Ki Nong Ninebeh

Jonah Lynnong 1,2,3.

Ngi ju pule barabor ia ka kitab u Jonah, bad kaei kaba ngi ju iohi bad iohsngew bunsien ka long tang shaphang u Jonah, kumno ba U Blei u phah ia u ban leit iathuhlypa pyrshah ia ka Ninebeh namar ka jingbymman bad ka pop jong ka, bad kumno u Jonah um kohnguh bad u la phet rieh sha Tarshish, bad kumno la khie ka eriong ha duriaw, la bret noh ia u Jonah sha duriaw bad u dohkha bakhraw u la nguid noh ia u Jonah, bad kumta ter ter. 

Don ruh lehse kiba lah juh pule ia ka story shaphang ka Ninebeh, bad ngi iohi tang ia kata ka pop bad jingbymman jong ka, hooid ka long ka ri kaba bymman ba ngi lah ban ong, kaba la pynlong ia U Blei ban bitar bad phah ia U Jonah ban iathuhlypa pyrshah ia ka. Hynrei ka don ruh kaei kaei kaba sngewtynnad haba ngi pule shaphang ka Ninebeh bad ka jinglong jong ka. Nga lah ban ong ba ka long ruh ka nuksa kaba ngi ruh ha kane ka pateng mynta ngi dei ban bud. 

Ngin ia peit mynta, kiei kita ki jinglong lane nuksa babha ba ka Ninebeh ka don?

1. Ki kylla bamut wat haba ym shym la khot ia ki sha ka jingkylla kabamut.

U Blei u ong ia u Jonah u nongiathuhlypa ba un leit ban iathuhlypa pyrshah ia ka Ninebah, ba U Blei un sa pynjot noh ia ka sa 40 sngi, namar kata ka pop bad jingbymman jong ka. U Blei u khlem khot ia ka Ninebeh sha ka jingkylla kabamut kumba khot ia kiwei bad kumba u khot ia ngi ruh. U shu ong ia u Jonah, khie leit iathuhlypa pyrshah ia ka. Ha kaba nyngkong u Jonah um shym kohnguh ia ka jingphah jong U Blei, u la phet rieh pynban sha Tarshish haduh ba ka la pynlong ba ka eriong kan khih phaloh haduh ban da bret ia u Jonah sha duriaw ka sa jem, bad ia u Jonah la nguid bad ri im da u dohkha kumba ngi pule ha ka Bible. Hynrei ha ka sien kaba ar ba U Blei u la phah biang ia u Jonah bad haba u la leit ban iathuhlypa, ki Nong Ninebeh ki la kylla kaba mut. Ngi iohi u Jonah u khlem ong satia ia ki ba ki dei ban kylla bamut, ba lada kim kylla kaba mut U Blei un sa pynjot noh ia ka, hynrei u shu ong ba sa 40 sngi U Blei un sa pynjot noh ia ka.

Kane ka long ka nuksa ba sngewtynnad haduh katta katta, kaba wat U Trai Jisu ruh U da iaroh ia kane ka jinglong jong ka Ninebeh. Mat 12:41

Kaei kaba pynsngewsih eh ia U Trai ia kane ka pateng bynriew jong ngi mynta ba ngi im, ba wat haba la khot shi khot ban kylla bamut ban lait na ka jingpynjot jong U Blei kaba long ka Dujok ding bymjukut, hynrei kane ka pateng bynriew ka dang pyneh shi pyneh. La ialap ym tang da u briew, ym tang da ki nongiathuhlypa, hynrei la ialap wat da U Trai hi, hynrei bun na ngi ngi dang pyneh ban kylla bamut. Kaba ma ka long ba ynda kata ka jingiaishah slem ka jong U Blei ka la kut, ka jingbabe bymjukut kan sa long ia kane ka pateng bynriew bym kohnguh, kita kiba lehkiat. Rom 2:4-6

2. Ki kylla bamut watla kim tip, la U Blei un dang map ne em ia ki.

Haba ki la iohsngew ia ka jingiathuhlypa jong u Jonah, baroh kawei ka shnong ki la kylla kaba mut. Jonah 3:1-10. 

Ngi pule ha ka Bible ngi iohi ba kine ki Nong Ninebeh kim tip satia la U Blei un kylla bamut ne em na kata ka jingpynsniew, hynrei ma ki, ki shu ia kylla bamut na kata ka pop bad jingbymman. Jonah 3:9 ki ong, "Uei u ba tip la U Trai un kylla ne em bad kylla ka bamut na kata ka jingpynsniew". Hynrei haba ki la kylla kaba mut, U Trai U la iohi ia kata ka jingkylla bamut jong ki bad U Trai ruh u la kylla kaba mut na kata ka jingmut ban pynjot ia ka Ninebeh. v.10

Mynta, U Trai u dang khot, bad u da kular tikna bha ba lada ngi kylla kaba mut, ngi phai sha u, un map ia ki jingleh bymman jong ngi. Ngi lah iohi tyngkreiñ ia kata ka jingkular kaba lah tikna shispah na ka shispah, kumba kheiñ 1+1=2, kaba wat ki khunlung ruh ki tip ia kane. Hynrei sngewsih ba wat haduh hangne ruh ngi dang pyneh, ngi dang kylli, balei ba hap kylla bamut, balei ba donkam ban leh kumta kumta.

Paralok baieit, ka lah dei ia ngi ban shu wan sha U Trai kumba uto u nongkhrong ha ka temple u wan bad u ong, "Ah Trai to map ia nga u nongpop...". Loukas 18:13. 

To ngin sangeh ka kylli jingkylli, sngap ia ka jingkhot ieit U Trai kaba khot ieit iaphi ba phi dei ban kylla kaba mut. Wat artatien la U Trai un dang map ne em ia phi? U Trai u kloi ban map haba ngi wan sha U, U la dep kren shai ha ka Ktien jong u ba lada ngi kylla bamut un map bad pynkhuid phar iangi. Isaiah 1:18; 2 Khro 7:14, 1 Ioannis 1:7-8.

To ngin wan sha U Jisu da ka dohnud kaba kylla kaba mut. U Blei un kyrkhu bad pynim iaphi. Un pyllait ia phi na ka jingpynjot jong ka dujok ding. Amen

© Jester Mawlong | 22-02-2021