong syiem, da ka jingkhraw ka bor jong nga bad na ka bynta ka nam ka burom jong nga?” [31] Hamar ba u syiem u dang kren ïa kata ka ktien, ka jingsawa ka la hiar na bneng ka da ong, “Ko Nebukhadnessar syiem, la ong ha me: ka hima ka la leit noh na me. [32] Bad yn beh noh ïa me na ki briew, bad ka jaka shong jong me kan long ryngkat bad ki mrad khlaw; bad yn pynbam phlang ïa me kum ki masi dab, bad hynñiew ki aïom kin lut ha me; tad ynda me la tip ba U Bahakhlieh Tam Eh u synshar ha ka hima jong ki briew, bad ba u ai ïa ka ha uba u mon hi.” [33] Ha kata hi ka por, la pyndep ïa kata ha u Nebukhadnessar; bad la beh noh ïa u na ki briew bad u la bam phlang kum ki masi dab bad ka met jong u ka la jhieh da ka umjer bneng, tad ynda u shñiuh jong u, u la san kum ki 'ner pukni, bad ki tyrsim jong u kum ki tyrsim sim.

Nuksa 2: U Herod

KI KAM 12:21-23

[21] Te ha kawei ka sngi ba la ïabuh, u Herod u la kup ïa ka jaiñkup syiem, bad haba u la shong halor ka khet bishar, u la saidthma ha ki. [22] Te uta u paidbah u la risa, u da ong, “Ka jingkren u blei, ym ka jong u briew.” [23] Te kumne kumne u angel U Trai u la shoh ïa u, namar um shym la ai ka burom ha U Blei; te la bam ka ksaiñ ïa u, bad u la dkut mynsiem noh.

Sngewma bad sngewshyrkhei lada ngi shim burom sha lade. Ngi iohi hangne U Blei um lah ban shah. Bad kane ka dei ka daw ba U Blei u sngewtynnad ban jied bad pyndonkam ia kita kiba bieit, ba tlot bad ki bymlong eiei, ba kin ioh long eiei bad ai ka burom sha U Blei. 

Kumta ka jingkhot ia ngi iwei pa iwei, kam pher uei/kaei ngi long, hynrei haba U Blei u pyndonkam ia ngi, to ngin nang ban ai ka burom sha U Blei, ioh ia ka dohnud kaba sngewrit.

U Blei un kyrkhu ia phi, Amen 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | Dec 13, 2024