Ngi ngin iathuh ia ka kyrteng U Trai

Salm 20:7 "Don kiba shaniah ha ki kali, kiwei pat ruh ha ki kulai: hynrei, NGI NGIN ÏATHUH ïa ka kyrteng U Trai U Blei jong ngi."

Naduh ki por mynbarim ter ter haduh mynta ngin iohi ia kita ki jingialehthma kiba la ju jia na ka por sha ka por. Lada ngi peit ha ka Bible ruh ngi iohi ba ki ju don kita ki thma ba la ju ialeh. Kawei ka hima ia kawei pat, kawei ka ri ia kawei pat. Don ki hima kiba jop, don ruh ki hima kiba rem. Bad haba don ka thma, phin shem kin don la ka jong ka jong ka jingsngewskhem bad ka jingshaniah ban ioh jingjop. Don kiba shaniah ha ki kali thma jong ki, don kiba shaniah ha kita ki kulai thma jong ki, don ruh kiba shaniah ha u riew khlain bor lane u radbah (kumba long ki Philistia ia u Goliath), bad kumta ter ter. Hynrei u David u ong "Ngi ngin iathuh ia ka kyrteng jong U Trai".

U David kum u syiem uba la ju ialeh bun ki thma ha ka jingim jong u. Bad kaei kaba u mad (experience) ka long ba man ba u ialeh ia ka thma u ju ioh jingjop dei da ka kyrteng jong U Trai. Da kaba u iathuh bad pynbna ia ka kyrteng jong U Trai.

Haba la don ka thma hapdeng ki Israel bad ki Philistia, ki khun Israel ki la khynniuh bad ki la khaweit ha khmat ki Philistia, namar ba kine ki Philistia ki don ia uta u radbah jong ki, ba long u Goliath. Baroh kita ki shipai ba kynsai jong ki khun Israel ki la hap ban shu ia rieh ialade, kim nud satia ban mih pyrshah ia uta u radbah Goliath uba la kop ia ki haduh sawphew sngi kynthih. Ha kata ka por la wan mih u David (uba ha kata ka por u dang long tang u khynnah ap langbrot). Haba u la iohi ia uta u radbah ba u kop, u beiñ u khoh ia ki khun Israel, u la sngew bitar pyrshah ia uta u Philistia.

Ban pynlyngkot ia ka jingiathuh, kumta u David u la pan jingbit bad u la leit ban ia khun pyrshah ia uta u radbah Goliath. Bad haba u la ioh jingbit na u syiem Saul, u la leit bad um shym la treh satia ban kieng ia ki atiar thma ba kynsai ba la ai ha u, hynrei kaei kaba u leh ka long ba u shu iathuh ia ka kyrteng jong U Trai pyrshah ia uta u Philistia. 

1 Sam 17:45, U Dabid te u la ong ha uta u Philistia, “Me, me wan ha nga da ka waitlam, bad da u sum, bad da ka stieh: nga te nga wan sha me ha ka kyrteng U Trai ki paid, U Blei ki paidïapom ki Israel keiñ, ïa uba me la krenbeiñ."

Ynda haba u la dep ban iathuh ia ka kyrteng jong U Trai, nangta u tam San tylli ki maw na kata ka wah, bad kumta ngi iohi u la jop pyrshah ia uta u radbah Philistia, u Goliath. (1 Sam 17:1-58).

Kane ka dei ka daw jong ka jingjop jong u David pyrshah ia u Goliath bad ia ki Philistia baroh. Haba u David u iathuh ia ka kyrteng jong U Trai, (u pynbna ia ka jingkhraw jong u Trai) tang da i maw iba rit ruh ka la biang ban jop.

Dei namar kata ka daw u ong, "Ngi ngin iathuh ia ka kyrteng U Trai". U David haba u kren ia kane u mut ban ong, phi to shaniah ha kita ki kali thma jong phi, phi to shaniah ha kita ki kulai thma jong phi, hynrei ngi, ngin shaniah ha ka kyrteng U Trai, bad ngin shu iathuh ia ka kyrteng U Trai pyrshah ia phi. Hallelujah!

Bunsien haba ngi ia kynduh ia ki thma ha ka jingim, ngi ju pyrshang da la ka buit ka stad briew jong ngi, ngi pyrshang ban wad kita ki atiar ban ia khun thma pyrshah ia u nongshun. Bad haba ngi i ba kita kim lah iarap ia ngi, ngi sdang ban shu iam, shu lynniar. Hynrei ngi klet ia kane kawei ba u David u jop thma tang da kaba iathuh ia ka kyrteng jong U Trai pyrshah ia uta u radbah, u nongshun jong u, u Goliath.

Paralok baieit, to ngin nang ban pyndonkam ia ka kyrteng jong U Trai, haba ngi ia kynduh ia ki thma ha ka jingim. Nang ban iathuh ia ka kyrteng jong U Trai pyrshah ia u nongshun jong phi uba long u Soitan. Nang ban iathuh ia ka kyrteng jong U Trai pyrshah ia ki jingpang, ki jingeh ba phi ia kynduh. Namar ba U Trai u long hajrong, ha khlieh kiei kiei baroh.

* U long ma U, U Syiem ki syiem bad U Trai ki trai. (Jingpynpaw 17:14; 19:16)

* Ha ka kyrteng jong U ki khohsiew ki hap ban dem. (Philipi 2:9-11)

* Ha ka kyrteng jong U ki jingpang ki khiah (Markos 16:17-18)

* Ha ka kyrteng jong U, u Soitan u hap ban phet (Markos 16:17)

To ngin nym shu lynniar kum ki khun Israel haba wan ka jingeh ne ka thma ha ka jingim, hynrei to ngin long kum u David ban shu iathuh (pynbna, pynkhraw) ia ka kyrteng jong U Trai. Phin iohi ia ka jingjop.

U Blei un kyrkhu ia phi. Amen

* SHARE LEM SHA KIWEI PAT RUH.

© Jester Mawlong | May 26, 2021