Nang ban bishar thuh ia ki dak bad ki aiom

Te u la ong ha kita ki paidbah ruh, “Haba phi ïohi ïa u lyoh ba mih na sepngi, kumne kumne ruh phi ong, ‘U slap kyrthep un wan’; ka jia kumta ruh. Bad haba ka lyer na shathie ka beh, phi ong, ‘Kan sa shit kyr-ang’; ka long ruh. A phi kiba arsap, phi tip ban bishar thuh ïa ka khmat jong ka khyndew bad jong ka bneng; hynrei, kumno ba phim nang ban bishar ïa kane ka aïom." LOUKAS 12:54‭-‬56

Naduh ka por U Jisu, ki briew ki long kiba stad ban bishar thuh ia ka mariang lane ka jinglong ka suiñbneng. Haba ki iohi ia u lyoh ba mih na sepngi, ki ong, oh un sa slap kyrthep. Haba iohi ba ka lyer na shathie ka beh, ki ong, oh kan sa shit kyrang, bad ka da long ruh kumba ki batai. Hynrei kaba sngewsih ka long ba kim nang pat ban bishar thuh ia ki aiom ba kynja mynsiem.

U Jisu u pynrem ia ki Pharisi da kaba ong, phi nang ban bishar thuh ia kine kiei kiei baroh, kumno te phim nang ban bishar ia kane ka aiom? U kwah ba ki briew kin tip ym tang ia ki aiom ba kynja pyrthei, hynrei ba kin tip ruh ia ki aiom bakynja mynsiem ba kata ka por bad ka aiom ba ki im ka long ka aiom jong u Messiah.

Kane ka long ruh ia ki briew ha kine ki sngi. Manla ka sngi la ju batai ia ka jinglong ka mariang lane ka suinbneng, ba mynta ka sngi kan slap, lane kan shit bad kumta ter ter. La ju batai ruh wat ia ka jingkhih jumai, jingkhie eriong bad kiwei kiwei. Shi rukom ka long kaba sngewtynnad ban tip lypa ia kiei kiei baroh ki ban sa jia khnang ba ngin tip lypa kaei ba ngi dei ban leh. Hynrei kaba sngewsih pat ka long ba ki briew kim nang pat ban bishar thuh ia ki por bad ki aiom ba kynja mynsiem. Kim bishar, kim pyrkhat, ki im sahuh sahai i kumba ka por kan sah kumjuh.

U Paul u ong, To long kiba stad da kaba siew spah ia ka por (EPHESOS 5:15-17). Kynmaw ba ka por hi kam sah kumjuh, ka iaid sted na kawei ka aiom sha kawei pat.

Ka TLANG kan nym sah sah ka TLANG, hynrei ka PYREM kan sa wan, ka PYREM kan nym sah sah ka PYREM, hynrei ka LYIUR kan sa wan, ka LYIUR kan nym sah sah ka LYIUR, hynrei ka SYNRAI kan sa wan bad kumta ter shi ter.

Ka aiom ba kynja mynsiem ruh kam sah kumjuh, ka iaid na kawei ka aiom sha kawei pat, kumta ngi donkam ban nang ban bishar thuh ia ki aiom baroh.

U Jisu u hikai barobor ba ki briew kin nang ban bishar ia ki dak bad ki aiom. U ai ia ka pharshi u dieng dymbur bad kiwei, ba ki briew kin nang ban bishar thuh ia ki aiom ba kynja mynsiem. Shuwa ba ka lyiur kan wan, u dieng dymbur u sei lung ki sla. (Mat  24:32).

Kumjuh ruh shuwa ba ka aiom jong U Trai (jingrongnoh) kan wan, kin don ki dak ban pyni ha ngi ba ngin long kiba la khreh, pynban lada ngim nang ban bishar thuh, ngin duh noh ia ka aiom jong U Trai, bad ka jingjot ba kyndit kyndit kan ngat ia ngi. (1 THES 5:3)

Kumta ka jingkhot ka long to ngin nang ban bishar thuh ia ki dak bad ki aiom ba kynja mynsiem, ym tang ba ngin bishar ia ki aiom ba kynja pyrthei lane ia ka mariang, hynrei to ngin nang ban bishar thuh ia ki aiom ba kynja mynsiem khnang ba ngin ym duh noh ia ki aiom shong pyngngad jong U Trai. 

Ki dak ki shin ki pyni shai ba U Trai Jisu u la jan eh ban wan. To ngin pynkhreh bad ngin leh ia kaei kaba dei ban leh, khnang ba haba un wan ngin ioh ban iashem bad u bad ba ngin nym duh ia ka bneng.

click here for audio teaching

U Blei un kyrkhu. Amen

Copyright © Jester Mawlong | January 19, 2022