Text: Rom 11:11-24.
Rom 11:20-21, Ñiuma; hynrei, la pynkheiñ noh ïa ki, da ka jingbymngeit, bad me ruh me ïai-ïeng da ka jingngeit. Me wat sngewmeng, hynrei, to sheptieng; namar lada U Blei um shym la riej shuh ïa kita ki tnat trai, un ym riej ïa me ruh.
Ban sngewthuh ia katei ka jingong, phi lah ban pule naduh ka dkhot ba 11, bad hangtei phin iohi U Apostol Paul u kren shaphang ka jingpynim ia ki Jentil. U pyni kumno ki Jentil ki ioh ia ka jingpynim ka dei namar ka jingbymngeit jong ki Jiw. Hynrei u ong ia ki, ba wat la ki la ioh ia kata ka jingpynim kim dei pat ban sngew sarong lane ban sngew meng, hynrei ki dei ban sheptieng. Namar lada U Blei um shem la riej ia ki Jiw kiba long ki tnad trai, un ym riej ruh ia ki Jentil. vv.20-21
Kane ka long ka jinghikai bad ka jingmaham ruh ia ngi ki Jentil kiba la ioh pdiang ia ka jingpynim ei ka jong U Blei ba ngim dei ban shu sngew sarong tangba ngi lah ioh ia ka jingpynim, hynrei kaei ba ngi dei ban leh ka long ba ngi hap ban don ia kata ka jingkitkhlieh ban sumar ia la ka jingpynim, namar lada U Blei um shym la riej ia ki Jiw namar ba kim shym la ngeit, un nym riej ruh ia kita ki bym shym la ri ia la ka jingpynim.
Ngim lah ban ong tang ba ngi lah ioh jingpynim shisien, ym lei lei shuh, ngi lah ban leh katba mon. Em! Lada U Blei um shym la riej ia ki tnad trai (Jiw), un ym riej ruh iano iano, kampher uei kaei ngi long. U Paul u ong, "To phin trei dep noh ia la ka jingpynim, da ka jingtieng bad ka jingkhynniuh" Phil 2:12. Lada ngim don ia kata ka jingtieng bad ka jingkhynniuh, ngi lehkai, leh bymsuidniew, U Blei un nym riej ong ka ktien U Blei.
U Judah u ong shuh shuh, ba lada U Blei um shym la riej ia ki Israel haba ki la mih noh na Ijipt, u la pynjot noh khoit ia kita ki bymngeit, lada um shym la riej ia ki angel ki bym shym la ri ia ka burom tynrai jong ki, lada um shym la riej ia ka Sodom bad Gomorra, un nym riej ruh ia kita kiba pynlong kamkai ia ka jingaiei U Blei. Judah vv.3-7.
Ka jingaiei jong U Blei kam dei satia ka license ban leh pop. Hynrei ka jingaiei kadei ka jingpyllait mraw ia ngi na ka pop bad ba ngin nym leh pop shuh. Ioannis 8:11; 5:14
Ka balang ha Korinth haba ka la pdiang ia ka jingpynim ei ka jong U Blei, hynrei ki la iai leh ia ka pop, pynban wat haba ki leh kat kata ka pop, ki la sngew meng pynban. Haduh ba u Apostol Paul u la hap ban sneng tyngeh ban pynbeit ia ki.
1 Korinth 5:1-2, La bna kylleng ba don ka jingshongsang hapdeng jong phi, bad kat kata ka jingshongsang kam ju don wat hapdeng ki Jentil ruh, ba uwei u la ïoh ïa ka tnga u kpa jong u. Te phi, phi la sngewmeng pynban, haba ka la dei ïa phi ban sngewsih, khnang ba yn pynkynriah napdeng jong phi ïa uta uba la leh kat kane ka kam.
Na kawei ka pateng bynriew sha kawei pat ka pateng bynriew, ngi iohi U Blei um lah ban shah ia kaba sniew, um ju riej iano iano ruh. Hooid U Blei u long ka jingieit, hynrei ngim dei ruh ban klet ba U long ruh ka ding kaba bam duh.
U Nongthoh sha ki Hebru u ong shuh shuh, "Naba kumta, haba ngi pdiang ïa ka hima ka bym lah pynkhih, to ngin ïoh ka jingsngewnguh, da kaba ngin ai ka jingshakri kaba pynsngewbha ïa U Blei da ka burom bad ka jingtieng burom; namar U Blei jong ngi u long ka ding kaba bam duh noh. Hebru 12:28-29
Para bangeit baieit, kumba ngi la pdiang ia ka jingpynim ei jong U Trai, bad ia kata ka hima bym lah pynkhih, kumta to ngin sumar ia kane ka jingpynim bad ka jingaiei U Blei, da ka jingsngewnguh, ngin ai ruh kata ka jingshakri kaba pynsngewbha ia U Blei da ka burom bad ka jingtieng burom haduh ba ngim ia shem bad U markhmat.
"Suk uta uba sharai, bad uba ri noh ia la ki jainkup, ioh ba un iaid lyngkhuid, bad ba kin iohi ia ka jinglehraiñ jong u" Jingpynpaw 16:15
To U Blei un kyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 13, 2021 | 1:13 PM
Comments
Post a Comment