“¹Ha uta u angel jong ka balang ha Ephesos to thoh: Ïa kine kiei kiei ruh u ong uta uba bat ïa kita ki hynñiew ki khlur ha ka kti kamon jong u, uta uba ïaid hapdeng kita ki hynñiew ki dieng pynïeng sharak ksiar: ²“ ‘Nga ithuh ïa ki jingleh jong pha, bad ïa ka jingleh minot bad ka jingïaishah jong pha, bad ba pham lah ban shah shuh ïa ki basniew: bad pha la tynjuh ïit ïa kita kiba ong ba ki long ki apostol, bad kim long, te pha la shem ïa ki, kiba lamler; ³bad pha don ka jingïaishah bad pha la shah na ka bynta ka kyrteng jong nga, bad pham shym la sngewthait ïan. ⁴Hynrei, nga don kane kaba pyrshah ïa pha, ba pha la iehnoh noh ïa ka jingieit jong pha ka banyngkong. ⁵To kynmaw, namar kata, nangno pha la hap noh, bad to kylla-ka-bamut, bad to leh ïa kita ki jingleh ki banyngkong; lymda kumta, nga wan kloi ha pha, bad ngan pynkynriah noh ïa ka dieng pynïeng sharak jong pha na ka jaka jong ka, lada pham kylla-ka-bamut.
Ngi pule naduh ka dkhot 1 - 3, ngi iohi ki don shibun ki jinglong ba bha ba kane ka Balang ka don.
* Ka don ka jingminot ha ka.
* Ka don ka jingiaishah ha ka.
* Ka don ki jingai U Mynsiem (discerning of the spirit).
* Kam ju sngewthait ian noh.
Hynrei ha ka dkhot ba 4 ngi iohi ba dang don kawei kaba U Blei u pyrshah ia kane ka Balang.
Lehse ngi lah ban sngewlyngngoh, balei kat kitei ki jinglong ba kane ka Balang ka don U Blei u dang don kaba pyrshah?
Ka daw ka long namar ba kane ka Balang ka la iehnoh ia ka jingieit banyngkong. Kane ka jingieit ba nyngkong ka dei kata ka jingieit ba jylliew ia U Blei.
Lehse don napdeng jong ngi kiba long kum katei ka Balang, ngi don ka jingminot, ngi don ka jingiaishah, ngim ju sngewthait ian, ngi don ki jingai U Mynsiem, ngi sngewthuh lut ia kiei kiei baroh, wat ia ki jinghikai ba shukor, bad kumta ter ter, hynrei ngi la duh noh ka jingieit ba nyngkong jong ngi ia U Trai. Lada ka long kumta, donkam ban kylla bamut.
U Blei u kwah ia kane ka Balang ha Ephesos ba kan pynneh ia kata ka jingieit ba jylliew kumba ka ieit ia U ha kaba nyngkong (ba ka dang mad ia U Trai), um kwah ba kan shu leh ia kiei kiei kiba tang najrong nasla, tang ka niam ka rukom, hynrei u kwah eh ia ka jingieit bashisha bad ba jylliew ia U.
Lada ka jingieit ba nyngkong ka duh noh, kitei baroh ki jinglong ba bha kim don jingmyntoi eiei ruh em, kin long tang kum ka wiang rnong ba sawa shaw² ong u Apostol Paul. Wat lada ngin aiti ia la ka met ban thang ruh kan ym don jingmyntoi lada ngi duh noh ia kata ka jingieit ba nyngkong jong ngi ia U Blei. (1 KOR 13:1-3).
Kane ka long ruh ka jinghikai bad ka jingkhot na ka bynta jong ngi bad na ka bynta ka ïing jong phi........ ba phin pynneh ia kata ka jingieit ba janai bad ba jylliew jong phi ia U Blei kumba ngi ieit ia U ha kaba nyngkong, mynba ngi dang pdiang ia U Trai. U Blei um sngewtynnad ba kata ka jingieit jong ngi ia U kan hiar wat tang khyndiat ruh.
Ngi iohi U Blei u da pyrshah haduh katta katta lada ngi iehnoh ia ka jingieit banyngkong jong ngi ia U. Bad lada ngi iai sah ha kata kaba U Blei u pyrshah ka don ka jingma kaba khraw.
U Blei u ong ia ka Balang Ephesos ba un sa pynkynriah noh ia ka dieng pynieng sharak lada ka iai sah ha kata ka jinglong bad lada kam kylla kaba mut.
Ka dieng pynieng sharak hangne ka thew ia U Mynsiem Bakhuid. Lada kane ka Balang kam kylla bamut, U Blei un weng noh ia U Mynsiem Bakhuid na kane ka Balang. Bad ngi sngewthuh ia kane kawei, ba lada yn pynkynriah noh ia ka dieng pynieng sharak lane lada yn weng noh ia U Mynsiem Bakhuid na kane ka Balang, kane ka Balang kan don ha ka jingdum kaba khraw, namar ym don shuh u ban ialam, ban ai jingshai ia ka.
Ka long ruh na ka bynta jong ngi, lada yn weng noh ia U Mynsiem Bakhuid na ngi, ngin don ha ka jingdum kaba khraw, ngin hap ban shu iaid ruma, tare ruma, bad lada ngim kylla bamut kan ialam sha ka jaka badum tliew², ka dujok, kaba hangta yn long kaba lynniar bad kum dait bniat.
MATHAIOS 8:11-12
Nga ong ruh ha phi, ba shibun kin ïawan na mihngi bad na sepngi, bad kin ïashong shaniah lem bad u Abraham, bad u Isaak, bad u Jakob ruh, ha ka hima ki bneng: hynrei, ïa ki khun ka hima yn shop noh sha ka ba-dum jngai bah: hangta yn long kaba lynñiar, bad kum dait bniat.”
Nga pyrkhat, balei ia kine ki khun ka hima u shop shabar, hynrei ia kita kiwei u pdiang? U Trai u ai jingshai dei namar ba kine ki khun ka hima kim don shuh ka jingieit ba nyngkong ia U Blei jong ki.
Ka jingkhot jong U Blei ia katei ka Balang Ephesos ka long ba kan kylla ka bamut. Kane ka long ruh ka jingkhot na ka bynta jong ngi ba ngin phai pat sha ka jingieit ba nyngkong bad ba jylliew jong ngi ia U Blei.
Ngi iohi shuh shuh naduh ki por mynbarim, U Blei u ju pynkynmaw ia la ki briew jong U ba kin pynneh ia ka jingieit ba shisha jong ki ia U.
DEUTERONOMI 6:4-5
“To sngew, A Israel: U Trai uba U Blei jong ngi u long uwei U Trai: te men ieit ïa U Trai uba U Blei jong me da la ka dohnud baroh, bad da la ka mynsiem baroh, bad da la ka bor baroh. (Cf. Markos 12:29-30).
U Blei u donkam eh ia ka jingieit jong ngi.
Kumno ngin ioh pat ia ka jingieit ba nyngkong?
Ka jubab kaba suk ka long, "Leh biang ia ki jingleh kiba ngi ju leh mynshuwa." Kane kam mut satia ban leh biang ia ki jingleh jong ka pop, hynrei ban leh biang ia kita ki jingleh ne jingmlien ba ngi ju leh ha ka por ba ngi dang pdiang ia U Trai, ki ban ialam ia ngi sha ka jingieit ba jylliew shuh shuh ia U.
Kata ka long:
#- Pule ia ka Bible kumba ngi pule ha kaba
myn nyngkong
#- Duwai kumba ngi duwai ha kaba myn
nyngkong
#- Iasyllok paralok kumba ngi iasyllok ha
kaba myn nyngkong
#- Phla ia U Jisu bad ia ki kam phylla jong
U kumba ngi phla ha kaba myn
nyngkong
#- Bad kumta ter ter
Kine kin iarap ia ngi ba ngin ioh pat ia ka jingieit ba nyngkong bad ba jylliew ia U Trai. Kam biang tang ba ngin duwai, hynrei ngi hap ban shim ia ka sienjam ban leh biang. U Blei u ong kumta ia ka Balang Ephesos ruh. To U Blei un kyrkhu. Amen
Copyright © Jester Mawlong | 13 January 2022
Amen..
ReplyDelete