Kumno ngi lah ban im khuid hapdeng ka pateng bynriew kaba tngit?
Haba ngi phai sawdong ngi shem ba kane ka pyrthei ba ngi im ka la nang tngit nang tngit katba nang mih ki sngi, la ka long ha ka mariang bad ruh ha kaba kynja mynsiem kumjuh. Pynban ha kane ka por ngin nym ia kren ia ka jingtngit ka mariang lane ki sawdong sawkun, hynrei ngin ia kren ia ka jingtngit ha kaba iadei bad kaba kynja mynsiem.
Ka Bible ka ong na ka kitab Jingpynpaw 22:11 Uta u bymhok, to un nang leh bymhok: bad uta uba tngit, to un nang tngit: bad uta u bahok, to un nang leh hok: bad uta u bakhuid, to un nang khuid.”
Kam ong satia, oh namar ba ka pyrthei mynta ka lah tngit, to ia tngit lang noh, ym lah leh eiei. Hynrei ka ong, uta uba tngit to un nang tngit, (ym lah leh eiei), hynrei uta uba hok, to un nang leh hok. Kata ka dei kaei ba ka Ktien jong U Blei ka hikai.
Kumta ka jingkylli ka long, Kumno ngi lah ban im khuid hapdeng ka pateng bynriew kaba tngit?
Ba ngin ioh ia ka jingmut, to ngin ia phai sha ka jingim jong U Daniel. U Daniel u dei uwei na kita ki samla uba la lah ban ri khuid ia lade wat haba u don ha ka ri nongwei, ka ri ka bym tip Blei. Ngi kynmaw ha ka por ba u la shah jied ban ieng ha khmat u syiem Nebukhadnessar, kumno ba u syiem u la hukum ba dei ban ai bam ia u da kita ki jingbam syiem, bad da kata ka waiñ ba u syiem u ju dih, hynrei u Daniel um shym treh ban bam bad ban dih ia kita ki jingbam syiem.
Ka Bible ka ong, u la thmu ha ka dohnud ban ym pyntngit ia lade da kita ki jingbam syiem. Daniel 1:8
Kaei kaba pynlong ia u ba u lah ban ym pyntngit ia lade?
1. Namar u tip ialade uei u long.
U Daniel u tip uei u long, u sngewthuh ia lade u wan na ka jaid Judah, kata ka jaid kaba bat bha ia ka jinglong khuid jinglong kyntang, namar ki dei na ka jaid lyngdoh. Kumta wat haba u la poi sha kawei ka ri ruh u sngewthuh ia lade uei u long, kumta u bat skhem ia kata ka jingsngewthuh bad u la ri khuid ia lade.
Balei kiba bun ki bangeit lane ki Khristan ha kine ki sngi (kham tam ki samla) kim lah ban ri khuid ia lade, ki ia im lang kumba ka pyrthei ka im, ki bam kumba ka pyrthei ka bam, ki riam kumba ka pyrthei ka riam, ki leh kumba ka pyrthei ka leh? Ka daw ka dei namar ba kim sngewthuh ia lade kiei ki long. Ki dei ki khun jong U Blei ne ki dei ki khun jong u Soitan, ki khun ka pyrthei?
Ka Bible ka iathuh ia ngi ba naduh ba ngi la ngeit bad pdiang ia U Jisu ngi la long ki khun jong U Blei.
ÏOANNIS 1:12
Hynrei, kat kiba la pdiang ïa u, ha kito, u la ai bor ban long ki khun U Blei, kata, ha kita kiba ngeit ha ka kyrteng jong u.
Bad ha ka shithi u Petros la ong ba ngi dei na ka longïing lyngdoh, na ka jaid bynriew kaba khuid.
1 PETROS 2:9
Hynrei, ma phi, phi long ka kynja ba la jied, ka jinglong lyngdoh bakynja syiem, ka jaid bynriew bakhuid, u paidlang ba dei eh la u jong hi, ba phin da ïoh pynpaw ïa ki jingbha kor tam jong uta uba la khot ïa phi na ka jingdum sha kata ka jingshai baphylla jong u.
Lada ngi sngewthuh ba ngi dei ki khun jong U Blei, ngi dei na ka jaid bynriew ba khuid, na kata ka longïing jong ki lyndoh ba kynja syiem, ngim dei ban ia kit lyngkor lem bad ki bym ngeit lane bad ka pyrthei.
2 KORINTH 6:14-15
[14] To wat long phi ki para bakit lyngkor lem bad ki bymngeit; namar ka hok ka don ka jingïalok aïu bad ka bymhok? bad ka jingshai ka don ka jingïasyllok aïu bad ka jingdum? [15] Bad U Khrist u don ka jingïadei aïu bad u Belial? lane u bangeit u don bynta aïu bad u bymngeit?
Ka jingkhot ka long, to ngin tip ba ngi long ki khun U Blei, kiba la thied noh ia ngi da ka dor bah ka snam U Jisu. Kumta ngim dei ban pyntngit ia lade.
2. Namar u dei u briew uba don ka
jingthmu lane ka jingkut jingmut.
Haba ngi lah tip uei ngi long, kumta ngi donkam pat ban don kata ka jingthmu lane ka jingkut jingmut ba da lei lei ngan ym pyntngit ia lade, la ka long ha kano kano ka rukom ruh, ban iaibat ia kata ka jinglong khuid bad kyntang.
U Daniel u la bat skhem ia kata kaba u thmu. Mut dur, shiphew sngi kynthih un bam tang da u ri bad ka um. Kita kiwei lehse katba u Daniel u dang bam kynslup ia uta u ri bad ka um, lehse kin ia peit bad rkhie sammut ia u, hynrei u Daniel um shym la pyrkhat aiu ki briew kin ong shaphang jong U, hynrei u kham pyrkhat aiu U Blei un ong ia u.
Kata ka long kaba kongsan, kum ki bangeit to ngin nym da pyrkhat aiu ka pyrthei kan kren ia ngi lada ngim im kumba im ma ki, lada ngim leh, lada ngim riam bad ngim bam kumba bam ma ki, hynrei to ngin kham pyrkhat aiu U Blei u kren shaphang jong ngi.
To ngin nym wad ia ka jingïaroh ki briew, hynrei to ngin wad ia ka jingïaroh jong U Blei.
3. U don ka jingsheptieng Blei.
Kaba lai kaba la pynlah ia u Daniel ban ri khuid ia lade wat hapdeng ka pyrthei kaba tngit ka dei ka jingsheptieng Blei jong u. U don kata ka jingsheptieng ia U Blei ban ia kaba sheptieng ia u briew. Kata ka jinglong ba sheptieng Blei jong u ka la pynlong ia u ba u lah ban ri khuid ia lade la iap la im ruh. Kaba sngewtynnad ka long ba U Blei uba iohi ia kata ka jinglong jong u Daniel, u la pynshem sngewbha ia u ha ki briew baroh, wat ha khmat jong ki syiem, haduh ba u la ioh ia ka jingkyntiew kyrdan (promotion) ban long kum uwei na ki nongsynshar ha ri Babylon.
Ai kane ka long ka jingai mynsiem ruh na ka bynta jong ngi, haba ngi nang ban sheptieng ia U Blei, U Blei un ai ha ngi ia ka jingshem sngewbha, bad kan don ruh ka jingkyntiew (promotion) jong U Blei la ka long ha kano kano ka bynta ruh.
Ka kitab Proberb ka ong haba ngi don ka jingsheptieng ia U Blei, ngi kiar bad ngi shun ia kaba sniew.
Proberb 8:13
“Ka jingsheptieng ïa U Trai long ban shun ïa ka basniew…”
Proberb 16:6
“...bad da ka jingsheptieng ïa U Trai, ki briew ki kynriah na ka basniew.”
Nga ngeit kine ki point ki la iarap ia ngi Kumno ba ngi lah ban im khuid hapdeng ka pateng bynriew kaba tngit.
U Blei un kyrkhu ia phi baroh, Amen.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | September 1, 2024
Comments
Post a Comment