Ngin ia peit ha kane ka por ia ki lai tylli ki bynta ba ngi donkam ban long kiba la khreh.
1. Long kiba la khreh ban iashem bad U Trai:
Heb 10:37, "Uta uba wan un wan bad un ym pyntud"
U Jisu da lade hi mynba u dang don ha kane ka pyrthei u ong ba ngan leit noh ban khreh ka jaka iaphi, bad u ong ynda nga la dep ban khreh ka jaka ngan sa wan pat ban shimti ia phi sha lade hi. ÏOANNIS 14:1-3.
Kumta u ong ia ki synran ba kin long kiba la khreh, bad um shym la iathuh lano un wan, u ong ia ki ba kin long kiba khreh. MATHAIOS 24:36-44; 45-51. U kren ruh ia ka pharshi ki shiphew ngut ki theisotti kum kata ka jingpynpyrkhat ia ki synran ba kin long kiba la khreh khnang ba haba un wan, kin ym shah iehnoh bad babe - MATHAIOS 25:1-13.
Ngi iohi hangne, kat kita kiba la khreh u rongnoh, bad kita ki bym shym la khreh u iehnoh. Um ju ap.
Dei namar kata kadaw ki Apostol U Jisu Khrist ki iai pynkynmaw ia ki para bangeit ba kin long kiba la khreh ban iashem bad U Trai. Bad kane ka jingkyntu ka la long kyrkieh ruh na ka bynta jong ngi. Ngim dei ban shim sting ia kane. Ngi hap ban pynkhreh, ban long lakloi ha kano ma kano ka por lada U Trai Jisu un wan, lym kumta ka jingbabe kan ngat kyndit lada ngi leh sting bad leh bymsuidñiew.
N.B: Katne ka ktien U Blei ka lah kyntu, ka lah pyni lypa, lada ngi dang shah iehnoh ngin long kiba bieit tam!
U Paul u ong lada ngim long kiba la khreh, ka jingjot ba kyndit kyndit kan ngat kumba ka briew ka suh khun. 1 THES 5:1-11
Kynmaw!!! Ka jingbabe kam dei tang shisngi arsngi, shisnem arsnem, phew snem ne hajar snem, hynrei ka long bymjukut, bymjukut, bymjukut, ym don jingkut shuh. Ngi donkam ban long kiba la khreh.
Kumno ngin pynkhreh?
#-1. Pynkhreh da kaba ri khuid ialade. 1 ÏOANNIS 3:2-3. Kynmaw, ka Bible ka ong ba kano kano ka bymkhuid kan ym ioh rung ha ka hima U Blei. Jingpynpaw 21:27
#-2. Pynkhreh da ka jingduwai. MARK 13:32-33; 1 Pet 4:7.
#-3. Pynkhreh da kaba iaseng lang. HEB 10:24-25
2. Long kiba la khreh ban ialeh ia ka thma:
Ngim lah ban ong tangba ngi lah ngeit ngim don thma shuh, ka don ka thma kaba ngi hap ban ialeh, bad kata ka thma kaba ngi hap ban ialeh kam dei satia ia ka doh bad ka snam, hynrei pyrshah ia ki bor ka jingdum, ia ki jingbymman ba kynja mynsiem. "Naba ka jingialeh jong ngi kam long ia ka snam bad ka doh, hynrei ia ki hima, ia ki bor, ia ki nongsynshar pyrthei jong kane ka jingdum, ia ki jingbymman bakynja mynsiem ha ki jaka bneng." EPHESOS 6:12
U Soitan u ialeh thma ha la ka sngi, lada ngim long kiba la khreh, ngin shah rem ruh ha la ka sngi. Kynmaw u Soitan um don por ban shongthait, u iaid sharum shaneng ong ka Bible. Ym dei ba u khlem kam khlem jam, u don ka kam bad kata ka long ban tuh, ban pyniap, bad ban pynjot, ÏOANNIS 10:10. U poi shaduh kper Eden ban pynjot ia ka Im bad u Adam, u poi ha ka jingiaseng jong ki khun U Blei, ban ioh mudui iano re iano ha khmat jong U Blei, bad ngi iohi ha kane ka por u la ioh ban mudui bad ban ktah kti ia u Job. U poi kylleng kylleng.
U Petros ruh u ong ba u Soitan u iaid sharum shaneng kum u Sing ba kyrhuh, bad ia uta phi hap ban ialeh pyrshah. Lada ngim long kiba la khreh, kumno ngin ialeh? 1 PET 5:8-9
Ngi donkam ban long kiba la khreh ban ialeh thma pyrshah ia ki bor ka jingdum u Soitan. U Apostol Paul u kyntu ba ngi dei ban long kum ki shipai ba la kieng atiar, ban shim ia ki jingkieng atiar ka jong U Blei baroh (ever ready, ready to fight, ready to protect ourselves). EPHESOS 6:10-18.
Ki Atiar jong U Blei:
1) Panpoh - Jingshisha
2) Jingiada shadem - Ka Hok
3) Juti - Jinglong lakloi ka Gospel
4) Stieh - Ka Jingngeit
5) Ka Jingdakhlieh - Ka Jingpynim
6) Ka Waitlam U Mynsiem - Ka Ktien U Blei & Jingduwai
To ngin check ialade, hato kine ki atiar baroh ki lah don ne em ha nga? Lada em ka pyni ba ngi dang don ha ka jingma, ngi hap ban don bad ban kieng ia kine ki jingkieng atiar U Blei baroh. Ngim Dei ban ieh kawei ruh.
3. Long kiba la khreh ban shah shitom na ka bynta U Khrist:
Ka por kaba ngi im ka lah nang ialam sha kaba kham eh ha ka jingshakri Blei. Ki adong halor ki adong ki lah nang mih, bad kine kiei kiei kin ialam sha ka jingpynshitom beiñ ia ki Khristan. Lada ngim long kiba la khreh, lada ngim pynmlien (train up) lypa ia lade kan long kaba eh shibun. Lada ngim ju mlien ban pynshitom ialade tang khyndiat ruh ban shakri ia U Trai, kan long kaba eh lada kan wan kynsan ka jingpynshitom beiñ.
Ngim lah ban ong namar ba ngi lah ngeit ha U Trai ngin shu im suk beit, PHILIPI 1:29, ka ong ba la ai ia U Khrist ha ngi ym tang ban ngeit ha U, hynrei ban shah shitom ruh na ka bynta jong U.
U Jisu, palat 2000 snem mynshuwa u lah dep hikai lypa ba ngi dei ban long lakloi ban shah shitom na ka bynta ka hok, na ka bynta U Jisu Khrist.
MAT 5:10-12, "Suk kiba shah pynshitom na ka bynta ka hok, suk maphi haba kin kren beiñ, lehbeiñ ruh ia phi..." Shuh shuh ha ka gospel u Mathaios 24 lynnong u ong ba kin ai noh wat sha ka ban iap.
U Apostol Petros ruh u kyntu ba ngi donkam ban long lakloi ban shah shitom na ka bynta ka hok. (1 PET 3:14). U ong ba ngim dei ban lehraiñ haba ngi shah shitom na ka bynta ka hok, lada ngi shah shitom kum ki nongtuh, nongpyniap briew, ngi dei hok ban lehraiñ. 1 PET 4:12-19
Ngi iohi ia ki Apostol U Jisu Khrist kim ju sngewlehraiñ ban shah shitom. Ka daw ka long namar ba ki lah long kiba la khreh, "Ki la ñiew ialade kiba bit ban shah jah burom." KAM 5:17....; 41 'Ki da ia kmen' namar ki tip, kaba khraw ka bainong jong ki ha ki bneng. To ngin ioh ia kaba kum kane ka jingmut.
Kine ki long ki lai tylli ki point, kumno ba ngin long kiba la khreh. Nga ngeit ngi la ioh jingkyrkhu. Ka jingkyntu jong nga ka long, "TO NGIN LONG KIBA LA KHREH"
- Ban iashem bad la U Trai.
- Ban ialeh ia ka thma.
- Ban shah shitom na ka bynta U Khrist.
To U Blei un kyrkhu iaphi. Amen 🙌
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 17-04-2021 | 11:42pm
Comments
Post a Comment