U Petros u la ialap ha ka sngi Pentecost bad haba ki briew ki la wan ban sngap ia ka jingialap jong u ki la ioh ia ka jingktah bad ka jingpynkynduh jong U Mynsiem Bakhuid, bad kine ki briew ki la ia kylli na u Petros kumno ba ki dei leh bad u Petros u la sdang ban kyntu ia ki kumno ba ki dei ban leh bad ban im bad u pynkut da kaba ong, "To pynim ia lade na kane ka pateng bynriew ba kynriang" (KAM 2:40). Ha ka English translation ka ong, 'corrupt generation', kaba mut 'ka pateng bynriew bapyut, bym don jinglong babha ne jinglong janai'.
Ngi iohi ia kane ka jinglong kynriang, ka jinglong pyut jong ka pateng bynriew kaba na ka por sha ka por, na kawei ka pateng bynriew sha kawei pat. Naduh ka por jong u Noah ter ter haduh ka por jong ki Apostol bad haduh mynta kane ka pateng bynriew ba ngi im ka don ha ka jingkynriang, ka don ha ka jingpyut plak jong ka, haba peit i kumba ka lah nang kham kynriang kynriang pynban. Dei namar kata kadaw kat shaba phai shu ia tyngkhuh, ka sorkar bad ki paidbah, kawei ka seng bad kawei pat ka seng, ka shong bad ka shnong ki iatyngkhuh.
Ngi shem bad iohi ha ka Bible, haba kano kano ka pateng bynriew ka lah kynriang, ka lah pyut sniew, kata ka pateng bynriew ka lah don ha ka jingma kaba khraw.
Ka nuksa ngi iohi ha ka por jong u Noah namar ba ka pateng bynriew ka lah pyut sniew U Blei u lah hap ban pynjot noh. (Pule Jenesis 6 bad 7 lynnong). Haba ka pateng bynriew jong ka Sodom bad Gomorrah ka lah kynriang ka lah pyut sniew, U Blei u hap ban pynjot noh ia ka (Jenesis 19:1-20). U Blei um lah shah ia kaba pyut, kaba kynriang. Hynrei kaba sngewtynnad ka long ba U Blei um ju pynjot khlem da ai jingmaham (warning), u da ai ka jingmaham kaba biang, hynrei lada kim sngap, ki leh bymsuidniew, hangta ka jingjot kan long ia kata ka pateng bynriew.
Ka ïing kaba phi shong phi sah lada ka lah kynriang, ka lah pyut, ka lah bam kruiñ, ha kano kano ka por ka lah ban kyllon (collapse) bad lada phin shong sah hangta phi lah ban iap. Donkam ban kynriah kloi, bad wad lad, wad jaka rieh katba dang biang ka por khnang ban ioh lait im. Kumjuh ruh haba ka pyrthei ne ka pateng bynriew ka lah kynriang, ka lah pyut, lada phim wad jaka rieh kloi kloi, ha kano ma kano ka por U Blei u lah ban pynjot noh ia ka bad kumta ka jingiap bymjukut bad ba shyrkhei kan ngat ia phi.
Ha ka por jong u Noah U Blei u phah ia u Noah ban maham ia kata ka pateng bynriew tang da ki spah snem, hynrei ia ngi u ai ka lad bad ka jingmaham da ki hajar snem mynta. Ngi long kiba la kyrkhu shibun eh, hynrei ngim dei pat ban ñiew sting bad ban shim kabu ia kata ka jingiaishahslem U Blei, ioh ba ka jingbitar U Trai kan meh lep pyrshah iangi.
ROM 2:4-6, "Ne me ñiew beiñ ia ka jingkynrei ka jingsbun, bad ka jingiaishah, bad ka jingshahslem ruh ka jong u, khlem da pyrkhat satia ba kata ka jingsbun ka jong U Blei ka thew ialam ia me sha ka jingkylla kaba mut? Hynrei katba kum kata ka jinglong eh ka jong me bad ka dohnud bymkylla bamut, me iaikynshew ia lade ka jingbitar ia kaba akher ka sngi ka jingbitar, bad ka jingpynpaw ia ka jingbishar hok ka jong U Blei; U ban ainong ha uwei pa uwei u briew katba kum ki jingleh jong u"
PROBERB 29:1, ka ong, "Uta ia uba la sneng bunsien, u pyneh ia la ka ryndang, yn pynlwet ia u bad kata bym don jingshna shuh".
U Blei namar ba U ieit eh ia ngi, u la phah ia la ki briew ban maham lypa ia ngi shuwa ba ka jingpynjot kan long. Kaei kaba ngi donkam ka long ba ngi dei ban PYNIM IA LADE, da kaba ngeit ha U Jisu Khrist, pdiang ia U ha ka dohnud. Ka Bible ka ong, "ba lada men ngeit ha la ka dohnud, bad phla da la ka shyntur ba U Jisu U long U Trai, te yn pynim ia me" (ROM 10:9-10). Ym don da kawei pat ka lad ban pynim ia lade lait tang ban ngeit ha U Jisu Khrist (KAM 4:12). Shimet shimet ngi hap ban pynim ialade da kaba ngeit ha U Jisu Khrist. Ngim dei ban dang ap ba kiwei kin iarap pynim lem ia ngi. Ngi hap ban pynim ia lade, ong ka ktien jong U Blei. Ngim dei ban shaniah ia ka jingpynim ha ki kmie ki kpa, ki hynmen, para, u lok ne ka lok etc.
Ka Bible ka ong ba u kpa um lah ban kit ia ka pop jong u khun, u khun um lah ban kit ia ka pop jong u kpa (Esekiel 18:20).
Shuh shuh ka Ktien U Blei ka ong na ka PHILIPI 2:12, "... to trei dep noh ia ka JINGPYNIM JONG PHI HI da ka jingtieng bad ka jingkhynniuh". U Paul hangne u ong 'ka jingpynim jong phi hi' kaba mut ba ka jingpynim ka long personal. Bad haba ngi la ioh ia ka jingpynim na U Trai, ngi hap ban don ka jingkitkhlieh (responsibility) ban sumar, ban ri ia la ka jong ka jingpynim. Ym dei ban shu shaniah ha kiwei ban iarap pynri lem ia ka jingpynim jong ngi, ym dei ba u pastor ne Nongialam Balang kin pynbat lem ia ka jingpynim jong ngi, ym dei ba I Mei ne I Pa kin iarap pynbat lem ia ka jingpynim jong ngi, hynrei da lade hi ngi hap ban bat, ban sumar ia ka.
U Paul u ong ha ka shithi sha u TIMOTHY 6:12, "...to men bat khak ia ka jingim bymjukut, sha kaba la khot ruh ia me..." U Timothy uba la ioh ia ka jingpynim jong U Trai, u hap ban bat khak ia kata. Ia ki jingri, ki mar ki mata ngi dang lah ban phah ri lem ha kiwei ne ha kiba ha ïing hasem, hynrei ia ka jingpynim te em. Ngi hap ban bat khak da lade.
JINGPYNPAW 16:15, "Ha khmih nga wan kum u nongtuh, Suk uta uba sharai, bad uba ri noh ia la ki jainkup, ioh ba un iaid lyngkhuid, bad ba kin iohi ia ka jinglehrain jong u."
U Blei un kyrkhu iaphi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 5-02-2021 | email: j.l.mawlong@gmail.com
Comments
Post a Comment