Ka jingthait bad ka jinglwait ka wan dei haba kiei kiei kim long kumba ngi khmih lynti ba kin long. Teng teng ngi peit ia kiwei ngi i ba ki shem bha shem miat, ngi peit pat sha lade ngi shem ba kam long kumba ngi khmih lynti ba kan long.
Kane ka jia ruh ia ki khun Israel, haba U Blei u la kular ia ki ia ka ri Kanaan ki nang pyrkhat ba kiei kiei kin long beit, long jlih (smooth), pynban haba ki la mih na Ijipt ki la ia kynduh shibun ki jingeh ha kata ka jingiaid lynti jong ki, bad ym tang ki jingeh ha ka jingiaid lynti, hynrei ki la shah ring mraw ruh sha Babylon.
Ha kaba kum kata ka por ki la pyrkhat ba U Blei u la iehnoh ia ki bad la buhrieh ia ka lynti jong ki. Haba U Blei u la iohsngew ia kaei ba u Israel u ong, u la hap ban kren ia u Israel lyngba u nongiathuhlypa Isaïah ban ong, Balei me ong, ko Jakob, bad me kren, ko Israel, “La buhrieh ïa ka lynti jong nga na U Trai, bad ka jingbishar jong nga ka la jah noh na U Blei jong nga”? Isaiah 40:27
Nangta u ong shuh shuh, Mem shym la tip? Mem shym la ïohsngew? U Blei bymjukut, U Trai, U Nongthaw ïa ki bakut ka pyrthei, um sngewlwait, lymne um ju thait; ym don jingïit ïa ka jingshemphang jong u. Isaiah 40:28
U Blei u kylli ia u Israel ia kine ki jingkylli, bad u ong balei me ong kumta ko Israel, hato mem pyrkhat shaphang U Trai. U la long naduh bymjukut, u lah thaw ia kiba kut ka pyrthei baroh, hynrei um pat sngewthait lane sngewlwait, balei te me pat me lah da sngewthait me lah da sngewlwait?
Kane ruh ka long ka jingkylli jong U Blei na ka bynta jong phi ruh kiba la sngewthait bad kiba la sngewlwait ia U Blei.
Pyrkhat shaphang une U Blei u bym ju sngewthait lane sngewlwait. U la long naduh bymjukut, u la thaw ia kiba kut ka pyrthei, hynrei um pat shym la sngewthait, balei te ma ngi dang tang katta ki snem jong ka jingiaid lynti ngi lah da sngewthait?
Shuh shuh, kaba sngewtynnad ka long ba une U Blei ym dei tangba um sngewthait ialade, hynrei u kular ruh ban ai bor ia kita kiba sngewthait lane kiba sngewlwait.
Isaiah 40:29 U ai ka bor ha kiba sngewlwait; bad ha u bymdonbor u pynroi ka bor.
Lada ngi lah sngewthait, lada ngi lah sngewlwait shisha, peit sha une U Blei bym ju sngewthait, pan bor na u, u kloi ban ai bor ia phi.
Isaiah 40:30-31
Wat ki samla kin sngewlwait bad kin sngewthait, bad ki rang samla kin kyllon khoit: hynrei, kita kiba ap khmih ïa U Trai kin pynthymmai bor; kin her sha jrong da ki thapniang kum ki pukni; kin mareh, bad kin ym sngewthait; kin ïaid, bad kin ym sngewlwait.
Ka long kaba shisha ba ka jingthait ka wan lap beit ia u briew, wat ki samla ba dang khlain ka bor ruh kin sngewthait beit ha ba ka jingiaid lynti ka jlan. Hynrei U Isaiah u ong ba kita kiba nang ban peit sha U Blei ka bymjukut, U Blei bym ju sngewthait, kin
pynthymmai bor; kin her sha jrong da ki thapniang kum ki pukni; kin mareh, bad kin ym sngewthait; kin ïaid, bad kin ym sngewlwait.
Kumta ki lah ban poi shaduh ka ri jingkular, kaba long ka bneng bymjukut.
Paralok baieit, lehse ha ka jingiaid lynti jong phi, phi iohi ba kiei kiei kim long kumba phi khmih lynti, bad kane ka lah pynsngewlwait shisha ia phi. Nga ong ia phi, peit sha une U Blei ka bymjukut u bym ju sngewthait lane sngewlwait, une u long U Blei uba kular ban ai bor ia phi lada phi nang ban ap khmih bad pan bor na U, da shisha un ai bor ia phi ha kaba phin iaid, phin ym sngewlwait bad phin mareh, phin ym sngewthait.
U Blei un kyrkhu ia phi. Amen
Copyright © Jester Mawlong | January 22, 2022
Amen
ReplyDelete