U Blei U buh tyngkai ia kiei kiei kiba bha na ka bynta ki briew jong U

U Blei U buh tyngkai ia kiei kiei kiba bha na ka bynta ki briew jong U 

 

SALM 31:19

A katno kaba khraw ka jingbha jong me, kaba me la buh tyngkai ïa kita kiba sheptieng ïa me; kaba me la leh ha kita kiba shaniah ha me, ha khmat ki khun shynrang ki briew!

Buh tyngkai ka mut, buh kyrpang ia kaba kyrpang tam na ka bynta kita kiba sngew ieit.

Sngap ruh ia kane ka jinghikai ha ka YouTube da kaba click hangne

Lada ngi peit naduh kaba sdang hi U Blei u sngewtynnad ban ai ia kaba bha tam na ka bynta u briew.

Dei namarkata kadaw ha ka kitab Jenesis lynnong ba nyngkong ngi iohi, haba u pynlong ia kiei kiei baroh, U da peit ka lah bha ne em, bad haba u iohi ba kiei kiei baroh kiba u la pynlong, ki la long kiba bha, kumta ia kata kaba bha U aiti ha u briew (Adam), u briew banyngkong.  

Kane ka jingmut jong U Blei ka dang iai don ha U na ka bynta ki briew jong U haduh kine ki sngi. 

Ngin ia peit katto katne ia ka nuksa ha ka Bible, kumno ba U Blei u da buh tyngkai shisha ia kiei kiei kiba bha na ka bynta ki briew jong U.

Ngi pule ha ka kitab 1 Syiem 17:1-7, ngi iohi hangto shaphang U Elijah, kumno ba Ha kane ka por la don ka nemsniew bad ka jingrang tyrkhong kaba khraw, ha kaba ym don bam, ym don um shuh ha ka ri baroh kawei, hynrei na ka bynta u Elijah u briew jong U Blei, U Blei u la buh tyngkai ia kawei ka wah kaba u Elijah un ioh ban dih nangta. Hallelujah!

Mut dur, ka ri bad ka shnong baroh kawei kam tip ba dang don um ha kata ka wah Kherith, (namar lada dei ba ki tip kan nym jin da la sah um shuh hangta), hynrei U Blei u iathuh ha u Elijah ba dang don ka um ha ka wah Kherith kaba nga la tyngkai na ka bynta jong me. Hallelujah!

Ym tang ka um ba un dih, hynrei U Blei u la tyngkai ruh wat ia ka jingbam kaba biang ba u Elijah un ioh ban bam, miet la bad step, ha kaba la wanrah kyrpang ia kata ka jingbam da ka tyngab.

Ka kambah jong U Blei ka wan wat na ka jaka ka bym khmih lynti! (Mutdur, ka tyngab ka bym ju dap, kan wanrah jingbam ia i briew!) lymda dei ba U Blei u tyngkai. Dei U Blei uba la buh tyngkai ia kata ka jingbam bad phah rah pat ha ka tyngab.

Parabangeit bad paralok baieit, to ngin nym khuslai ia kiei kiei baroh, namar don shibun kiei kiei kiba bha ba U Blei u buh tyngkai na ka bynta jong ngi ha kane ka pyrthei, kiei kiei kiba ngi donkam ha ka doh, bad ha ka jingim kaba man ka sngi. 

U Jisu u ong, lada phi, kiba long bymman, phi tip ïa ka ban ai ïa ki jingai babha ha ki khun jong phi, kaba katno tam ba U Kpa jong phi uba ha bneng un ai ïa kiei kiei ruh ki babha ha kita kiba pan na u? MATHAÏOS 7:11

U Blei u don shibun kiei kiei kiba bha kiba u la tyngkai na ka bynta jong ngi, bad haba ngi donkam bad ngi un ai ha ngi ong U Trai Jisu. Bad kaba kham khraw ka jingbuh tyngkai jong U Blei na ka bynta jong ngi ka dei ka bneng. Ka bneng ka dei kaba bha tam kaba U Blei u buh tyngkai na ka bynta ki briew jong U. U Jisu u ong, ngan leit ban pynkhreh ka jaka ia phi, (Ïoannis 14:2-3) bad ia kane ka jaka ba U Jisu u pynkhreh la buh tyngkai na ka bynta jong ngi haduh kata ka sngi ba ngin leit na kane ka pyrthei. Hallelujah!

Shuwa ban pynkut noh, kaei ba ngi donkam ban leh ka long:

To ngin nang ban sheptieng ia U. Kata ka dei kaba nyngkong eh. U nongrwai Salm u ong, ym don ka jingkyrduh ïa kita kiba sheptieng ïa U, ki sing samla ki kyrduh bad ki shah thngan, hynrei kita kiba sheptieng ïa U kin ym kynduh ia kaei kaei kaba bha. Salm 34:9-10

Ka mut aiu sheptieng ïa U Trai? Ka mut ‘tieng burom ïa U Trai. Haba ngi don ka jingtieng burom ïa U Trai, ka pynlong ban kiar na kaba sniew. Proberb 8:13

Bad kaba ar ka long ban shaniah lut ha U. Haba ngi buh ia ka jingshaniah jong ngi ha U, ma U, U tip ïa kaba sah ka jingim jong ngi.

U Jeremiah u ong, ⁷Suk uta u briew uba shaniah ha U Trai, bad uba ka jingshaniah jong u long U Trai. ⁸Naba un long kum u dieng ba la thung hajan ki um, bad uba pur ïa la ki thied hajan ka wah, ba un ym sheptieng haba wan ka jingshit, hynrei, ka sla jong u kan long jyrngam; bad ha ka snem barang ryngkhiang un ym sumar khuslai, lymne un ym pep ban sei soh. ‭JEREMAÏAH 17:7-8

To U Blei un kyrkhu ia phi, Amen 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | August 3, 2024