Ngin ia peit mynta na ka jingshakri jong u Philip, kumno ba u Philip u la shakri bad iaid ha ka jingialam U Mynsiem, bad kata ka jingshakri jong u ngi iohi ba ka shu tuid kumba tuid ka um, kam sangeh.
Ngin pule na ka kitab Ki Kam ki Apostol 8:4 ter ter, hangne ngin shem kumno ba u Philip u la shakri ha ka jingialam U Mynsiem Bakhuid.
KI KAM 8:4-5 KHB
⁴Namar kata, kita ïa kiba la pynsakma, ki la leit kylleng kylleng, ki da ïalap ïa kata ka ktien. ⁵Bad u Philip u la leit hiar sha ka shnong Samaria, bad u la ïalap ïa U Khrist ha ki.
Haba ka jingpynshitom beiñ ka la jia ia ki bangeit ka Balang ba nyngkong, ki bangeit ki la sakma kylleng, hynrei kaba sngewtynnad ka long sha kano kano ka jaka ba kine ki bangeit ki poi, ki ialap ia ka gospel. Hallelujah!
Ngi shem u Philip ruh u dei uwei napdeng kine ki bangeit. Une u Philip u la poi sha Samaria, bad haba u la poi hangta, u la ialap ia ka gospel U Khrist. Shibun ki mynsiem bakordor ki la phai sha U Trai, ki kambah ki la jia lyngba ka jingshakri jong u Philip.
KI KAM 8:6-8
⁶Te ki paidbah ki la shahshkor da kawei ka jingmut, ïa kita kiei kiei ruh kiba la kren da u Philip, haba ki la ïohsngew bad ki la ïohi ïa kita ki dak khyllah kiba u la leh. ⁷Namar ki mynsiem bymkhuid haba ki la pyrta da ka ktien bajam, ki la mih noh na shibun ha kiba ki la ju shong; shibun kiba la pang ïapshiliang, bad ki ba-dkoh, la pynkhiah. ⁸Te la don ka jingkmen bakhraw ha kata ka shnong.
Katba ka jingialap ka dang iaid, ki mynsiem ki dang kylla bamut, U Mynsiem Bakhuid u la phah noh ia u Philip sa shawei pat ka jaka (kaba long ka ri khlaw) ong ka ktien U Blei, bad haba u Philip u la kohnguh ia kata ka jingtip U Mynsiem Bakhuid, u la iashem ia u Ïunukh, bad u la iasyllok ia u, ha kaba une u Ïunukh ruh u la kylla bamut bad la pynbaptis ia u.
KI KAM 8:26-40
²⁶Hynrei u angel U Trai u la kren ha u Philip, u da ong, “To ïeng joit, khie leit ruh shaphang shathie, sha kata ka lynti kaba leit hiar na Jerusalem sha Gasa” (kata ka long ka ri khlaw). ²⁷Kumta, u la ïeng bad u la leit; te ha khmih, u briew na Ithiopia, u Ïunukh uba khraw bor hapoh ka Kandasi, ka syiem ki nong Ithiopia, uba la long halor ka jingkynshew jong ka baroh, uba la wan ban mane sha Jerusalem"
Ha ka dkhot ba 36-38 ngi iohi ba la pynbaptis ia u Ïunukh. Nangta mar sien dep pynbaptis, U Mynsiem Bakhuid u la rah (ialam) noh ia u Philip sa sha kawei pat ka jaka kaba kyrteng ka Asotos, bad hangta ruh ngi iohi ba u Philip u la ialap ia ka gospel, bad nga ngeit hangne ruh kiba bun ki mynsiem bakordor ki phai sha U Trai. Nangta ngi iohi ha ka jingialam U Mynsiem, u la iaid ter ter haduh ba un da poi ha Kaisaria.
Hangne ngi iohi ia ka jingkordor haba ngi iaid bad shakri ha ka jingialam U Mynsiem. Ka da don ka jingseisoh (breakthrough) kaba khraw kat shaba leit. Kaba phylla ka long haba ngi iaid ha ka jingialam U Mynsiem Bakhuid, wat sha ri khlaw (desert), ka jaka bym ju shong briew ruh ka don ka jingseisoh (breakthrough). Bunsien lada ngi shu iaid tang da ka jingsngew lane jingpyrkhat briew ngin jied beit ban leit tang sha ki jaka ba bun briew, ba ialam briew, kata ka dei kaba ngi ju leh. Hynrei haba U Mynsiem u ialam wat sha ka jaka kaba ngim sngew don briew ban sngap ia ka jingialap jong ngi, hynrei ka don ka jingseisoh.
Nga duwai ba U Blei un ai ha ngi ka jinglah ban sngewthuh ia ka sur bad jingialam U Mynsiem khnang ba ka jingshakri jong ngi kan nym shu long lehnohei (wasted), hynrei ban iohi ia ka jingseisoh bad ka jingjop ia ki mynsiem bakordor sha U Trai.
U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | August 15, 2023 | 10:20 AM
Comments
Post a Comment