Ka jingkhih jong U Mynsiem Bakhuid ka long kaba donkam haduh katta katta ha ka jingim jong ngi ki bangeit bad ki shakri jong U Trai. Namar haba U Mynsiem Bakhuid U khih, ka don kaei kaei kaba phylla bad ka bakhraw.
Ngi pule ha ka Kitab Genesis 1:1 ter ter, ngi shem ha kaba nyngkong kane ka pyrthei ka la long kaba khlem dur, kaba suda bad kaba dum ong ka Ktien U Blei, nangta ngi iohi ba U Mynsiem U Trai u la khih halor ki um, bad nangta U Blei u la pynlong ia kiei kiei kiba itynnad ha ka pyrthei kumba ngi iohi mynta. U Mynsiem Bakhuid u don bynta ha ka ban pynitynnad ia ka pyrthei.
Ka long ha kajuh ka rukom, haba U Mynsiem Bakhuid U khih ha uno uno u briew ruh barabor ngi iohi ia kiei kiei kiba khraw bad ba phylla ki jia.
Ngin ia peit na ki katto katne ki briew ha ka Bible kiba ngi iohi shai kumno haba U Mynsiem U khih ha ki, ki lah ban leh ia kiei kiei kiba khraw, ki la pyniap ia ki mrad khlaw ba kynsha, ki la jop ia ki thma bad kumta ter ter.
1. KA JINGKHIH JONG U MYNSIEM BAKHUID HA KA JINGIM U SAMSON:
Haba ngi pule ha ka Kitab ki Nongbishar 14:5-6, ngi iohi shaphang u Samson kumno ba U Mynsiem Bakhuid U khih ha u, u la kad ia u sing khynraw kumba kad ia i khun blang. Ka Bible ka iathuh ia ngi ba um don eiei ha ka kti jong u...v.6 b. Tang da ka kti suda.
U sing hangne nga lah ban ong, u ieng ha ka dur jong u Soitan. 1 Pet 5:8, "⁸To phin leh adkar, to phin iasharai; naba uta u nongialeh jong phi uba u Soitan. kum u sing bakyrhuh u iaid kylleng, u da wad khnang ia uno uno ruh ba un ioh nguid tylli. ⁹la uta to phin ialeh pyrshah, kiba skhem ha la ka jingngeit, da kaba tip ba dang pyndep ia kita kijuh hi ki jingshah shitom ha kita ki para bangeit jong phi kiba ha ka pyrthei."
Kumno ngi lah ban jop pyrshah ia u Soitan, dei da ka bor U Mynsiem Bakhuid.
Nongbishar 14:19. U Samson u la pyniap ia ki Ashkelon da ka bor U Mynsiem Bakhuid. Shuh shuh ha ka Lynnong 15:1...; 14-15. U la pyniap ia ki Philistia kiba long ki nongshun jong ki Israel tang da ka shyieng ngap jong ka kada. Ym dei da ki tiar iapom ba kynsai. Tang da ka shyieng ngap Kada.
Hynrei sngewsih ban iohi ba ha ki sngi ba hadien jong u haba U Mynsiem jong U Trai u la kynriah na u, ngi shem ba um shym la donbor shuh. Haba ki Philistia ki la wan ban kem ia u, u nang tharai ba un leh ia ki kumba u ju leh mynshuwa, hynrei haba ki la wan um lah leh eiei shuh, u nang mut ban kynther kynba kynther mynshuwa, um tip pat ba U Mynsiem U Trai u la kynriah na u.
Balei U Mynsiem U kynriah bad u sangeh ban khih? Namar ka jinglehsting, ka jingbym- suidniew jong u ia U Mynsiem Bakhuid jong U Trai. Ka jingsngewlah, sngewkhlain ha la ka jong ka bor...um tip ba kaei kaba u lah ban leh kadei ka bor U Mynsiem Bakhuid.
Kane ka long ka jingmaham ruh ia ngi ba kumno ngi dei ban long barabor hapoh ka bor jong U Mynsiem Bakhuid, ym ban sngewlah, sngewkhlain bor bad ban sngew ba ngi lah ban leh ha ka bor ne jinglah jong ngi. Hynrei ngi dei ban sngewthuh ba khlem U Mynsiem jong U Trai ngim long eiei ruh em. Ngi dei ban ailad ba U Mynsiem Bakhuid un khih hapoh jong ngi.
Kynmaw U Mynsiem Bakhuid jong U Blei u long uba donburom, lada ngim ailad, un nym shu khih jubor, u kwah ba ngin ailad, ngin shah sngewbha ba un khih bad trei hangi bad lyngba jong ngi.
U Samson shuwa ba un iap u sngewthuh ba pleng khlem U Mynsiem jong U Trai, um long eiei ruh em, u la kylla bamut bad U Trai u la isynei bad pynshaitbor pat ia u, hynrei watla katta ruh u Samson u la hap ban khun da ka bor jong u baroh, u la hap ban kham pynmih bor. Nongbishar 16:28 ter ter. v.30
2. KA JINGKHIH JONG U MYNSIEM BAKHUID HA KA JINGIM U DAVID:
Ha ka Kitab 1 Samuel 16:13. Ngi iohi ba la pynsleh ia U David bad naduh kata ka sngi U Mynsiem U Trai u la wan jur ha U David. Haba ngi pule ter ter naduh kane ka por ngi shem ba U David u la iaid ha ka bor bad ka jingkhih jong U Mynsiem U Trai. Ha ki dkhot .14-23, ngi iohi tang da ka duitara ba u tem, u mynsiem bymman na u Saul u la mih noh. Ym dei satia tang kata ka jingnang, ka jingtip jong u ha ka tem ka put, hynrei ka dei ka bor U Mynsiem Bakhuid.
Ha ka 1 Samuel 17:1 ter ter, haba ki Philistia ki la wan ban hiar thma pyrshah ia ki Israel, ha kaba u Goliath uta u radbah iapom jong ki Philistia u la kob bun bun sngi. U David u la ieng ban kob pyrshah ia u. Haduh ba u Eliap u hynmen jong u David u la bitar ia u - dk.28. Ha ka dkhot ba 33 u Saul haba u peit ia u, u i ba u dang khynnah eh ban leit ia khun pyrshah ia uta u radbah Goliath uba ka jingjrong jong ka long 6 pruh shitda (kumba 9ft 6"), u ong "mem lah naba me dang khynnah eh". Hynrei u David um tieng namar u tip ba U Mynsiem U Trai u don ryngkat bad u. U la iathuh ha u Saul ba kumba u Trai u la donryngkat bad u, bad nga la pyniap ia u sing bad ka dngiem, kumta ruh un aiti ia une u Philistia ha ka kti jong u.
Ter ter lada ngin pule dk.48-49, Tang da u maw ba shu tam na wah u la pyniap ia u Goliath. Ym dei satia da ki tiar thma ba kynsai, hynrei 'TANG DA U MAW BA SHU TAM NA RUDWAH".
3. KA JINGKHIH JONG U MYNSIEM BAKHUID HA KA JINGIM JONG KI SYNRAN:
Kiba kham bun na ki synran U Jisu ki dei ki nongtong dohkha, ki bym nang bym stad (illiterate) hynrei haba U Mynsiem U khih hapoh jong ki, ki la ialap wat kiba stad tam ruh ki sngap ia ki bad da ki hajar ki briew ki kylla bamut. Ki la pynkhiah ia ki bapang, ki la leh shibun ki kambah bad kumta ter ter kumba ngi iohi haba ngi pule ha ka Kitab ki Kam ki Apostol.
Ngi iohi haba U Mynsiem Bakhuid jong U Trai U khih, ym don ba lah ban ieng pyrshah. Kum ki bangeit ngi donkam kyrkieh eh ia ka jingkhih bad ka jingtrei U Mynsiem Bakhuid ha kine ki sngi ba khatduh. To ngin thrang bad ngin sliang ia ka jingkhih bad ka jingpyndap jong U Mynsiem Bakhuid sa shisien pat ha ngi, ha ka Balang. Khlem U Mynsiem Bakhuid jong U Trai ngim long eiei ruh em. Ngi donkam ia U Mynsiem jong U Trai, ai ba yn pyndap ia ngi sa shisien pat. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Follow me on:
YouTube: https://www.youtube.com/user/jestermawlong
Instagram: https://www.instagram.com/mawlongjester
Twitter: https://mobile.twitter.com/JesterMawlong
© Jester Mawlong | 31-9-2021
Comments
Post a Comment