2 Ki Syiem 6:1-7
¹Te ki khun ki nongïathuhlypa ki la ong ha u Elisha, “Ha khmih te, kane ka jaka ba ngi shong ha khmat jong me ka khim eh ïa ngi. ²Ngi kyrpad ïa me, to ngin ïaleit sha Jordan, bad ngin rah nangta mar uwei uwei u bim, bad ïa, ngin ïathaw jaka hangta, ha kaba ngi lah ban ïashong.” Te u la ong, “To leit.” ³Te uwei u la ong, “Nga kyrpad ïa me, to sngewbha ban leit lem bad la ki shakri.” U te u la ïathuh, “To ngan leit.” ⁴Kumta, u la leit lem bad ki. Te ynda ki la ïapoi ha Jordan, ki la ïapom dieng. ⁵Hynrei, katba uwei u la dang khet ïa u bim, u sdie u la hap shapoh um; te u la pyrta, bad u la ong, “Waw, ko kynrad! namar uba la shu ïapan shibit.” ⁶Te u briew jong U Blei u la ong, “Ha-ei u la hap?” U te u la kdew ïa u ka jaka. Te haba u la pom u dieng, u la pashat ïa u shata, bad u la pynper ïa uta u nar. ⁷U la ong te, “To shim ïa u sha me.” Kumta, u la kner ïa la ka kti, bad u la shim ïa u.
Ha kane ka lynnong bad ki dkhot la iathuh ia ngi shaphang kita ki khun ki nongiathuhlypa kumno ba ki la ju don hajan jong u Elisha Nongiathuhlypa ban ioh jinghikai na u man ka sngi. Kumta ha kawei ka sngi kine ki khun ki nongiathuhlypa ki la ong ia u Elisha ba un shah ba kin leit pom dieng na khlaw ba kin shna ïing namar ba kata ka ïing kaba ki ju ia shong baroh shikatta, ka lah rit palat bad ka lah khapngiah. Kumta ha kawei ka sngi ki la ia kut ban leit pom dieng bad ki la iawer ruh ia u Elisha ba un ia leit lang, bad u Elisha ruh u la leit lem bad ki.
Kaei kaba jia ka long katba ki dang ia pom dieng, uwei na kita ki khun ki nongiathuhlypa katba u dang pom, kyndit kynsan u sdie jong u (uba shu iapan na ki paralok) u la hap noh shapoh um (namar ka jaka ba ki leit pom dieng ka dei harud ka wah Jordan), kumta une u briew u la pyrta ia u Elisha ban ong, “Waw, ko kynrad! namar uba la shu ïapan shibit.”. Bad u Elisha u la kylli ia u haei ba u hap uta u sdie, bad uta u briew u la pyni ha u Elisha ia ka jaka ba la hap uta u sdie. U Elisha u la pom u dieng bad pashat shata ba hap uta u sdie, bad kumta hi uta u sdie u la per ha sla um, bad u la ong ia uta u briew ban shim biang ia uta u sdie, bad u la ioh pat.
Ka jinghikai ba ngi ioh nangne ka long:
#-1. Une u briew u sngewthuh ba u sdie jong u u la hap noh.
#-2. Haba u la sngewthuh ba u sdie jong u u la hap, um shym la lehraiñ ban iathuh ha u briew jong U Blei.
#-3. Haba u la iathuh, u la ioh biang ia uta u sdie ba la hap.
U sdie hangne nga pynsyriem bad ka jingpynsleh, ka bor bad ka iktiar jong U Trai.
Bunsien ngim sngewthuh ba ka jingpynsleh kam don shuh ha ngi, kumta ngi pyrshang ban pom dieng da la ka bor jong ngi, ngi ialap, ngi hikai, ngi ialam ia ka jingmane da ka bor jong ngi, (ngi pyrshang ban pom dieng tang da ka spieng, khlem u sdie). Phi tip lada ngin pom kumta, da lei lei ngin nym lah ban pyndkut. Ngi donkam ban sngewthuh, hato ka jingpynsleh ha nga ka dang don, ne ka lah jah noh?
Lada ngi la sngewthuh ba ka lah jah, ngi dei ban long shlur ban iathuh ha U Blei, iathuh ha ki briew jong U Blei, ba kin duwai na ka bynta jong ngi ba ngin ioh biang ia kata ka jingpynsleh, ba ngin ioh biang ia kata ka bor bad ka iktiar kaba ngi la duh noh. To ngin nym pyrshang ban shu tap eitmiaw ban leh kum bym lei lei, kumba ngi dang don u sdie, ngin ialap, hikai, rwai tang da ka bor jong ngi, kata kan nym poi shano shano, donkam ban long shlur ban ym lehraiñ kumba long une u khun ki nongiathuhlypa.
Haba ngi leh kumta, da shisha ngin ioh biang ia kata ka jingpynsleh U Trai, ngin ioh biang ia ka bor bad ka iktiar jong U Trai.
Jingphla: Nga shisien nga la long kumta, ha kaba u sdie (jingpynsleh) kam don shuh, hynrei nga leh kumba ka dang don, nga shakri, nga tem, nga rwai kum bym lei lei. Hynrei ha kawei ka por U Blei u ktah ia nga bad ha kaba jylliew ka don ka jingpynrem. Nga ainguh ia U Blei ba u kren bad ktah ia nga ba ngan sngewthuh ba khlem ka jingpynsleh jong U, ka jingshakri jong nga kan nym poi shuh shaei shaei. Kumta nga la kyllabamut bad pan bor na U Blei sa shisien pat, bad U Blei ruh u la pynioh pat ha nga ia uta u sdie (jingpynsleh) ba nga lah duh noh bad nga la ieng ban shakri haduh mynta ha kata ka bor bad ka jingpynsleh U Trai, bad ka la wan pat kata ka jinghun bad ka jingbang ban shakri ia U. Hallelujah
Nga duwai ba U Blei un pyniohpat bad un pynthymmai pat ha phi ia kata ka jingpynsleh jong U, ba phi lah ban shakri kumba dei ban shakri.
To U Blei un kyrkhu ia phi lyngba kane ka jinghikai ba lyngkot ha kane ka por. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | Aug 27, 2023
Comments
Post a Comment