Kaei phi khmih lynti ha u snem bathymmai?
Nga ngeit ngi don la ki jong ki jong ki jingangnud bad ki jingkhmihlynti na ka bynta u snem thymmai, la ka long ialade shimet ne ia ka ïing ka sem kymjuh.
Don napdeng jong phi kiba lah sngewngiah ïa une u snem barim, phi lah kwah ba un wan noh u snem thymmai, namar phi don ka jingkhmihlynti ba lada wan u snem thymmai, kiei kiei baroh kin sa long thymmai. Kata ka dei ka jingangnud jong phi.
Kumno ngi lah ban pynurlong ia kita ki jingkhmihlynti jong ngi?
Ka jubab ka long, “Da U Jisu Khrist.”
Dei tang U Jisu uba lah ban pynurlong ïa kita ki jingkhmihlynti jong nga bad jong phi.
JINGPYNPAW 21:5 KHB
“Ha khmih, nga thaw thymmai ïa kiei kiei baroh.”
Point 1: U Jisu u lah ban thaw thymmai ïa ka jingim jong phi.
Lehse don napdeng jong phi, phi lah ngiah ïa ka jingim kaba phi la iaid, man la u snem phi pynlong ka jingkut jingmut ba ynda wan u snem thymmai ngan da im thymmai noh, pynban na uwei u snem thymmai sha uwei pat u snem thymmai ka jingim jong phi ka long kumjuh shi kumjuh, khlem don jingkylla. Kaba kylla ka dei tang ka Calendar, hynrei baroh ka jingim jong phi ka sah kumjuh.
Nga ong ïa phi sdang ban aiti thymmai ïa la ka jong ka jingim sha U Jisu, haba U Jisu u don ha ka jingim jong phi, dei hangta phin iohi ba ka jingim jong phi kan kylla. U Jisu un thaw thymmai ia ka jingim jong phi, un pynkylla ïa ki situation jong phi baroh.
2 KORINTH 5:17
Kumta, lada uei uei ruh u don ha U Khrist, u long u jingthaw bathymmai; kiei kiei ruh ki barim ki la duh noh, ha khmih kiei kiei baroh ki la jia long ki bathymmai.
ESEKIEL 36:26-27
[26] Ngan ai ruh ka dohnud thymmai ha phi, bad ka mynsiem thymmai de ngan buh hapoh jong phi: bad ngan khlaw ïa ka dohnud maw na ka doh jong phi, bad ngan ai ka dohnud doh ha phi. [27] Bad ngan buh ïa U Mynsiem jong nga hapoh jong phi, bad ngan pynïaid ïa phi ha ki aiñ jong nga, te phin rakhe ïa ki jingbishar jong nga bad phin leh ruh ïa ki.
Point 2: U Jisu u lah ban thaw thymmai ïa ka iing ka sem jong phi.
Lada ka ïing ka sem jong phi ka la jot ka la pra, phi khmih lynti ba ha u snem thymmai ka ïing ka sem jong phi kan sa kylla thymmai. U lok jong phi un sa kylla, ki khun jong phi kin sa kylla.
Nga ong ïa phi, ba kita baroh ki jingkhmihlynti jong phi kin nym urlong satia, lada phim ai jaka ïa U Jisu ha ka ïing ka sem jong phi. Dei tang ma U, U ban thaw thymmai ïa kiei kiei baroh.
ISAÏAH 43:19
Ha khmih, ngan leh kaei kaei ka bathymmai; mynta kan mih noh; phin ym tip ïa ka? Ngan pynlong ka lynti ha ka ri khlaw keiñ, bad ki wah ha ka ri kynjah.
Kata ka bym lah long ha khmat ki briew, hynrei U Blei u lah ban pynlong.
JEREMAÏAH 32:27
“Ha khmih, nga long U Trai, U Blei ka doh baroh: don ka bym lah bad nga?”
Don ka bym lah bad U Blei? = Ym don ka bym lah bad U Blei.
Kam pher katno ka la jot ka ïing ka sem jong phi, u soitan u la pynsniew dur la biang, hynrei lada phin aiti ha ha Trai, U Blei u lah ban thaw thymmai pat ïa ka ïing ka sem jong phi.
Ki jingiaksaid, ki jingpyrshang jong ngi kin long lehnohei, lada ngim shah ïa U Jisu ba un wan hapdeng ban leh eiei.
SALM 127:1-2
[1] Lada U Trai um tei ïa ka ïing, ki minot lehnohei kiba tei ïa ka: [2] Kaba lehnohei ba phin khie step, bad peit miet katta, bad ban bam ïa u kpu ka jingtrei shitom: naba kumta, u pynïohthiah ïa kiba ieit jong u.
Point 3: U Jisu u lah ban thaw thymmai ïa ka met kaba pang bakhrew jong phi.
Lehse don napdeng jong phi, kiba la ïa ksiad namar ka jingpang jingshitom, phi khmih lynti, oh, ynda mih u snem thymmai ngan sa ioh ia ka met ba koit ba khiah. Pynban na uwei u snem sha uwei pat u snem, ka met jong phi ka long kumjuh, khlem iohi jingkoit satia.
Kane ka dei kaba ka ‘kynthei bapang mihsnam ruh ka la mad’. 12 snem kynthih ka la kit ïa kata ka jingpang mihsnam jong ka. Ka Bible ka ong ba ka la lah pynlut ïa ka jingdon jong ka baroh phar, hynrei katba ka nang pynlut ka nang pang pynban. Ainguh ïa U Blei kane ka kynthei ka la leit sha U Jisu bad ka la ioh khiah phar na kata ka jingpang mihsnam.
Paralok baieit, lehse don napdeng jong phi kiba la iasyriem bad kane ka kynthei, phi la kit ïa ka jingpang na kawei ka snem sha kawei pat ka snem, phi la lah pynlut ïa ki jingdon jingem jong phi, phi la phah sumar kylleng kylleng, hynrei haduh mynta phim shym la ioh jingkoit. Ka khubor babha ka long, aiti ïa la ka jingim sha U Jisu, ai ba U Trai un thaw thymmai ïa ka met jong phi.
JEREMAÏAH 30:17
Naba ngan ai pat ka jingkoit jingkhiah ha me, bad ngan pynkhiah ïa me na ki jingmong jong me,” ong U Trai; “namar ki la khot ïa me uba la kyntait noh, (ki ïa-ong, ‘Ka long ka Seïon ïa ka bymdon ba wad shuh!’ ”)
U Blei u dei U Blei uba pyniohpat (Restorer).
U Nongrwai Salm u ong, U shna (pynkhiah) ïa ki jingpang baroh.
SALM 103:2-6 KHB
[2] Ko mynsiem jong nga, to kyrkhu ïa U Trai, bad wat klet ïa ki jinglehbha jong u baroh: [3] uba map ïa ki jingleh bymman jong pha baroh, uba shna ïa ki jingpang jong pha baroh; [4] uba pynim ïa ka jingim jong pha na ka jingjot; uba pynphong pansngiat ïa pha da ki jingleh isynei bad ki jingisynei bajem: [5] uba pynkdang ïa ka shyntur jong pha da kiei kiei ki babha; kat ban pynthymmai ïa ka jinglong samla jong pha kum ka pukni. [6] U Trai u leh ïa ki jinglehhok, bad ki jingbishar ïa kita baroh ba la banbeiñ.
Point 4: U Jisu u lah ban pyniohpat ha phi ia ka jingsuk jingkmen bashisha.
Lehse baroh ka jingim jong phi, phi kit ryngkat bad ki jingkhuslai bad ki jingsngewsih, phi pyrkhat, oh, ynda wan u snem thymmai ngan sa suk, ngan sa lait noh na kine ki jingkhuslai. Pynban kata ruh kam shym la long kumba phi khmih lynti. Ka khubor babha ka long, phai sha U Jisu, dei tang ma U uba lah ban shim noh ïa kita ki jingkhuslai jingsngewsih jong phi baroh.
ISAÏAH 53:4
Shisha u la bah ïa ki jingkhuslai jong ngi, bad u la kit ïa ki jingsngewsih jong ngi: pynban, ngi la ñiew ïa u ba la pynmong, ba la shoh da U Blei, bad ba la pynjynjar.
MATHAÏOS 11:28-29
[28] To wan ha nga, phi baroh ki bathait bad bakhia ka jingkit, te ngan pynjem ïa phi. [29] To shim ïa ka lyngkor jong nga ha phi, to hikai ruh na nga; naba nga uba lui lui bad u barit ruh ha ka dohnud: te phin shem kaba jahthait ha ki mynsiem jong phi.
Point 5: U Jisu u lah ban thaw thymmai ïa ka business, ka kam ka jam jong phi.
Lehse phi la ïa ksaid ha ka business jong phi, ha ki kam ki jam jong phi, hynrei ka don beit ka jingkhanglad khang lynti. Baroh ka fail lut! Nga ong ïa phi, shah ïa U Jisu ba un wan hapdeng jong phi, un plie lad plie lynti ma u.
U long U Blei uba lah baroh, U lah ban pynlong lynti wat ha ka ri khlaw, u lah ban pynmih um wat ha ka ri shyiap ba tyrkhong. Uta u dei U Blei ba nga ialap.
SALM 37:5-6
⁵To aiti ïa la ka lynti ha U Trai; to shaniah ruh ha u, te un pynlong ïa ka. ⁶Bad un pynmih noh ïa ka hok jong me kum ka jingshai, bad ïa ka jingbishar jong me kum ka shiteng sngi.
PROBERB 3:5
To ngeit ha U Trai da la ka dohnud baroh, bad wat shaniah ha la ka jong ka jingshemphang.
Kane ka dei ka khubor ba nga kwah ban Wanrap hapdeng jong phi ha kane ka por. Nga ngeit U Blei u la kyrkhu ïa phi. Amen
© Jester L. Mawlong | Dec 31, 2025
Comments
Post a Comment