Ki sngi ba ngi im mynta
Nga kwah ban ia peit katto katne na ka Ktien U Blei ha kaba iadei bad kine ki sngi ba ngi im mynta. Aiu ka Bible ka ong lane ka batai shaphang kine ki sngi ba ngi im mynta.
1. Ki sngi kiba sniew
Ka Bible ka iathuh ia ngi ba kine ki sngi ba ngi im mynta ki dei ki sngi kiba sniew.
EPHESOS 5:15-16
[15] To khmih bha te kumno phi ïaid, ym kum ki bymstad, hynrei, kum ki bastad; [16] da kaba siewspah ïa ka por, naba kine ki sngi ki long ki basniew.
Kane ka long kaba shisha. Sdang ban puson shaphang kine ki sngi phin shem ba ka long kumta shisha. Phin iohi tang ka jingsniew kat shaba phai.
#. Ka jingsniew ha ka long briew man
briew.
Ka long briew man briew ha kine ki sngi ka lah da sniew haduh katta katta. Kam don shuh ka jingsalia, ka jinglehraiñ ban leh wat ia ki kam bym dei ban leh, ki kam pap kam sang baroh. Ka jinglehbor bat bor wat ia ki kynthei, ki khunlung khynnah ruh.
Ka jingjyllei ki kam tuh kam thiem, ka jingiapyniap ha kylleng ki jaka. Ka jingiatiplem kam don shuh ha kiba bun ki briew.
#. Ka jingsniew ha ka kamai kajih.
Ka don ka jingud ka jinglyniar jong ki briew namar bym biang ka kamai kajih. Lehse don uwei ar eh uba biang kamai kajih ha kine ki sngi, hynrei haba kren solansar hi ka don ka jingsniew ha ka kamai kajih jong ki briew ha kine ki sngi.
#. Ka jingsniew ha ka rep ka riang, jingri
jingdup.
Lada ngi peit ia ka rep ka riang ruh ngi iohi ia ka jingsniew ha kata ka rep ka riang. Ka lyngkha, ka pynthor kam lah shuh ban pynmih kumba dei ban pynmih, ka la don ka jingduna kaba bak lybak. Ka jingri jingdup kam long shuh kumba dei ban long, ka lah sniew haduh katta katta.
#. Ka jingsniew ha ka synshar khadar
Lada ngi phai sha ka synshar khadar ruh ngin iohi ia ka jingsniew ha ka rukom synshar khadar. Ka don ka jingsynshar bymhok, lehbor, leh shiliang bad kumta ter ter, bad namar ba ka jingsynshar khadar ka lah sniew, kumta bun sa tang ki jingiakhih, ki jingiakynad ha ki rukom bapher bapher.
Kine baroh ngi la iohi ha kine ki sngi jong ngi mynta.
Hato ngi la juh pyrkhat balei ka sniew katne katne? Ia kane la iathuhlypa ha ka Ktien jong U Blei.
2 TIMOTHI 3:1-5
[1] Hynrei, to tip ïa kane, ba ha ki sngi ki bakhatduh kin wan ki por bashitom. [2] Namar ki briew kin long kiba ieit tang ïa lade, kiba ieit sbai, kiba kren sarong, kiba leh khraw, kiba kren sniew, ki bymkohnguh ïa la ki kmie ki kpa, ki bymsngewnguh, ki bymkhuid, [3] kiba khlem ieit ïa la ka kynja, kiba khlem map, kiba kren siar, ki bymsuidñiew, kiba runar, ki bymieit ïa ka babha, [4] ki nongdie lok, kiba hangamei, kiba leh meng, kiba ieit ïa ki jingsngewbha kham tam ban ïa kaba ki ieit ïa U Blei; [5] kiba don ka dur ka jingriewblei, hynrei, kiba la len ïa ka bor jong ka; na kine ruh to phai noh.
Hangne ngi iohi kumno ka Bible ka batai, balei kane ka por ka long kaba shitom? Ka daw ka dei namar ba ki briew ki ieit tang ia lade. Tang ban bit ban biang ia lade, kim pyrkhat shuh ia kiwei. Kim salia kim mat ia iap, ia im shato, kata ka dei ka jinglong. Kiba bun ki briew ki don ia kata ka jingieit sbai. Kiba kren sarong, bad kumta ter ter.
2. Ki long ki sngi ki bakhatduh
1 ÏOANNIS 2:18
Ko khun hep, ka long ka por bakhatduh: bad kumba phi la ïohsngew ba uta uba ïaleh pyrshah ïa U Khrist u wan, wat mynta ruh la mih noh shibun kiba ïaleh pyrshah ïa U Khrist; nangta keiñ ngi tip ba ka long ka por bakhatduh.
Sngi ba khatduh ka mut ki sngi ba ka jingwan U Trai ka la jan.
Kumno ngi tip ba ka jingwan U Trai ka la jan?
U Ïoannis u ong ba kin mih ki nongialeh pyrshah ia U Khrist. Nga ngeit baroh phi iohi ia kaei kaba dang shu jia ha kane ka Olympic ha Paris, France ha kaba kumno ki briew ki lah leh biria wat shaphang ka jingkhawai miet U Trai Jisu, ban ia act drama ha ka rukom ka bym itynnad. Kine baroh ki dei ka dur jong ka jingialeh pyrshah ia U Khrist.
Nangta ka Ktien jong U Blei ka iathuh shuh shuh ba ha ki sngi ba khatduh kin don ki jingjia bapher bapher, kum ki thma, ki nemsniew, ki jingiapthem, etc
MATHAIOS 24:3-14
1) Ki thma - v.6
Ki thma barit, ki thma bakhraw ki la jia ha kylleng ki jaka.
Ka thma Russia & Ukraine. 24.2.2022 till date
Ka thma Israel - Hamas. 7.10.2023 till date
2) Ka jingialeh makynti - v.7a
(lane ka thma poh ïing)
Ha kine ki sngi ngi sakhi ia kita ki jingialeh makynti, kumba la ong ka ktien U Blei. Kawei ka hima ka ialeh ia kawei pat ka hima, kawei ka state ka ialeh makynti bad kawei pat ka state. Kawei ka jaidbynriew ia kawei pat ka jaidbynriew.
Manipur. Ka jingialeh makynti ka la sdang naduh ka 3 May 2023 haduh mynta ka pat kut. Ka don ka jingiapynjot, pynjulor, ka jingiapyniap, pynsniew kaba laiphew rukom.
Bangladesh. Ka jingiakynad ka la sdang naduh u bnai July 2024. Haduh ba ka PM ka la hap ban phet krad na la ka jong ka ri, bad iehnoh ia la ka khet synshar. Ki paidbah ki la pynjot thiaw wat ia ka jaka sah jong kane ka PM, ki la lute lut wat ia ki jingdon jingem baroh.
U.K. Ha United Kingdom ruh ka don ka jingialeh makynti ka jur kaba la sdang naduh u July 2024 hi. Nangta shibun ki jingialeh makynti ha ki jaka bapher bapher, lada ngin ia kren lut kan ym dap ka por.
Wat ha ïing ha sem ka don ka jingialeh makynti kaba jur ha kine ki sngi.
3) Ka jingjyllei jong ka pop - v.12
U Jisu mynba u dang don ha pyrthei u la dep iathuhlypa ba shuwa ba un wan, ka pop kan man bun bad ka jingieit kiba bun kan man khriat.
Ngi sakhi shisha ia kine kiei kiei ha kine ki sngi jong ngi mynta. Ngi iohi ia ka jingjyllei jong u drugs, ka jingjyllei jong ka kyiad, iaid tang kumba katto katne meter lah iohi ia ki dukan kyiad. Ka jyllei jong ki kam sniew kam smeh ba laiphaw jaid. Bad kaba sngewsih pat ka long ba kata ka jingieit jong kiba bun ka la nang man khriat. La ka long ka jingieit ia U Blei bad ka jingieit para briew ruh ka la man khriat shibun.
Kine baroh ki pynshisha ba ngi lah im ha ki sngi bakhadduh.
Ka pop ka la nang man bun, ka jingieit kiba bun ka la nang man khriat.
Lada phin tynjuh phin shem ba ka jingieit jong kiba bun ha kine ki sngi ka lah man khriat shisha. La ka long ka jingieit ia U Blei ruh kiba bun ki lah man khriat. Kam don shuh ka jingbang ban shakri Blei, ban leit jingiaseng wan jingiaseng. Kam don shuh ka jingbang ban duwai ban pule Bible. Kam don shuh ka jingbang ban ialap ban phla ia U Trai.
Nangta lada ngi peit ha ka jingiadei briew, ka jingieit para briew ruh ka lah man khriat, ka la hiar haduh katta katta.
Ka jingieit jong kiba bun ha kine ki sngi ka long sa tang ka jingieit pyrthei.
Lada pynlong jingiaseng ñiar ba ki briew kin leit, niar ba ki briew kin sngap, hynrei lada pynlong tamasa, ym ngiam wat ka jaka ruh. Kata ka dei kaba ngi iohi ha kine ki sngi.
Ki briew ki la kham ieit ia ki jingsngewbha pyrthei ban ia kaba ieit ia U Blei.
2 TIMOTHI 3:4-5
"...kiba ieit ïa ki jingsngewbha kham tam ban ïa kaba ki ieit ïa U Blei; kiba don ka dur ka jingriewblei, hynrei, kiba la len ïa ka bor jong ka; na kine ruh to phai noh."
Ka jingkhot ka long, to ngin ieit ia U Blei bad ia kiei kiei ki jong U Blei, kiba kynja mynsiem. U Ïoannis u ong, phi wat ieit ia ka pyrthei lymne ia kiei kiei kiba ha kata ka pyrthei, kaba kren ia ki rongphong bad ki jingsngewbha pyrthei. 1 Ïoannis 2:15-17
3. Ki dei ki sngi ba ngin pynkhreh ia lade
ban iashem bad U Trai
Paralok baieit, kam dei ka por ia ngi ba ngin dang leh lyngngai, thiah thai, hynrei ka la dei ka por ba ngin pynkhreh ia lade na ka bynta ban ia shem bad U Trai.
Kumba ngi la ia peit naduh kaba sdang ngi iohi ba kine ki sngi ki pyni ba ka jingwan U Trai ka la jan.
U Jisu u ong haba phin iohi ba kine kiei kiei ki jia, to mied ia la ki khlieh naba ka jinglait im jong phi ka la jan. Loukas 21:28
Kumno ngin pynkhreh?
1) Ngin pynkhreh da kaba kylla bamut noh
na ka pop.
2) Ngeit bad pdiang noh ia U Jisu ha ka
dohnud.
3) Im ka jingim bathymmai.
ROM 10:9-10
[9] Ba lada men phla shynna da la ka shyntur ïa U Jisu, ba u long U Trai; bad men ngeit ha la ka dohnud, ba U Blei u la pynmih pat ïa u na ki baïap, yn pynim ïa me. [10] Namar da ka dohnud keiñ, u briew u ngeit ïa ka ban ïoh ïa ka hok; bad da ka shyntur keiñ, ba phla shynna ïa ka ban ïoh ka jingpynim.
MARKOS 16:15-16
[15] U la ong ruh ha ki, “To leit sha ka pyrthei baroh, bad to ïalap ïa ka gospel ha ki bynriew baroh; [16] te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem.
To U Blei un kyrkhu, Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | August 12, 2024
Comments
Post a Comment