Iaroh ia U Trai hapdeng jong ka eriong

Iaroh ia U Trai hapdeng jong ka eriong

Ngi la ju kren, ngi la ju iohsngew shaphang ka jingsuk hapdeng jong ka eriong bad kiwei kiwei ki subject kiba kren shaphang ka eriong. Ka long ruh kaba donkam ban iohsngew shaphang ka jingiaroh hapdeng jong ka eriong.

Ka jingiaroh, ka jingainguh ia U Trai ka long ka mon jong U Blei bad ka dei ruh kaba u da sngewbha eh ia U.

1 Thes 5:18, "Ha kaei kaei baroh to phin ai ka jingnguh: namar kane keiñ, ka long ka mon U Blei ha U Khrist Jisu sha phi."

Salm 69:30‭-‬31, "Ngan ïaroh ïa ka kyrteng U Blei da ka jingrwai, bad ngan pynkhraw ïa u da ka jingainguh. Te kan kham pynsngew- bha ïa U Trai ban ïa u masi lyngraw, lane u masi dab uba don bad reng bad khnap."

Ka jingiaroh ka long kaba suk ban leh haba ngi koit ngi khiah, bad haba kiei kiei baroh ki iaid beit iaid ryntih. Haba ngi mad jingkyrkhu, hangto hangto hi ka jingainguh bad ka jingiaroh kan shu mih la mih hi. Hynrei haba ki eriong ha ka jingim ki wan, ka long kaba kham eh ban ainguh bad rwai iaroh. Kata ka long natural ia u briew. Hynrei ngi donkam ban tip ba ka jingiaroh ka long kaba U Blei u kwah na ngi ha ki por baroh. La ka long ha ka por basuk bakmen ne ha ka por ba jynjar, bad kumta ter ter.

Lada ngi peit ha ka Ktien U Blei ngi iohi kumno ba ki briew jong U Blei ruh ki mad ia ki eriong ha ka jingim jong ki, ki jingpang jingshitom, jingiap jingduh, jingshah leh-beiñ, jingshah sympat bad kumta ter ter, hynrei ngi iohi kumno ba ki la nang ban iaroh ia U Trai wat ha kiba kum kita ki por.

Ngin ia peit katto katne ia ki briew jong U Blei kiba la iaroh ia U Trai wat hapdeng jong ka eriong jong ka jingim.

1. U David: U la shah beh beiñ ha u Saul haduh ba u la hap ban phet rieh da ki snem ki snem sha ki krem bad ki jaka bapher bapher. Hynrei ngi iohi ba watla u don ha krem ruh u rwai iaroh ia U Trai, ha kaba u la thaw ruh ia kiba bun ki Salm na kata ka krem. Bad ha ka Salm 34 u ong, Ngan kyrkhu ïa U Trai ha la ka sngi. Ha ka English translation ka ong, I will bless the Lord at all times. Kaba mut ha ki por baroh.

2. U Job: U dei u briew u ba la mad ia ki eriong kiba khraw haduh katta katta. La iap ki khun, la iap ki shakri, la iap ki jingri, lah sniew lut ka kam ka jam, bad u la pang sa ban iap. Hynrei u ong,a U Trai u shim ne u ai ruh ngan iaroh ia U Trai." 

Nga lah ban ong ba kane ka dohnud ka la pynkmen eh ia U Blei haduh ba u la kyrkhu pat ia u Job arshah ban ia kaba mynshuwa. (Kitab u Job)

U Habakkuk u ong, "Naba la un ym phuh syntiew u dieng Dumbur, lymne yn ym shem soh ha ki dieng Waiñ; ka jingminot u dieng Olib kan duh, bad ki lyngkha kin ym pynmih jingbam; ïa ki langbrot yn pynduh noh na ki jingker, bad kin ym don masi ha ki sem: pynban, ngan shadkmen ha U Trai, ngan leh kmen ha U Blei ka jingpynim jong nga." Habakkuk 3:17‭-‬18 

3. U Apostol Paul: U la mad ia ki jingshah kren-beiñ, jingshah sympat beiñ, bad u la shah set byndi bunsien, hynrei ngi iohi wat ha byndi ruh u rwai iaroh ia U Trai ryngkat bad u para ba iatrei lem bad u, u Silas. (Kam 16:16….) 

U kyntu ruh ia ki bangeit ba kin nang ban lehkmen ha la ka sngi (ha ki por baroh). 

Philipi 4:4 To phin ïakmen noh ha U Trai ha la ka sngi; te nga ong pat, “To ïakmen.”

Kumno ngi lah ban iaroh ia U Trai hapdeng jong ka eriong?

#-1. Sngewthuh ia ka jingieit jong U. Ka jingsngewthuh ia ka jingieit U Jisu u ba la iap ïapli na ka bynta jong ngi kan pynlong ia ngi ruh ba ngin iaroh ia U wat hapdeng ki jingeh ne eriong ba wan ha ka jingim jong ngi.

#-2. Sngewthuh ba kane ka met ka long tang ka ïingtrep, ka don ka ïing shongneh ba khambha ban ia kane.

#-3. Ka jingiarap jong U Mynsiem Bakhuid. 

Nga duwai ba U Blei un pynlah ia ngi ban iaroh ia U wat hapdeng jong ki eriong jong ka jingim. Amen 🔥

© Jester Mawlong | August 15, 2024