Ngi pule ha ka SALM 51:1-19 ngi iohi ia ka jingduwai jong U David hadien ba u Nathan u la leit ban sneng ban pynbeit ia u namar ba u la klim ia ka Bathsheba bad pyniap ruh ia u lok jong ka da kaba ia sylla bad u Jowab ban buh ia u ha khmat jong ka thma kaba khluit bha.
Ha kane ka jingduwai jong U David ngi iohi ia ki ar bynta:
1. Ka jingduwai na ka bynta ka jingmap jong U Blei.
Naduh ka dkhot ba nyngkong haduh ka dkhot khadar ngi iohi u David u la duwai ha khmat U Blei ba U Blei un isynei, un map, un pynkhuid bad pynthymmai pat ia u.
Kaba sngewtynnad ka long u David haba u Nathan u la sneng ia u, um shym la pynksan ialade, hynrei kloi lan u la pdiang (admitted) ba u la leh pop. Bad haba u la duwai ruh ha U Blei um shym la pynksan ialade lane kynnoh ia ka Bathsheba, um shym la ong satia ba dei ka Bathsheba kaba la sum pathar bad kumta ter ter ba ka sa long kumne. Hynrei u la shu pyndem rit beit ialade ha khmat U Blei da ka jingkylla kaba mut.
Bunsien ki briew haba ki leh pop, lada iasyllok ia ki, kin pynksan ialade. U Adam ruh haba U Blei u la kylli ia u balei me leh ia kane ka pop? U la ai nia ia U Blei da kaba ong ba kata ka briew (Im) kaba me hi me thaw bad me wan buh hangne ha nga, ka la ai ia nga ia uta u soh bad nga ruh nga la bam. (Jenesis 3:). Um shym la admit ia kata ka pop ba u la leh, u la pynksan ialade. Ha ka jingshisha lada un shu ong beit Trai map ia nga, nga la leh ia kane ka pop, nga ngeit U Trai un jin da la map ia u, hynrei namar ba u la pynksan ialade, la pynrem bad la beh noh ia u na ka kper Eden. Hynrei u David um shym la long kumta. Dei namar kane ka dohnud ba kloi ban pynrit bad kylla kaba mut, U Blei u la map bad klet ia kita ki pop jong u baroh.
To ngin ioh ia kaba kum kane ka dohnud, kaba kloi ban kylla bamut bad phla noh ia ki pop ha khmat jong U Blei haba ngi bakla bad leh pop ha ka jingim.
Haba ngi phla noh ia ki pop ha khmat jong U Blei, u kloi ban map bad pynkhuid ia ki pop jong ngi baroh. 1 IOANNIS 1:9
2. Ka jingkular jong U David sha U Blei.
Hadien ba u la phla ia la ki pop ha khmat jong U Blei, u David u la pynlong ruh ia ka kular ha khmat jong U Blei.
1) Ban hikai ia ka lynti jong U Trai ha ki nongpop bad ban pynphai ia ki sha U Trai
Ha ka dkhot ba 13 u ong, "Ynda kumta, ngan hikai ïa ki lynti jong me ha ki nongpalat; bad ïa ki bapop yn pynkylla sha me."
Kylli ialade ia kane ka jingkylli, haba U Trai u la map ia ki pop jong phi:
#- Katno ngut kiba nga lah hikai lem ia ki ia ka lynti jong U Trai?
#- Katno ngut nga lah pynphai pat ia ki nongpop sha U Trai?
Lada em, kata kam pat pynsngewbha ia U Trai. Phi hap ban sdang ban leit iathuh lem ia kiwei ia ka lynti jong U Trai bad ban pynphai ia ki nongpop sha U Trai. Wat ym sngewhun tangba U Trai u lah map ia ki pop jong phi. Kata kan nym pat pynhun ia U Trai, hynrei sdang ban hikai lem ia kiwei, pynphai noh ia ki nongpop na ka lynti bymman jong ki, kata kan pynhun ia U Trai.
Ka Nong-Samaria kaba klim, kaba pop haba U Trai u la map ia ka, ka la leit iathuh lem ia ki para shnong jong ka baroh, bad kata ka shnong jong ka ka la ngeit ia U Trai. (IOANNIS 4:1-42)
2) Ban rwai bad ban iaroh ia U Trai
Ha ka dkhot 14-15 u ong ong, "To pyllait ïa nga na ka jingbit snam, A U Blei, me U Blei ka jingpynim jong nga; te u thylliej jong nga un rwai jam shaphang ka hok jong me. ¹⁵A Trai, to plie ma me ïa ki rmiang shyntur jong nga; te ka shyntur jong nga kan pyni paw ïa ka jingïaroh jong me."
Dei kane kaba u David u la rwai ha ka SALM 103 ban ong ia la ka jong ka mynsiem, "Ko mynsiem jong nga to kyrkhu ia U Trai, bad wat klet ia ki jingleh ba bha jong u baroh uba map ia ki jingleh bymman jong pha baroh..."
Kaei ba u David u kular ha khmat jong U Blei, u leh ruh kumta. U la hikai ia ki lynti U Trai ia ki million million ki briew ha ka pyrthei, kiba kynthup ia ngi ruh, bun ngi la ioh nang ia ki lynti U Trai lyngba ki jinghikai u David kaba la thoh ha Ki Salm.
Kumba u la kular ban iaroh ia U Trai, u da iaroh shisha. Ngi pule ha Ki Salm ngi iohi kiba bun dei ki jingrwai iaroh jong u David. Wat ki jingrwai ba ngi rwai ruh la shna lyngba ki kyntien ba la rwai u David.
Ai kane ruh kan don ha ka dohnud jong ngi, haba u la map ia ngi, to ngin nym klet ban iaroh ia u ha ki por baroh.
Pule ia kane ka SALM 51:1-19
¹To isynei ïa nga, A U Blei, katba kum ka jingleh isynei jong me, katba kum ka jingkynrei ki jingisynei bajem jong me to pyndam noh ïa ki jingpalat jong nga. ²To sait khuid ïa nga na ki jingleh bymhok jong nga, bad to pynkhuid ïa nga na ka pop jong nga. ³Naba nga phla ïa la ki jingpalat: bad ka pop jong nga ka don ha khmat jong nga ha la ka sngi. ⁴Ïa me, ïa me hi, nga la leh pop, bad nga la leh ïa kata ka basniew ha khmat jong me: ba yn lah pynksan ïa me haba me kren, bad ba men long khuid haba me bishar. ⁵Ha khmih, la thaw dur ïa nga ha ka jingbymhok; bad ha ka pop ka kmie jong nga ka la pun ïa nga. ⁶Ha khmih, me kwah ïa ka jingshisha ha kaba shapoh; bad ha ka bynta kaba rieh men pynlong ba ngan tip ïa ka jingstad. ⁷To pynkhuid ïa nga da u Hyssop, te ngan long khuid: to sait ïa nga, te ngan kham lieh ban ïa ka ïor. ⁸To pynlong ba ngan ïohsngew ïa ka jingkmen bad ka jingsngewbha; ba kita ki shyieng kiba me la pynkheiñ kin ïoh shadkmen. ⁹To buhrieh ïa la ka khmat na ki pop jong nga, bad to pyndam noh ïa ki jingleh bymhok jong nga baroh. ¹⁰To pynlong ka dohnud ka bathymmai hapoh jong nga, A U Blei: bad to pynthymmai ïa ka mynsiem kaba beit hapoh jong nga. ¹¹Wat bred noh ïa nga na khmat jong me; bad wat shim noh ïa la U Mynsiem Bakhuid na nga. ¹²To ai pat ha nga ïa ka jingkmen ka jingpynim jong me: bad to kyrshan ïa nga da ka mynsiem kaba kylluid. ¹³Ynda kumta, ngan hikai ïa ki lynti jong me ha ki nongpalat; bad ïa ki bapop yn pynkylla sha me. ¹⁴To pyllait ïa nga na ka jingbit snam, A U Blei, me U Blei ka jingpynim jong nga; te u thylliej jong nga un rwai jam shaphang ka hok jong me. ¹⁵A Trai, to plie ma me ïa ki rmiang shyntur jong nga; te ka shyntur jong nga kan pyni paw ïa ka jingïaroh jong me. ¹⁶Namar me mem sngewmon ïa ka jingkñia; ne nga la ai ïa ka: mem sngewbha ïa ka jingainguh thang. ¹⁷Ki jingkñia ki jong U Blei ki long ka mynsiem kaba lwet: ka dohnud kaba lwet bad basngewsih, A U Blei, men ym ibeiñ. ¹⁸To leh bha ha la ka jingsngewbha ïa ka Seïon: to tei ïa ka kynroh ka Jerusalem. ¹⁹Ynda kumta, men sngewmon ïa ki jingkñia ka hok, ïa ki jingainguh thang bad ïa ka jingainguh thang kaba tylli: ynda kumta, kin ainguh da ki masi dab halor ka duwan jong me.
U Blei un kyrkhu ia phi. Amen
Copyright © Jester Mawlong| March 7, 2022
Comments
Post a Comment