Ki ïa kiba khatduh

Ha ka Bible la iathuh ia ngi bunsien shaphang kita ki sngi ne ki ïa kiba khatduh lane ki sngi shuwa ba U Jisu un wan ban shaw ia la ki jong. Kaei ka ban jia bad kumno ka long? 

To ngin ia peit katto katne ha kane ka por.

1. Ka jinghap noh jong ki briew na ka jingngeit.

1 Timothy 4:1, "Hynrei U Mynsiem u ong shai, ba ha ki ïa kiba khadduh, don kiban hap noh na ka jingngeit; da kaba pynshah shkor ha ki mynsiem bashukor, bad ha ki jinghikai ki ksuid."

U Mynsiem Bakhuid u lah dep iohi lypa shaphang ka jinglong jingman jong ki briew ha ki sngi ba khatduh, kumno kin long? Don ki ban hap noh na ka jingngeit. 

Balei ki hap noh na ka jingngeit? Dei namar ba ki pynshah shkor ia ki mynsiem ba shukor. Ki jingshukor ki wan ha ki rukom bapher bapher, bad lada ngi pynshah shkor, lada ngim nang ban bishar, khlem pep kata kan pynlong ia ngi ban phaidien ne ban hap noh na ka jingngeit.

2. Kin long ki por ba shitom.

2 Timothy 3:1, "Hynrei to tip ia kane ba ha ki sngi kiba khadduh kin wan ki por bashitom." 

Haba ngi phai sawdong ha kine ki sngi ngi iohi shisha ia kita ki jingeh bad jingshitom kiba wan jia na ka por sha ka por. Balei kane ka por ka long kaba shitom? Ym dei ba U Blei u pynlong ba ki briew kin shitom, hynrei dei ki briew hi kiba pynlong ia kane ka por kaba shitom. Lehse phi lah ban kylli kumno u briew u pynlong ba kine ki sngi kin long kiba shitom?

Pule 2 Tim 3:2-5

** Namar ki briew kin long kiba ieit tang ia lade. Tang ban biang ialade, khlem pyrkhat shuh ia kiwei. Naduh ki Nongsynshar haduh ki riew paidbah kane ka jinglong ka don.

** Kin long kiba ieit sbai. Ka jingieit sbai ka long ka tyllong jong ki jingsniew baroh. 1 Timothy 6:10, "U thied jong ki kynja basniew baroh long kaba ieit sbai".

** Kiba kren sarong. Ka jingkren sarong, kren meng jong ki briew ha kine ki sngi ka lah palat haduh katta katta. Ynda ki lah kham dap kham biang, kham nang kham stad lei ym long ia kren shuh. 

** Lada ngi pule ter ter ngi iohi shuh shuh ia kine ki jinglong ha ki briew ha ki sngi ba khatduh. Ka Bible ka ong, kiba leh khraw, kiba kren sniew, kibym kohnguh ia la ki kmie ki kpa, ki bym sngewnguh, ki bym khuid, kiba khlem ieit ia la ka kynja, kiba khlem map, kiba kren siar, ki bym suidñiew, kiba runar, ki bym ieit ia kaba bha, ki nongdie lok, kiba hangamei, kiba leh meng, kiba ieit ia ki jingsngewbha khamtam ban ia kaba ki ieit ia U Blei; kiba don ka dur ka jingriewblei, hynrei kiba la len ia ka bor jong ka na kine ruh to phai noh. 

Kine kiei kiei kiba ki briew ki leh ki la pynlong ia kine ki sngi ba kin shitom.

Ka Bible ka hikai ba kum ki bangeit, ki Khristan ngim dei satia ban bud ia kine ki nuksa, ngi hap ban kiar noh.

3. Ka jingeh ha ka jingshakri Blei

Ngi pule ha ka Gospel u Mathaios 24:9-11, U Jisu u lah iathuhlypa ba ha ki sngi ba khatduh ka jingshakri Blei kan long kaba kham eh, kham jynjar. Ka jingshah kren bein, leh beiñ, etc. Wat ban ai noh sha ka ban iap ruh. Tang ha kine ki sngi ruh ngi lah sdang ban iohi ia kita ki jingeh, ki jingpynwit ha ka jingshakri Blei. Ki adong halor ki adong, ki jingpyrkhing halor ki jingpyrkhing. Ngim lah ban tip sa kiei ki adong kin mih?

Ka jingkylli ka long ia ngi. Aiu ngi dei ban leh kum ki bangeit? Hato ngin ia hap lang noh? Ngin ia phaidien lang noh na U Trai? Hato ngin sangeh noh ban shakri ia U? Ka jubab ka long, Em!

Aiu ngi dei ban leh?

Ngi Dei Ban -

1) Ieng skhem ha U Trai. 1 Kor 16:13

2) Long shlur bad long khlain ha U Trai. Eph 6:10

3) Shitrhem shuh shuh ban shakri ia U Trai, ialap, phla ia u sha kiwei pat. Rom 12:11

4 ) Nang jan shuh shuh sha U Trai. Jakob 4:8; Heb 10:22,25b

U Jisu u ong, "Hynrei jar uba da iaineh haduh kaba kut, uta kein uban ioh laitim."

To U Blei un kyrkhu iaphi baroh. Amen 

© Jester Mawlong | 7-02-2021 | email: j.l.mawlong@gmail.com