Hato phi la ju rwai ia ka jingrwai kiew kyrdan? Lada phi la rwai, kaei ka jingrwai kiew kyrdan kaba phi rwai?
Ha kawei ka sngi katba nga dang wan phai na ka jingleit ministry, U Trai u la pynkynmaw ia nga shaphang ka 'jingrwai kiew kyrdan' ba la thoh ha ka kitab Salm. Hooid nga la ju iohi ia kane lah slem, hynrei ngam ju da pyrkhat jylliew, hynrei ha katei ka sngi ka shu wan kane ka jingkynmaw shaphang kane ka kyntien, 'ka jingrwai kiew kyrdan', bad kane ka la ktik ia nga ba nga ruh nga donkam ban rwai bad iai rwai ia kane ka jingrwai kiew kyrdan.
Lehse phi lah ban pyrkhat, kaei kata ka jingrwai kiew kyrdan? To ngin ia peit bad nga katto katne kita ki jingrwai kiew kyrdan ba ngi dei ban rwai.
#-1. Ka jingkiew kyrdan na ka pop
Ka jingrwai kiew kyrdan kaba nyngkong kaba ngi dei ban rwai kadei ka jingrwai kiew kyrdan na ka pop. Shisien ngi la long ki nongpop, ngi la ngam ha ka pung ktieh ahor jong ka pop, kiba la dei ban shah rai pynrem sha dujok ding bymjukut, hynrei da ka jingaiei U Jisu Khrist la kyntiew kyrdan noh ia ngi na ka pop sha ka hok kaba da U Jisu Khrist. La map noh ia ki pop jong ngi baroh. KOLOSSAI 1:13-14
Haba U Trai u la kyntiew kyrdan ia ngi, ka dei ia ngi ban rwai kumba U Syiem David u rwai, ban ong, ¹Ko mynsiem jong nga, to kyrkhu ïa U Trai; bad baroh kaba ha nga, ïa ka kyrteng bakhuid jong u. ²uba map ïa ki jingleh bymman jong pha baroh, uba shna ïa ki jingpang jong pha baroh; ⁴uba pynim ïa ka jingim jong pha na ka jingjot; uba pynphong pansngiat ïa pha da ki jingleh isynei bad ki jingisynei bajem: SALM 103:1, 3-4
#-2. Ka jingkiew kyrdan na ka bym long
eiei
Ngi iohi ha ka Bible kumno ba U Blei u kyntiew kyrdan wat ia kita ki bym long eiei ha ka pyrthei. Ki synran U Jisu kiba bun ki dei kiba bieit, ki bym don jingnang jingstad (illiterate), ki bym long eiei (KAM 4:13), ki nongtong dohkha (MAT 4:18), hynrei U Blei u khot bad u pyndonkam ia ki, u kyntiew ia ki na kata ka jingbymlong eiei sha ka jinglong eiei na ka bynta U Trai.
Kiba bun na ngi ruh kiba long kumta, ngi long ki bym long eiei ruh em ha ka pyrthei, hynrei U Trai u kyntiew ia ngi, u pyndonkam ia ngi. Hato kat kata, kam dei ia ngi ban rwai ia ka jingrwai kiew kyrdan ban ainguh ia U Trai?
#-3. Ka jingkiew kyrdan ha ka jingshakri
Kawei pat ka jingrwai kiew kyrdan kaba ngi hap ban rwai ka dei 'ka jingrwai kiew kyrdan ha ka jingshakri ia U Trai'.
Ngi donkam ban ïit ialade ha kaba iadei bad jingshakri ia U Trai, Hato ka don ne em ka jingkiew kyrdan ha kane ka bynta? Ka don ne em ka jingsan ba kynja mynsiem, ne ngi sah kumjuh?
Lada ngi sah kumjuh, ngim shym la kiew kyrdan ha ka jinglong mynsiem bad ka jingshakri ia U Trai, ngi hap ban kylla bamut, bad duwai ba U Blei un kyntiew kyrdan ia ngi ha ka jinglong mynsiem bad ba ngin sdang ban rwai ia kata ka jingrwai kiew kyrdan. Ym ba ngin sngewtynnad ban rwai ia ka jingrwai kiew kyrdan tang ha ki jingkyrkhu ba iadei bad ka met (materialistic), hynrei kham tam ba ngi ioh ban rwai ia ka jingrwai kiew kyrdan jong ka mynsiem.
U Blei um sngewtynnad ba ngin sah hajuh. U maham ia ka Balang ha Laodikaïa namar ba ka sah kumjuh. U Blei u ong, ¹⁵“Nga ithuh keiñ ïa ki jingleh jong pha, ba pham long kaba khriat lymne kaba shit: A nga da kwah dik dik ba phan da long kaba khriat lane kaba shit! ¹⁶Kumta, naba pha long kaba shu syaid, khriat ruh em, shit ruh em, ngan sa prie noh ïa pha na ka shyntur jong nga." JINGPYNPAW 3:15-16
Nga duwai ba U Blei un kyntiew kyrdan ia phi kiba pule ia kane ka article jong nga ha ki liang baroh.
To U Trai un kyrkhu bad kyntien kyrdan ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | Aug 17, 2023
Comments
Post a Comment