Ym don kaba kham kordor ban ia kaba leh ia ka mon jong U Trai. Ngi pule ha ka Bible ngi iohi ba ki briew kiba leh ia ka mon U Trai ki dei ki briew ba la ioh jingiaroh na U Blei, bad ym tang ba U iaroh, hynrei u da kyrkhu ruh ia ki.
Ngin ia peit mynta katto katne ki jingkyrkhu haba ngi leh ia ka mon jong U Trai.
1. Ngin long kiba suk: Ka Mari haba ka la pun ia U Jisu na U Mynsiem Bakhuid, ka la rwai da ka jingkmen, bad ka la ong, “Ka dohnud jong nga ka pynkhraw ïa U Trai, bad ka mynsiem jong nga ka shadkmen ha U Blei U Nongpynim jong nga; naba U la khmih ha ka jinglong rangli ka shakri jong U: naba, ha khmih, naduh mynta ki pateng bynriew baroh kin khot ‘kaba suk’ ïa nga." LOUKAS 1:46-48.
Da shisha ka Mari ka long kaba la kyrkhu napdeng ki kynthei, ong Ka Ktien U Blei. Ki briew ruh ki phla ba ka long kaba suk. Hynrei U Jisu u ong ba kin kham suk shuh shuh kita kiba leh ia ka mon jong U Trai. LOUKAS 11:27-28
2. Ngin long kiba la shem sngewbha ha khmat U Blei: Ngi pule ha ka gospel U MATHAIOS 3:16-17, kumno haba U Jisu u la mih na ka wah Jordan hadien ba la dep pynbaptis ia u, ka sur na bneng ka la wan kaba ong, “Une u long U Khun jong nga uba ieit, ha uba nga sngewbha eh.”
U Blei u ong ia kine ki kyntien na ka bynta U khun jong u, U Jisu ym dei satia namar ba u dei u khun marwei ba la ong ha ka gospel u IOANNIS 3:16, hynrei ka dei namar ba U Jisu u la long lakloi ban leh ia ka mon jong U kpa, kampher aiu ba wan jia ha ka jingim jong u.
Ha ka shithi sha ki nong Hebru la iathuh ia ngi shaphang U Jisu, kumno ba u la wan sha kane ka pyrthei ia ka ban leh ia ka mon U kpa.
HEBRU 10:7
Ynda kumta, nga la ong: "Ha khmih, nga la wan (ha ka jingkhylliap ka kitab la thoh shaphang jong nga) ïa ka ban leh, A Blei, ïa ka mon jong me.”
Shuh shuh ngi iohi ha kper Getsemane U Jisu u la duwai, u da ong, “Ko Kpa, lada me mon to pynphai noh ïa kane ka khuri na nga: hynrei, ym ïa ka mon jong nga, hynrei, ïa ka jong me, yn leh.” LOUKAS 22:42
Ka jinglong la kloi bad ka jingpyndem lut U Jisu ha ka mon U Kpa, ka la pynkmen bad pynsngewbha eh ia U Blei.
Ai ba kane ruh kan don ha ka jingim jong ngi, ai ba ka dohnud jong ngi kan long la kloi ban leh ia ka mon U Trai, kampher la ka long sa kumno kumno ruh. Kumta ngin shem ka jingsngewbha ha khmat jong U.
3. Ngin ioh bynta ia ka hima ki bneng: U Jisu u ong, “Ym u briew baroh uba ong ha nga, ‘A Trai, A Trai’, u ban ïoh leit hapoh ka hima ki bneng; hynrei, uta keiñ uba leh ïa ka mon U Kpa jong nga uba ha bneng." MATHAIOS 7:21
Kam biang tang ba ngin ong na ka shyntur jong ngi, Ah Trai, Ah Trai, hynrei ngi dei ban long la kloi ban leh ia ka mon U kpa. U Jisu u pynrem ia ki Pharisi namar ba ki burom ia U Trai tang na ka rmiang shyntur, hynrei ka dohnud jong ki ka jngai noh na u.
MATHAIOS 15:8
“Kine ki briew ki wan hajan jong nga da ka shyntur jong ki, bad ki burom ïa nga da ki rmiang shyntur jong ki, hynrei, ka dohnud jong ki ka jngai noh na nga."
To ngin ym long tang kum ki Pharisi, hynrei to ngin aiti ia la ka dohnud baroh ban leh ia ka mon U Trai, kata kan pyntikna ia ngi ia ka hima ki bneng.
4. Ngin iaisah bymjukut: U Apostol Ioannis u ong ba kata ka pyrthei, bad ki jingkwahbrai jong ka ki iaid jah noh, hynrei uta uba leh ia ka mon U Blei u iaisah bymjukut. (1 IOANNIS 2:17).
Ka jingkordor jong kaba leh ia ka mon U Trai ka long ba ngin iaisah bymjukut, kaba mut ba ngin ym iap shuh. Lehse ngi lah ban iap ka met, lada U Trai um pat wan, hynrei watla ngi iap ruh U Trai u ong ba un sa pynmihpat ha kata ka sngi ba khadduh bad ba ngin im junom la junom lem bad U Trai. (IOANNIS 6:39-40).
Kumta ka jingkhot ia ngi lang baroh ka long, To ngin leh ia ka mon U Trai ha ka jingim jong ngi khnang ba ngin ioh mad ia ki jingkyrkhu U Blei ha ka mynta bad ka bymjukut.
U Apostol Paul mynba u dang dei u Saul, haba u la iashem bad U Trai ha kata ka lynti sha Damoskos, u la kylli ia U Trai ban ong, Aiu me mon ia nga ban leh? KAM 9:1-6
Ai ba kane ruh kan long ka jingduwai jong ngi, ban ong, Trai aiu me mon ia nga ban leh, bad haba U Trai u pyni ia ngi ia kaba dei ban leh, to ngin leh ia kata da ka jingkmen bad ka jinglong la kloi. Nga ngeit U Trai un kyrkhu da shisha ia ngi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | January 16, 2022
Comments
Post a Comment