Hato ngi lah ju pyrkhat, kaei ka ban pyniapher ia ngi na kiwei pat?
Ka ban pyniapher ia ngi na kiwei pat kam dei satia ka jingdon spah don phew, ka jingdon ïing dulan paki, ka jingdon kali, jingnang jingstad, ka riam ka beit lane ka dur bha briew. Hynrei ka ban pyniapher ia ngi ka dei ka jingpynsleh bad ka bor U Mynsiem Bakhuid.
Ngin ia peit na ki katto katne ki jingjia ha ka Bible kiba pyni ia ka jingiapher hapdeng jong ki.
1. Elijah: Haba ngi pule ha ka kitab 1 SYIEM 18:20-40, ngi shem ia ka jingialeh u Elijah bad ki prophet u Baal ha u lum Karmel. Hangto ngi iohi ia ki juh ki rukom ai jingknia, ki juh ki jaid Masi dab ba la pyndonkam, hynrei ngi iohi ka don ka jingiapher hapdeng U Elijah bad ki prophet u Baal.
Kaei kaba pyniapher ia u Elijah na ki prophet u Baal? Ka dei ka ding jong U Blei.
2. Ki shiphew ngut ki Theisotti: Ha ka gospel u MATHAÏOS 25:1-13, la iathuh ia ngi shaphang ki shiphew ngut ki theisotti. San ngut kiba stad bad san ngut kiba bieit.
Baroh shiphew ngut ki dei ki theisotti, kaba mut baroh shiphew ngut ki don hi ka jinglong khuid, jinglong kyntang. Ki pynkhreh kumjuh, ki ap kumjuh, ki don ia ki juh ki jaid sharak, etc, hynrei kaei pat kaba pyniapher ia ki? Ka dei ka umphniang.
Ki san ngut kiba bieit ki pynkhreh, ki ap hi, hynrei kim don ia ka umphniang. Ki san ngut pat kiba stad ki don ia ka umphniang ha ki sharak jong ki.
3. Ki sanran ha ka kamra ba haneng: Ha ka kitab KI KAM KI APOSTOL 2:1-42, la iathuh ia ngi shaphang ki 120 ngut ki sanran U Jisu kiba la iaseng lang ha ka kamra ba haneng, bad kita kiwei pat ki Jiw ki iaseng lang ha ka temple u Herod. Hynrei ka Bible ka iathuh ia ngi ba ki briew na kata ka temple u Herod ki la ia wan beh sha kata ka kamra ba haneng, haduh ba ka la pynlong ia u Petros ban ïalap ia ki bad haduh 3000 ki mynsiem ki la kylla bamut bad pyniasoh sha ka Balang.
Nga lah ban ong ba temple u Herod ka don ia ka jingitynnad ha ka, hynrei balei pat ki briew ki wan beh sha jan ka kamra ba haneng? Ka daw ka dei namar ba ka don ka jingtrei U Mynsiem Bakhuid.
Jingpynkut: Ha baroh kitei ki jingjia ba ngi pule ha ka Bible ngi iohi ia ka jubab ba ka daw kaba pyniapher ia ki ka dei U Mynsiem Bakhuid.
Ha u Elijah u paw kum ka ding. Ha ki san ngut ki theisotti u paw kum ka umphniang. Ha ki synran u paw kum ka thylliej ding. Hynrei ha baroh kitei ki jingjia, ka thew hi ia ka bor U Mynsiem Bakhuid.
Kumta ban pynkut ia kane ka khubor ka long, ba ngi ruh ngi donkam kyrkieh eh ia U Mynsiem Bakhuid, ka bor bad ka jingpynsleh jong U, khnang ba ka jingim jong ngi ruh kan don ka jingiapher na kiwei pat.
Ka jingkyntu ka long - To ngin thrang, ngin sliang ia ka jingpyndap U Mynsiem Bakhuid kaba na ka por sha ka por, kam biang tang ba ngi lah mad (experience) shisien, hynrei ban long kiba la iai pyndap ha ka jingim jong ngi man ka sngi.
U Blei un kyrkhu bad pyndap ia phi da U Mynsiem Bakhuid. Amen
Copyright © Jester Mawlong | March 8, 2022
Comments
Post a Comment