Ka khubor babha jong ka Khristmas
Kaei kata ka khubor babha jong ka Khristmas?
Ka khubor babha jong ka Khristmas kam dei satia ba ngin ioh jaiñ thymmai, ngin ioh airong ïing, ngin ioh gifts, ngin ioh thied khlur lane Christmas tree, thied light khrip khrip, lane ngin ioh shad pyrthei, ngin ioh dih ioh bam sngewbha, lane ngin ioh mit mit na u Santa claus.
Hynrei ka khubor babha jong ka Khristmas ka dei ba U Jisu u la wan sha ka pyrthei. Hallelujah! LOUKAS 2:8-11
Balei ka jingwan U Jisu ka kylla long ka khubor babha?
Namar:
U wan ban pynim ia ki briew na ki pop jong ki.
Kata ka dei ka khubor babha banyngkong eh. MAT 1:21
Ka Bible ka iathuh ia ngi ka ong baroh ngi la leh pop bad ngi la duh lehnohei ia ka burom jong U Blei. Ngim don jingkyrmen shuh, sa tang ka dujok ding kaba ap ia ngi. ROM 3:23; 10-12
Hynrei ha kaba kum kata ka por U Jisu u wan ban pynim ia ngi na kata ka pop jong ngi. Kata keiñ ka dei ka khubor babha. Hallelujah!
Ngi la jot, ngi la rem hynrei U Jisu da lade u wan ban wad ia ngi. MAT 18:11
Haba ngi kylla bamut, ngi ngeit bad pdiang ia U Jisu ha ka dohnud jong ngi, ngin kylla long biang ki jingthaw bathymmai. 2 KOR 5:17. Ngin ioh pat ia kata ka burom jong U Blei kaba ngi la duhnoh.
U wan ban pyllaitluid ia ngi.
Uwei pa uwei u bym pat pdiang ia U Jisu Khrist, u dang long u mraw jong ka pop. (ÏOAN 8:34).
Kumta namar ba ki long ki mraw jong ka pop, ki hap ban leh ia kaei ba ka pop bad u Soitan ki phah ia ki ban leh. i.e: tuh, thiem, dih kyiad, dih drugs, kai kynthei shynrang, klim awria, etc.
Teng teng ngi lyngngoh balei uto u leh kumto, kumno kat uto ruh u dang leh kumto? Ka daw ka dei namar ba ka pop ka teh mraw ia ki, ki hap ban leh ia kaei ba kata ka pop ka phah ia ki. Nga ngeit u briew da lade hi un nym kwah ban leh ia kita kiei kiei kiba sniew, hynrei namar ba ki long ki mraw, ki hap ban leh.
Ma nga ruh shisien nga la long kumta, hynrei ainguh ia U Jisu ba u la wan sha kane ka pyrthei ban pyllaitluid ia ngi. Kata ka dei ka khubor babha!
ISAIAH 61:1, …ban ialap ia ka jingpyllait noh ha kiba la ring mraw…
Haba U Jisu u wan u pynjot noh ia baroh kita ki lyngkor jong ka jinglong mraw jong ngi. i.e: tuh, thiem, dih kyiad, dih drugs, kai kynthei shynrang, klim awria, etc. 1 IOAN 3:8-9
Paralok baieit, lada phi la shah teh mraw ha ka pop, lada ka pop ka la ialam mraw ia phi ha ki jingkwah jakhkia ba bunjaid, pdiang noh ia U Jisu ha ka jingim jong phi, U Jisu un pyllaitluid ia phi ha kane ka por.
Lehse phi la iaksaid ban lait, hynrei katba phi nang ksaid phi nang ngam ha kata ka pop, nga ong ia phi wan sha U Jisu, dei tang ma U uba lah ban pyllaitluid ia phi. Ki rehabs center, ki counseling center khlem U Jisu kim lah ban pyllaitluid ia phi. Ki lah ban iarap shipor arpor, hynrei ym junom. Hynrei haba U Jisu u pyllait, un pyllait junom. ÏOANNIS 8:36
U wan ban ai ha ngi ia ka jingkmen.
Haba ki nongaplangbrot ki dang don sha lum ban sharai ia ki langbrot jong ki, u angel U Trai u la wan ban wanrah ia ka khubor babha ba la kha ia U Jisu, bad ka jingkha ia U Jisu kan long ka jingkmen bakhraw. LOUKAS 2:8-10
Hapdeng ka jinglong pop, jinglong jot jinglong rem, U wan U nongpynim ban pynim bad pyllaitluid ia ngi. Hato kata kam long ka jingkmen bakhraw? Ka long ka jingkmen bakhraw.
Paralok baieit, kane ka jingkmen ba U Jisu u ai kam dei satia, kum kato ka jingkmen ba phi ioh na ka pyrthei lyngba ka bam ka dih sngewbha, hynrei ka jingkmen ba U Jisu u ai ka long ka jingkmen kaba shisha bad kaba neh junom. Phi dih kyiad, phi leh sngewbha, kita ki long tang shipor, hadien katto katne por kata ka jingsngewsih ka jingkhuslai ka wan biang. Hynrei lada phin pdiang ia U Trai, un ai ha phi ia kata ka jingkmen kaba neh junom. Hallelujah!
U wan ban ai ha ngi ia ka jingsuk bashisha.
Ka pyrthei ka don ha ka jingklumar, ki briew ki don hapdeng ka jinglynga pisa. Ngi iohi ia kane wat haba ngi peit lyngba ki social media, ki briew ki la shu leh ia kiei kiei tang ban pynkmen bad pynsuk ialade. Hynrei ngi iohi katba ki nang leh kumta, katta ka jingkhuslai ka nang jur, kata ka jingbymsuk jingbymhun ka don beit ha ki.
Ban shem ia ka jingsuk bashisha dei tang haba ngi ngeit bad ngi pdiang ia U Jisu, namar ma hi U long U Syiem ka jingsuk ong ka Ktien U Blei. ISAIAH 9:6
Ngi ju ia khublei paralok ha ka por Khristmas da kaba ong, "Khristmas basuk - Khristmas basuk" hynrei lada ngim pdiang ia U Jisu ha ka dohnud kata ka jingia-khublei jong ngi kan nym long satia kaba trei kam.
Ba ka Khristmas kan long shisha ka "Khristmas basuk" donkam ban ngeit bad pdiang ia U Jisu ha ka dohnud, dei hangta ngin mad ia ka jingsuk bashisha ha ka mynsiem jong ngi. ÏOANNIS 14:27
Lada phi la duh noh ia ka jingsuk, wan sha U Jisu…
U wan ban pynioh pat (restore) ha ngi ia kaei kaba ngi la duh noh.
U Soitan u la tuh lut ia kiei kiei baroh na ngi, u la pynlyngkhuid, ngim don eiei shuh, ngi la long kum uto u briew uba hap ha ki kti u nongtuh ba runar. LOUKAS 10:30-35
Kane ka dei ka dur jong U Jisu. U Jisu u la wan ban pynioh pat ha ngi ia kaei kaba ngi la duh noh. ÏOANNIS 10:10
Peit sha lade, Kaei ba phi la duh noh? U Jisu un pynioh pat ia kata ha phi lada phi kloi ban ngeit bad pdiang ia U ha ka dohnud jong phi.
Ka burom
Jingkoit jingkhiah
Jingsuk jingkmen - ÏOAN 14:27
Jingioh jingkot
Etc
Kane ka dei ka khubor babha ba nga kwah ban wanrah ha kane ka por, nga ngeit ka la long ka jingkyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | Dec 25, 2024
Comments
Post a Comment