Ngam shym la wan ban pyndam noh ia ka hukum

Mat 5:17, "Wat mut ba nga la wan ia kaban pyndam noh ia ka hukum lane ia ki nongiathuhlypa : ngam shym la wan ia ka ban pyndam noh. hynrei ia kaban pynskhem."

Kane ka jingkren U Trai Jisu ka dei ka jingkren kaba la pynpyrkhat ia kiba bun, kaba la wanrah ruh ia ka jingiasaid kaba jur bad kaba kiba bun ba lang kim lah lehse ban shemphang. Don kiba ong ba ngi dei ban sumar ia ki hukum baroh namar ba wat U Trai Jisu ruh U ong ba ngam shym la wan ia ka ban PYNDAM noh, hynrei nga wan ban PYNSKHEM. Kumta bun ki la pynksan ba ngi dei ban sumar ia ka hukum, ban rakhe khuid ia kata ka Sabaton bad kumta ter ter.

Hynrei lada ngi peit ha ka English translation ka ong ba U Jisu u la wan ym ban PYNDAM noh ia ka Hukum, hynrei u wan ban PYNDEP (fulfill). Um shym la wan tang ban PYNSKHEM hynrei u PYNDEP.

Hangne lada ngin pule bad ït bniah ia kane ka jingthoh ngin shem ba don ar bynta ba U Jisu u kren ha kaba iadei bad kane ka jingpyndep ia ka Hukum.

KA BYNTA BA NYNGKONG KA KREN IA KATA KA JINGPYNDEP JONG U JISU IA BAROH BA LA THOH SHAPHANG JONG U HA KA HUKUM BAD KI NONGIATHUHLYPA.

U Jisu u ong ngam shym la wan ban pyndam noh ia ka Hukum lane ia ki Nongiathuhlypa hynrei nga wan ban pyndep. 

Ha ka shithi sha ki Hebru 10:7 u ong, "Ha khmih nga la wan - ha ka jingkhylliap ka kitab la thoh shaphang jong nga, ia ka ban leh ah U Blei ia ka mon jong Me" bad ia kata kaba la thoh shaphang jong U, u la pyndep.

Lada ngin peit na ka Bible ngin iohi shai ia kane. Ia ka jingwan U Jisu sha ka pyrthei, ka jingkha, ka jingshah shitom, ka jingiap bad ka jingmihpat jong U la dep kren ha ka hukum bad ki nongiathuhlypa. Kawei pa kawei kaba jia ha ka jingim jong U, la dep thoh, bad U Jisu U la pyndep baroh, Um shym la iehnoh wat tang iwei iba rit eh ruh (coma by coma, fullstop by fullstop, etc). Ioannis 5:18. 

Ha kaba sdang jong ka jingshakri jong U, U ong nga la wan "BAN PYNDEP", bad ha kaba kut ka jingshakri jong U,  halor ka diengphna u ong "LA PYNDEP"  (It is finished). Kane u kren ia ka jingpyndep jong U ia baroh ba la thoh shaphang jong U. Ioannis 19:30

To ngin ia peit kham bniah shuh shuh halor kane ka bynta, kaei ba la thoh bad kumno la pyndep.

* La pyndep ia ka jingiathuhlypa shaphang ka jingkha ia U na ka theisotti - Isaiah 7:14; Mat 1:23

* La pyndep ia ka jingiathuhlypa ba un shah shitom na ka bynta jong ngi - Isaiah 53:4-8; Mat 27:27 ter ter; Mark 15:16 ter ter; Loukas 22:26 ter ter.

* La pyndep ia ka jingiathuhlypa ba un iap khlem da pynkhein ia ki shyieng jong U - Eksodos 12:46; Salm 33:20; Ioannis 19:36

* La pyndep ia ka jingiathuhlypa ba un shah sum da u sum - Sekh 12:10; Ioannis 19:37

* La pyndep ia ka jingiathuhlypa ba kin ia khalai ia ki jaiñkup jong U - Salm 22:18; Ioan 19:24.

* La  pyndep ia ka jingiathuhlypa ba kin pyndih ia U da kaba jew - Salm 69:21; Ioan 19:28-29.

* La pyndep ia ka jingiathuhlypa ba un sa mihpat bad un ym shem ia kaba pyut - Salm 16:10; Kam 13:35-37; Mat 28:1-10.

U la pyndep ia baroh ba la thoh shaphang jong U. 

Kata ka dei ka jingpyndep jong U Trai Jisu ia ka hukum bad ki nongiathuhlypa.

KA BYNTA KA BA AR : U PYNDEP NA KA BYNTA JONG NGI.

Balei U Jisu kat U Khun U Blei u dang donkam ban leh bad ban pyndep ia ka hukum, ym dei satia ba u pyni ha ngi ia ka nuksa ba ngi ruh ngi dei ban leh. Hynrei ka jingshisha ka long ba u PYNDEP na ka bynta jong ngi. Namar ba da u briew hi wat lada ngin ialeh dohiap katno katno ruh, wat lada ngin pyrshang haduh ban da iap hi ruh ngin nym lah da lei lei ban pyndep ia ka hukum. 

U khynnah rit lada phin phah kit ia u, u khaw shispah kilo, wat lada un pyrshang ban kit katba u pyrshang ruh un nym lah ban kit. Kumjuh ruh u briew watla un pyrshang katba u pyrshang ruh un nym lah ban pyndep ia ka hukum. 

Rom 2:21-23, "....me uba ialap ban ym tuh, me hi me tuh? Me uba ong ban ym klim, me hi me klim? Me uba ijli ia ki bleithaw, me hi me tuh kyntang? Me uba sarong ha ka hukum, da la ka jingryngkang ia kata ka hukum me hi me pynjah burom ia U Blei?"

Nga lah ban ong ruh ba uta uba ong ba ngi dei ban sumar khuid ia ka Sabaton, uta hi u pynkhein ia ka Sabaton. Watla u said hok, said ksan katno katno ruh un nym lah da lei lei. U Paul u ong ia ki briew ba said ksan ha ka hukum ba ki dei ki nongialam jong kiba matlah. Rom 2:17-20

U Apostol Paul watla u long u Jiw, pynban haba u sngewthuh ba da ka jingleh ka hukum yn ym pynksan kawei ka doh ruh, kumta u la hap ban shu ngeit ha U Jisu bad u la ialap ruh ia ki para Jiw ba ki dei ban ngeit ha U Jisu.

Gal 2:15-16, "Ngi kiba long Jiw na la ka kynja, bad ym kiba pop na ki Jentil, pynban haba ngi tip ba yn ym pynksan ia u briew da ki jingleh ka hukum, hynrei tang da ka jingngeit ha U Jisu Khrist, wat ma ngi ruh ngi la ngeit ha U Khrist Jisu, khnang ba yn pynksan ia ngi da ka jingngeit ha U Khrist bad ym da ki jingleh ka hukum; naba da ki jingleh ka hukum yn ym pynksan kein ia kawei ka doh ruh."

Gal 3:10, "Long ba la tim ia uwei pa uwei u bym iaineh ha kiei kiei baroh ia kiba la thoh ha ka kitab ka hukum, ia ka ban leh ia ki"

Ha ka por jong ka hukum, uno uno u bym lah ban leh ia kata ka hukum, u long uba la tim.  Hynrei U Jisu da ka jingieit bad jingisynei u la wan ban siewspah noh ia ngi na kata ka jingtim jong ka hukum. Um kwah ba ngin long sah hapoh ka jingtim.

Gal 3:13, U Khrist u la siewspah ia ngi na ka jingtim ka hukum, da kaba la pynlong ia u ka jingtim na ka bynta jong ngi: namar la thoh; Long ba la tim ia uwei uwei baroh uba sdien ha u dieng: Khnang ba ka jingkyrkhu ka jong U Abraham ha U Khrist Jisu kan ioh wan ha ki Jentil; ba ngin ioh pdiang ia ka jingkular ia U Mynsiem da ka jingngeit.

U la PYNDEP noh ma U ia kata ka hukum kaba ngim lah ban leh. U pynkut noh ia katei ka barim (Rom 10:3-4). U ai pat ha ngi ia ka hukum ba thymmai, bad kata ka long ka JINGIEIT. Ban ieit ia U Trai uba U Blei...bad ia la u para marjan... Mat 22:34-39. Ha kine ar la sdien ia ka hukum baroh, ong U Jisu. Mat 22:40.

Ha ka jingieit ia U Blei bad ia la u para marjan la sdien ia ki hukum baroh.

*  U briew uba ieit ia U Blei, 

I. un nym ioh shuh da kiwei ki blei nalor jong U.

II. un nym thaw lane mane bleithaw shuh.

III. un nym ong thala shuh ia ka kyrteng U Blei.

IV. un shakri ia U Trai ha ki por baroh, ym tang ha ka Sabaton.

* U briew uba ieit ia la u para marjan para briew, 

V. un nang ban burom ia la u kpa bad ka kmie.

VI. un ym pyniap.

VII. un ym klim.

VIII. un ym tuh.

IX. un ym sakhi lamler.

X. un ym ikwah ia ka jong u para marjan.

Haba ngi don ka jingieit ia U Blei bad ia la u para marjan, kumta hi (automatically) ngi lah pyndep ia ka hukum U Blei. Ym donkam ban da ia ksaid ia pynksan, tang ka JINGIEIT.

Kaei kaba ngi dei ban leh mynta ka long tang ban ngeit ha U Jisu. Ka hukum kam lah ban pynim ia ngi. Dei tang ka jingaiei jong U Blei lyngba ka jingngeit ha U Jisu Khrist.

Nga ngeit ngi la ioh jingkyrkhu bad ioh jingshai ruh lyngba kane ka jingthoh ha kaba iadei bad kane ka bynta. To ngin nym sngew sarong ba ngi sumar ia ki hukum, kumba nga ong ia phi, ba lada ngi sumar katba ngi sumar ruh, da lei lei ngim nym lah. Sangeh ban pynksan, hynrei shu ngeit ha U Trai Jisu.

U Blei un kyrkhu iaphi. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | 28-02-2921