U BLEI UBA HIKAI
Haba ngi peit shaphang U Blei ba ngi shakri, ngi iohi u dei U Blei uba sngewtynnad ban hikai ia ki briew, khamtam ia kito kiba U mut ban pyndonkam na ka bynta jong U bad ruh haba ki briew ki duwai bad ki donkam ia ka jinghikai jong U.
Ha ka kitab Eksodos haba U Blei u khot ia u Moses bad haba u Moses u sdang ban aidaw ba ngam nang ban kren, U Blei u ong ia u khie leit, ngan hikai ia me kaei ba men kren
EKSODOS 4:12
Namar kata, to leit mynta, bad nga ngan long lem bad ka shyntur jong me, bad ngan hikai ïa me ïa kaei ba men kren keiñ.”
Lada U Blei u la khot ia phi, wat ym sheptieng kaei ba phin kren, wat nym ong oh ngam tip, ngam nang, ngan lah, U Blei un hikai iaphi. Kaba donkam ka long tang ban shu pynkohnguh ha kata ka jingkhot jong U. Hallelujah!
U Blei uba hikai, un hikai wat ia kata kaba ki briew kim pat ju mlien ban leh ha ka jingim jong ki. Ngi iohi shaphang U David u dei tang U khynnah sharai langbrot, uba man la ka sngi sha lum bad ki langbrot, hynrei kumno haba u leit mih sha ka thma U Blei u hikai ia u kumno ban ialeh ia ka thma kham palat ban ia kita kiba la ioh training kiba la ju mlien ban ialeh thma.
Ngi iohi ha ka por ba u Goliath u beiñ ia ki Israel bad haba u David u ong ïa u Saul ba ngan leit ban ialeh pyrshah ia utei u Philistia bymotsher namar ba u beiñ ia u paidiapom ki Israel, u Saul u ong ia u David, ‘mem lah namar me dang khynnah, u Goliath te u la long u riewthma naduh ba dang khynnah’ (1 SAMUEL 17:33), hynrei u David u la iaiban ba un leit, namar u sngewthuh ba watla um shym la ioh training na ki briew, hynrei U Blei u long u nonghikai jong u, kumno ban ialeh thma, kumno ban iapom etc. Kumta u la leit bad u la jop thma pyrshah ïa u Goliath bad ïa ki Philistia baroh.
Dei na kane ka daw ka la pynlong ïa u David ban rwai ia ka SALM 144:1 ban ong, Long ba la kyrkhu ïa U Trai u mawsiang jong nga, uba hikai ïa ki kti jong nga ïa ka thma, bad ïa ki shynriah'ti jong nga ban ïaleh.
Ym tang u David, hynrei bun bah ki briew ha ka Bible kiba ym shym la ioh training, kim shym la ioh jingpyntbit naei naei hynrei ki lah ban leh ia kiei kiei kiba khraw ka dei namar ba U Blei u hikai ia ki. Peit shaphang u Petros, u Ïoannis bad kiwei ki synran U Jisu kim dei kiba nang ba stad (educated), la ong ba ki long kiba bieit, kiba khlem jinghikai (illiterate), KAM 4:13, hynrei haba ki don ka jingiadei ba jan bad U Blei, U Blei u hikai ia ki, bad kine ki juh ki briew ba bieit ba khlem jinghikai ki la kylla long ki nonghikai bakhraw ha ka pyrthei, ha kaba wat kiba nang bastad ki hap ban pyndonkam da ki jinghikai jong ki, kane ka long ka jingmaian kaba khraw!
Pynban, haba nga ong kumta, ngam mut ban ong ba ym donkam training, ym donkam jinghikai shuh, em, ngi lah ban leit sha ki training, ngi lah ban leit sha ki Bible School, Bible College, etc. hynrei kaei ba nga mut ban ong ka long ba ka jingioh jinghikai na U Blei kata kaba kham kongsan eh.
Haba U Blei u hikai, um ju hikai malu mala, hynrei u hikai haduh ba ka pyrthei kan lyngngoh. Hallelujah!
Kumta ka jingkhot ia ngi iwei pa iwei ka long, to ngin don ka dohnud kaba shah hikai ha U Blei, la ka long ha kano kano ka kam bad khamtam ha ka jingshakri ia U Trai, khnang ba ngin ioh man bha bad ba ngin jop ha ka jingim.
U David kum uta uba la mad ia ka jingkyrkhu na kata ka shah hikai ha U Blei, u ju duwai barabor ba U Blei un hikai ia u. Ha ka SALM 25:4&5 u ong, A Trai; to hikai ha nga ïa ki lynti ïaid jong me. To ïalam ïa nga ha ka jingshisha jong me, bad to hikai ïa nga; namar me long U Blei ka jingpynim jong nga; ha me nga ap kyrmen baroh shi sngi.
Haba ngi nang ban shah hikai ha U Trai, ngin nym bakla lynti, ngin nym shah jop ne shah rem ha ka jingim, hynrei ngin iohi ia ka jingjop bad ka jingmanbha.
Kumta ka jingkyntu ïa ngi lang baroh ka long, to ngin nang ban shah hikai ha U Trai, lehse phi dei u briew u bym don ka jingnang jingstad kaba biang, hynrei phi don ka jingshitrhem ban shakri ia U Trai, nga ong ia phi iaid shaphrang, duwai ba U Blei un hikai, un ai jingstad iaphi. Lehse don ruh napdeng jong phi, phi don ka kyrdan bad ka jingnang jingstad kaba biang, hynrei ban mih shakhmat, ban shakri ia U Trai, phim nang bad phim lah, phi kylla long tang kum u riewmadan, nga ong ia phi, ailad ia U Blei ba un hikai ia phi, phin shem ba ka jingim bad ka jingshakri jong phi kan kylla.
Nga ngeit U Blei u la kyrkhu ia ngi lyngba kane ka jingpuson ba khyndiat na ka Ktien U Blei, Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | Dec 28, 2024
Comments
Post a Comment