Kat kaba phin leh, to leh naduh ka dohnud

Ka Ktien jong U Blei ka hikai ba lada ngi leh eiei, khamtam ha kaba iadei bad ka jingshakri ia U Trai, ngi dei ban leh da ka dohnud baroh, ym ban leh tang dep rukom. La ka long ha ka ban kren ia ka Ktien U Blei, la ka long ha ka jingrwai jingtem ban iaroh iu Trai, ne kano kano kaba ngi leh, ngi dei ban leh da ka dohnud, da ka mynsiem baroh.

KOLOSSAI 3:23‭-‬25

²³Kat kaba phin leh, to trei naduh ka mynsiem, kumba ha U Trai, bad ym ha ki briew; ²⁴haba phi tip ba na U Trai phin ïoh pdiang ïa ka bainong jong kata ka bynta: naba phi shakri ïa U Khrist uba U Trai. ²⁵Namar uta uba leh bymdei, un pdiang pat na ka bynta kata ka bymdei kaba u la leh; bad ym don ka jingñiew shiliang khmat. 

Note: Leh da ka dohnud ka mut, leh da ka jingshitrhem.

Bunsien ngi hap ha ka jingpynshoi, ban ong oh leh malu mala, leh tang ban dep namar ka dei ka program kaba rit, namar ba ka dei ka program jong ki briew kaba nga shu leh namar bym lait ki briew. Kane ka jingmut ka long kaba bakla.

Nga ioh ia ka jinghikai na ka tyre spare. Ka tyre spare watla ki briew ki pyndonkam (use) ia ka tang haba ka tyre babha kam long shuh (puncture), hynrei kam ju ong ngan leh tang dep, hynrei phin shem katba ka lah ei la i bor kan ialeh ban pynpoi suk ia ki briew sha ka jaka ba dei ban poi (destination). Kampher wat la ki briew ki loit noh ia ka ynda kaba bha ka la long, kam ju don jingsngew. Ai kane kan long ka nuksa ia ngi haba ngi leh eiei, ngin nym da peit eh ki briew kin ong kumno, kin iaroh ne kim iaroh, leh ia kaei kaba dei ban leh kum ha khmat U Trai, namar na U Trai ngin ioh ia ka bainong, ong u Apostol Paul. (v.24)

U Apostol Paul u ong biang, ba uta uba leh bymdei ia phi, un ioh diang hi la ka bainong. (v.25). 

U Ekklesiastis ruh u pyni ia ka jingdonkam ban leh ia kiei kiei baroh da ka dohnud (borbah), namar ynda ngi la iap bad poi ha jingtep, ngin nym lah shuh ban leh eiei. Kumta katba U Blei u dang pynsah ia ngi ha kane ka pyrthei, katba ka bor jong ngi ka dang biang, ngi donkam ban leh ia kiei kiei baroh da ka buit, ka bor, bad ka jinglah jong ngi baroh.

EKKLESIASTIS 9:10

Kaei kaei baroh ba ka kti jong me ka shem ban leh, leh ïa kata da la ka borbah; namar ym don ka kam, lymne buit, lymne ka jingtip, lymne ka jingstad, ha ka jingtep, sha kaba me leit.

Paralok baieit, lada phi la ju mlien ban leh tang dep ia ka kam U Trai, phi la shu leh tang ban pyndep rukom, kylla bamut noh, bad sdang ban shakri bha ia U Trai, bad leh ia kiei kiei baroh da ka dohnud jong phi baroh, wat nym peit bainong na ki briew, tip ba na U Trai phin ioh diang ia ka bainong kaba biang. Wat nym klet ba U Blei u buh jingkynmaw ia kawei pa kawei kaba ngi leh, bad ha kaba kut un sa ai bainong ia ngi bad da lei lei un nym klet ia kaei kaba ngi leh.

HEBRU 6:10

namar U Blei um long u bymhok ba un klet ïa ka jingleh jong phi bad ïa kata ka jingieit kaba phi la ïa-pyni sha ka kyrteng jong u, ha kaba phi la shakri ïa ki riewkhuid, bad ba phi ïaishakri ruh.

U Trai u long u Nongbishar bahok ong u Apostol Paul.

2 TIMOTHI 4:8 KHB

Naduh mynta, ïa nga la buh ïa kata ka pansngiat jong ka hok, ïa kaba U Trai, uta U Nongbishar bahok, un ai ha nga ha kata ka sngi: bad ym tang ha nga hi, hynrei, ha kita baroh ruh kiba ieit ïa kata ka jingmihpaw jong u.

To U Blei un kyrkhu bad pynshaitbor ia phi ba phi lah ban leh ia kiei kiei baroh da ka dohnud jong phi baroh, na ka bynta ka burom jong U Blei. Amen

© Jester Mawlong | Aug 21, 2023