Aiu phi la leh bad ka Shi-Talent?
U Blei u la ai ha uwei pa uwei ïa ki talent. Lada ym dei shibun ruh, hynrei la kumno kumno kawei ka talent un ai beit. Kumta ngi hap ban pyrkhat, Aiu nga la leh bad kata ka talent?
U Blei haba u la ai ïa ka talent, u kwah ba ngin pyndonkam hok bad ngi pynroi ïa ka. Kata ka dei ka jingkwah jong U Blei. Hynrei sngewsih ban ong, don ki bangeit kiba U Blei u la ai ha ki ia ki talent, ha la ka jong ka jong, hynrei kim shym la pyndonkam hok ïa kata ka talent kaba U Blei u la ai. Ki leh bym salia, ki leh bym suidñiew.
Don pat ki bangeit kiba U Blei u la ai ha ki ïa ka talent, hynrei tang ia kata kaba nyngkong kim shym la pyndonkam hok, ki lah kwah noh sa da kawei pat ka talent. Ki sngew ba kata kam da long eh kaba biang, lane kaba kham don burom, lane kaba kham hajrong. Kata ruh ka long kaba sniew.
Ngi hap ban sngewthuh ba kano kano ka talent ba U Blei u ai ka long kaba kordor, ngi hap ban ñiewkor bad pyndonkam hok shuwa ïa kata. Hadien ba ngi la pyndonkam hok, bad ba U Blei u la iohi ba ngi long kiba lah ban shaniah, un sa ai shuh shuh sa kiwei pat ki talent. Kata ka long ka lynti kaba dei.
Pule ha ka Gospel U Mathaïos shaphang ki Pharshi ki Talent:
MATHAÏOS 25:14-30 KHB
[14] “Naba kumta ka long kumba u briew u ban sa leit jingleit sha kawei ka ri, uba la khot ïa ki shakri jong u bad u la ai ha ki, ïa ki spah jong u. [15] Te ha uwei u la ai san talent, ha uwei pat ruh ar, ha uwei pat ruh kawei; ha uwei pa uwei katba kum ka buit jong u hi: te kumne kumne ruh u la leit sha la ka jingleit. [16] Ynda kumta, uta uba la ïoh diang ïa ki san talent, u la leit khaïi bad ki, bad u la pynman ïa kiwei ki san talent. [17] Kumjuh ruh uta u ba-ar, uta ruh u la ïohnong kiwei pat ar. [18] Uta te uba la ïoh diang ïa kawei, u la leit tih thliew ha ka khyndew, bad u la buhrieh noh ïa u sbai u kynrad jong u. [19] Te ynda la kham slem, u kynrad jong kita ki shakri u wan, u ïakheiñ bad ki. [20] Ynda kumta, uta uba la ïoh diang ïa ki san talent u la wan, bad u la wallam ïa ki san tylli kiwei ki talent, u da ong, ‘Ko kynrad, me la ai ha nga san talent; ha khmih nga la ïohnong san tylli kiwei ki talent.’ [21] Te u kynrad jong u, u la ong ha u, ‘Bha, me u shakri babha bad bangeit: me la minot ha kiba khyndiat, ngan buh ïa me halor kiba bun: to khie leit shapoh ka jingkmen u kynrad jong me.’ [22] Uta uba la ïoh diang ïa ki ar talent ruh u la wan, u la ong, ‘Ko kynrad, me la ai ha nga ar talent: ha khmih nga la ïohnong ar tylli kiwei ki talent.’ [23] U kynrad jong u, u la ong ha u, ‘Bha me u shakri babha bad bangeit; me la minot ha kiba khyndiat, ngan buh ïa me halor kiba bun: to khie leit shapoh ka jingkmen u kynrad jong me.’ [24] U la wan ruh de uta uba la ïoh diang ïa kawei ka talent, u la ong, ‘Ko kynrad, nga la tip ba me long u briew uba eh, uba ot na kaba mem shym la bet, bad uba lum na kaba mem shym la pynsaphred: [25] kumta, ba nga la sheptieng, nga la leit buhrieh ïa ka talent jong me ha ka khyndew; ha khmih, me la ïoh la ka jong.’ [26] U kynrad jong u te u da ïathuh u la ong ha u, ‘Me u shakri bymman bad ba alhia, me la tip ba nga ot na kaba ngam shym la bet, bad ba nga lum na kaba ngam shym la pynsaphred; [27] ka la dei ïa me namar kata ban ai ïa u sbai jong nga ha ki ba ai sut, ba haba nga wan te ngan da ïoh shim ïa la ka jong bad ïa ka sut. [28] Namar kata, to shim noh na u ïa kata ka talent, to ai ruh ha uta uba don ki shiphew talent. [29] Naba ha uwei pa uwei uba don, yn ai, un ïoh kaba dap tam ruh; hynrei, na uta u bymdon, wat ïa kata kaba u don yn shim noh na u. [30] To bred noh te ïa uta u shakri bymmyntoi sha ka ba-dum kaba kham jngai; hangta yn long kaba lynñiar bad kum dait bniat.’
Kano kano ka talent ba U Blei u la ai, ngi hap ban ai jingkheiñ hakhmat jong U ha kawei ka sngi, la kaba rit ne kaba khraw. Ngim lah satia ban ong, oh, sa rat ine i kam barit baria U Blei ruh um nym da shim khia, hynrei em. U Blei u shim khia ïa kawei pa kawei ka talent ba U la ai ha u briew.
Hangtei ngi iohi ba uba ioh san talent, u la pynroi bad u la iohnong san kiwei pat ki talent, uba ioh ar ruh u la leh kumjuh bad u la ioh shuh sa ar kiwei pat ki talent.
A lada jin ba une uba ioh ar talent un ong, oh, myntoi aiu sa rat ine ar talent, kumta un shu buh khlem pyntrei kam, nga ngeit un jin da la duh ei ia kita kiwei pat ki ar talent. Hynrei une um don satia ïa kaba kum kata ka jingmut, la khyndiat ne shibun u pyndonkam hok ïa ki.
Pynban une uba ioh shi talent, u la shu buh khlem pyntrei kam, kumta haba u kynrad u wan bad u la pan jingkheiñ, la shem ba um shym la leh eiei, kumta la pynrem ia u. Lada un jin da la pyntrei hok, U Blei un jin da la ai shuh sa kiwei pat ruh ki talent. Hynrei namar ba um shym la pyndonkam, wat ïa kata kaba u don ruh la shim noh, la ai noh sha kiwei pat kiba pyndonkam hok.
Kane ruh kan long iano re iano!
Bun napdeng jong phi kiba leh sarong, leh bym suidñiew ïa ka talent ba U Blei u la ai, phin sa shah knieh noh ïa ki talent jong phi, bad ha kaba khaduh phin sah tang kum u riew madan. Bad kaba kham sheptieng ka long, lah ruh ban shah bret dujok lada ngi leh bym suidñiew ïa ka talent ba U Blei u la ai.
Peit nuksa na utei u briew uba ioh shi talent, kumno la bret ïa u sha ka jaka badum, kaba hangta yn long kaba lynñiar bad kum dait bniat. Kane ka dei ka dur jong ka dujok!
Kumta ka jingkylli ka long, Hato ngi pyndonkam hok ne em ïa ka talent ba U Blei u la ai?
Lada ngi la pyndonkam hok, ngin ioh ïa ka jingiaroh na U Blei, hynrei lada ngim shym la pyndonkam hok, ngin shah tim shah dumok ha U. Kata ka dei kaba ngi hap ban sngewthuh.
Kumta ka jingkhot ka long, lada phi la leh bym suidñiew baroh shi katta, ka dei ka por ba phin kylla bamut, pan map na U Blei, bad sdang ban shakri, bad pyndonkam hok ïa ki talent ba U Blei u la ai, ba kan long ka jingkyrkhu ïa kiba bun bad ïa ka kam u Kynrad.
U Apostle Paul ruh u kyntu ba ngi dei ban minot ha la ka jong ka jong ka bynta ba U Blei u la buh lane u la ai ha ngi.
ROM 12:6-9
U Blei un kyrkhu, Amen
© Jester L. Mawlong | Dec 22, 2025
Comments
Post a Comment