KA JINGPYNKHREH KHRISTMAS

KA JINGPYNKHREH KHRISTMAS 

Intro: Sa tang kumba 6 sngi ngin sa celebrate ïa ka Christmas lane kata ka sngi jong ka jingwan long briew U Jisu sha kane ka pyrthei. 

Nga ngeit bun na ngi, ngi la pynkhreh na ka bynta katei ka sngi ha la ka jong ka jong ka jinglah. Don napdeng jong phi kiba la thied ia ki Christmas tree ne ki light Christmas, don kiba la thied ïa ki jaiñ ban phong Christmas, don kiba la order lypa ïa u cake Christmas lane ki jingbam jingdih ban ïa lehkmen bad ki paralok / shi ïing shi sem. Don ruh kiba la dep airong airup, pynitynnad ïa ki ïing ki sem jong phi, bad kumta ter ter. 

Ka long kaba sngewtynnad, hynrei ngi donkam ruh ban kylli ïalade, katne ngi la pynkhreh ha kaba iadei bad kiei kiei kiba shabar, “Hato ngi la pynkhreh ne em pat ïa la ka dohnud ban pdiang ïa U Jisu kum U Nongpynim ba shimet?”

Namar lada ngim shym la pynkhreh ban pdiang ïa U Jisu ha ka dohnud jong ngi, baroh kitei ki jingpynkhreh jong ngi kin shu long lehnohei, kin long tang kum ka dur bula.

Kynmaw u Christmas tree lane ki light Christmas kin pynphyrnai, pynitynnad ïa ka ïing jong phi tang shipor, kata ruh tang kaba shabar, ynda la kut ka Christmas bad phi hap ban law noh, kumta ka ïing jong phi kan long biang kumba ju long. Hynrei haba U Jisu un ioh jaka ha ka jingim bad ka ïing ka sem jong phi, un pynitynnad bad pynphyrnai ïa phi bad ïa ka ïing jong phi shirta. Hallelujah!

Ma U, U long u jingshai bashisha, ma u, un pynphrnai, pynitynnad ïa ka jingim jong phi, ïa ka ïing ka sem jong phi... 

ÏOANNIS 8:12

Ynda kumta, U Jisu u la ïathuhkhana pat ha ki, u da ong, “Nga long U Jingshai jong ka pyrthei: uta uba wan bud ïa nga, un ym ïaid ha ka ba-dum, hynrei, un ïoh ka jingshai jong ka jingim.” 

Lehse phi lah order lypa ïa u Cake Christmas ban ïaleh kmen shi ïing shi sem, hynrei une ruh u lah ban pynkmen ïa phi tang shikhyllipmat. Lehse phi la thied lypa ïa ki jingbam jingdih, ban ïa bam ïa dih sngewbha Christmas, hynrei nga ong ïa phi, kine baroh ki long tang shipor. 

Ynda uto u cake u la lut, ynda kito ki jingbam jingdih ki la lut, ngin long biang kumjuh. Nga lah ban ong ba ka lah ban nang pynkhuslai pynban. Namar ka jingkmen ba shisha kam shong ha kito ki jingbam jingdih, hynrei ka shong ha U Jisu. Haba phin ngeit ïa U Jisu un pynkmen ïa phi junom.

ROM 14:7, 17

Namar ka hima ka jong U Blei kam long keiñ kaba bam bad kaba dih; hynrei, ka hok, bad ka jingïasuk, bad ka jingkmen ha U Mynsiem Bakhuid. 

U Jisu um shym la wan sha ka pyrthei ban long ka daw ba ngin ioh ban ia bam iadih sngewbha pyrthei, hynrei u wan ba ngin ioh ngeit bad ba ngin ioh ia ka jingim bymjukut. 

ÏOANNIS 3:16

“Naba U Blei u la ieit katta katta ïa ka pyrthei katba u la aiti noh ïa la U Khun ba la kha marwei, ba uei uei ruh uba ngeit ha u, un ym jot shuh, hynrei, un ïoh ka jingim bymjukut.

Ki briew ha ka por jong U Noah ki la ïa bam ki la ïa dih, ki la ïa shongkurim bad pynshongkurim…hynrei ha kaba kut ki mad ïa ka jingbabe bad jingkordit. 

LOUKAS 17:26-27 KHB

[26] Te kumba ka la long ha ki sngi u Noah, kumta ruh kan long ha ki sngi U Khun u briew. [27] Ki la ïabam, ki la ïadih, ki la ïashongkurim, la ïa-pynshongkurim ïa ki, tad ynda kata ka sngi ba u Noah u la rung hapoh kata ka ïinglieng, mynba kata ka jingshlei ka la wan, bad ka la pynjot noh ïa ki baroh.

Ki briew ha ki sngi jong U Lot ruh ki long kumjuh…

LOUKAS 17:28-30 KHB

[28] Kumjuh ruh kumba ka la long ha ki sngi u Lot; ki la ïabam, ki la ïadih, ki la ïathied, ki la ïadie, ki la ïathung, ki la ïatei: [29] hynrei, ha kata ka sngi ba u Lot u la mih noh na Sodom, U Blei u la pynhap slap da ka ding bad da u kyndok na bneng, bad u la pynjot noh ïa ki baroh. [30] Kumta ruh kan long ha kata ka sngi ha kaba yn pynpaw ïa U Khun u briew. 

Ka jingiabam iadih shabar na U Jisu Khrist ka khot ïa ka jingpynjot.

U riewspah ruh kumjuh 

LOUKAS 16:19-31 KHB

[19] “Te la don uwei u briew u bariewspah, bad u la ju kup da ka jaiñ saw bthuh bad ka jaiñ linen bani, u da leh pahuh eh ruh ha la ka sngi. [20] La don ruh uwei u nongkhrong uba kyrteng ‘u Lasaros’, uba la tap da ki tohjaw, ïa uba la ju buh ha ka khyrdop jong uta, [21] bad uba la ju sngewkwah ban pynkdang ïa lade na ki lyngkhot lyngkhai kiba ju hap na ka miej jong uta u bariewspah; shisha wat ki ksew ki la ju wan jliah noh ïa ki tohjaw jong u. [22] Ka la jia te, ba uta u nongkhrong u la ïap noh, bad ba la bah noh ïa u da ki angel sha ka shadem u Abraham. Uta u bariewspah ruh u la ïap noh de, bad la tep ïa u. [23] Te ha dujok u la khmied ïa la ki khmat, haba u long ha ki jingkordit, bad u la ïohi ïa u Abraham na jngai, bad ïa u Lasaros ha ka shadem jong u. [24] Te u la pyrta bad u la ong, ‘Ko Kpa Abraham, to isynei ïa nga, to phah ruh ïa u Lasaros ba un wieh ïa ka khmut shynriah'ti jong u ha ka um, ba un ïoh pynkhriat ïa u thylliej jong nga; naba la pynkordit ïa nga ha kane ka thylliej ding.’ [25] Te u Abraham u la ïathuh, ‘A khun, to kynmaw ba ma me katba me dang im, me la ïoh pdiang ïa kiei kiei ki babha ki jong me, kumjuh ruh u Lasaros ïa kiei kiei ki basniew; hynrei, mynta hangne ïa u la pyntngen, ïa me te la pynkordit. [26] Nalor kine baroh ruh putet, la buh skhem ïa ka kharai kaba khraw hapdeng jong ngi bad jong phi, ba kumta, kita kiba kwah ban leit sha shiliang nangne sha phi, kim lah, lymne kita kiba nangto, kim lah wan sha shiliang sha ngi.’ [27] U te u la ong, ‘Haba kumta, nga kyrpad ïa me, ko kpa, ba men phah ïa u sha ka ïing u kpa jong nga, [28] naba nga don san ngut ki para; ba un ïoh maham ïa ki, ba ïoh ki ruh kin wan sha kane ka jaka ka jingkordit.’ [29] Hynrei, u Abraham u ong, ‘Ki don u Moses bad Ki Nongïathuhlypa; ai kin sngew ïa ki keiñ.’ [30] U te u la ong, ‘Ym kumta, ko kpa Abraham, hynrei, lada uwei na ki nongïap un leit sha ki, kin sa kylla-ka-bamut.’ [31] U la ïathuh te ha u, ‘Lada kim sngap ïa u Moses bad Ki Nongïathuhlypa, kin ym ngeit ruh wat lada mihpat uwei na ki nongïap.’ ”

Paralok baieit, lada phi kwah ban ïoh ïa ka jingsuk bashisha, ka don ha U Jisu Khrist. Ka jingiakhublei Christmas paralok ban ong, Khristmas basuk², kan shu long tang ka rukom ba dei ban ong namar ka dei ka por Khristmas, hynrei kan nym lah ban wanrah jingsuk shisha, lada U Jisu um don ha ka jingim jong phi.

 

ÏOANNIS 14:27

Ïa ka jingsuk nga iehnoh ha phi, ïa ka jingsuk ka jong nga, nga ai ha phi, ym kumba kata ka pyrthei ka ai, nga ai ma nga ha phi. Wat khih khuslai na ka dohnud jong phi, lymne wat sheptieng.

Ban ioh ia ka jingsuk bashisha, dei tang ban pdiang ia U Jisu uba long U Syiem ka jingsuk…

ISAÏAH 9:6-7 KHB

[6] Namar ha ngi la kha ïa u khun, la ai ïa u khun ha ngi; te ka jingsynshar kan long halor ka tyrpeng jong u: bad yn khot ïa ka kyrteng jong u, “U Baphylla, U Nongsylla,” “U Blei Bakhrawbor,” “U Kpa Bymjukut,” “U Syiem ka Jingsuk.” [7] Ka jingroi ka jingsynshar jong u bad ka jingsuk kan ym kut shuh, halor ka khet u Dabid, bad halor ka hima jong u, ïa ka ban pynïeng ïa ka, bad ïa ka ban kyrshan ïa ka da ka jingbishar bad da ka hok naduh mynta bad ha la ka rta. Ka jingshitrhem U Trai ki paid kan pyndep ïa kane.

Ki briew kiba la pdiang ïa U Jisu, ki don ïa ka jingsuk bad ka jingkmen kaba phylla. 

Lehse don napdeng jong phi, phi ong oh nga te ba duk ba jynjar, ngam don pisa ban thied eiei na ka bynta ka Khristmas. Nga ong ïa phi wat khuslai, phi lah ban nym don eiei, hynrei haba phi don ia U Jisu, kata ka dei kaba kongsan tam, kumba ngi la ia kren shakhmat.

Kumta ka jingkhot ïa phi iwei pa iwei ka long, ngeit bad pdiang ïa U Jisu ha ka dohnud jong phi.

U Blei un kyrkhu. Amen 

© Jester L Mawlong | Dec 15, 2025