Nga seh hangne ngan sa iap thngan???

Text: Loukas 15:11-32

Ngi la ju pule, ngi la ju iohsngew ba la ju ialap shaphang ka pharshi "U Khun Sarong Awria", hynrei ngi la ju kynmaw pyrkhat mo ba kaei kaba pynlong ia U Khun Sarong Awria ban kyndit bynriew na kata ka jingleh sarong awria jong u? 

Ka Bible ka iathuh ia ngi ba ynda u la pynlut ia kita ki jingdon jong u baroh, wan lap sa ka nemsniew ha kata ka shnong ba u leit. Bad ynda lah katto katne sngi um ioh jingbam shuh, ka jingthngan ka la lap ia u haduh ba u la leit ap sniang ha jong ki briew da ka jingmut ban ioh pynkdang ruh ia lade da kita ki jingbam sniang. Hynrei wat la katta ruh ym don ba shah ia u ban bam na kita ki jingbam sniang, namar ka nemsniew ioh ba ym dap ban bam sa kita ki sniang ruh. Katno ka jingsngew-kordit!!!

Kane ka nemsniew ka la pynkyndit bynriew ia u ba un kynmaw ia ka ïing u kpa jong u, da kaba u la ong ia kine ki ktien, "Katno ngut ki shakri u kpa jong nga, kiba don ka jingbam kyrhai, NGA SEH HANGNE NGAN SA ÏAP THNGAN!" LOUKAS 15:17. Bad haba u la kyndit bynriew kumta ngi iohi ba u la kut jingmut ban ieng joit, bad ban leit sha ïing jong u kpa namar ba dei satang ha ïing jong u kpa ba don kata ka jingbam kyrhai bad ban ioh bam katba mon, ym shuh ban shu bam tang ban im hynrei ban bam haduh ban da kdang. Kata ka dei kaba jia ia U Khun Sarong Awria. 

Katba nga dang pyrkhat ia kane ka jingiathuhkhana (Pharshi), nga ioh ia ka jinghikai (lesson), ba kaei kaba la pynlong ia U Khun Sarong Awria ban leit phai sha ïing u kpa, ka dei ka jingthngan. Lada ka jingthngan kam lap ia u, un nym jin da la leit phai pat, hynrei ainguh ia U Blei ba u phah ia ka nemsniew bad ba un thngan, khnang ba un kynmaw ia ka ïing u Kpa. Nga ngeit wat lada ym shym la thoh shuh kumno u bam, hynrei nga tikna ba un jin da la bam haduh ban da kdang bad haduh ba un da hun.

* Teng teng U Blei u shah khnang ba ngin kyrduh khnang ba ngin nang ban wad ia U Trai, bad ba ngin tip ba dei tang ha U Trai don ka jingbam kyrhai. Deut 8:3

Ka jingkylli kaba nga don ban kylli ia ngi lang baroh ka long, "Katno ngut na ngi kita ki khun sarong awria ba la wan phai pat sha ka ïing u Kpa, ngi la ju bam ia kata ka jingbam ba kyrhai jong u Kpa kaba u la pynkhreh ia ngi, ne ngi dang don sah ha ka jingthngan sa ban iap tyrsaw? Lada ngi dang thngan sa ban iap tyrsaw kam dei shuh ba ym don jingbam ha ka ïing u Kpa, hynrei dei namar ba ngim treh hi bam bam. (Nga kren ia kaei kaei kaba kynja mynsiem).

Ka Ktien jong U Blei ka dei ka jingbam ba kyrhai ba la pynkhreh na ka bynta ki khun jong U. Ka jingkhot bakyrkieh mynta ia ngi ki bangeit (kita ki khun sarong awria ba lah wan phai pat) ka long ba ngin phai pat sha ka Ktien U Blei, to ngin da bam ia kata ka jingbam ba la pynkhreh kyrhai da u Kpa jong ngi uba ha bneng. U Jisu u ong, “Bym tang da u kpu hi ba un im u briew, hynrei, da ki ktien baroh ba mih noh na ka shyntur U Blei." MATHAÏOS 4:4 

Ha kine ki sngi bakhadduh da ei ngin im? Dei sa tang ka Ktien U Blei. Kita ki bym don ia ka Ktien U Blei kin iapler ong ka Ktien U Blei. Amos 8:11-13. Dei ka Ktien jong U Blei ka ban bat (sustain) ia ngi, dei ka Ktien jong U Blei kaba lah ban survive ia ngi ha ki sngi bakhadduh.

To ngin phai pat sha ka Ktien U Trai, to ngin pyrkhat bad ngin iai puson ha ka synia sngi, khnang ba ngin san, ngin roi bad ngin man bha ruh ha ka jingim ba man ka sngi. U Nongrwai Salm u ong ha ka Salm 1:1-3, ba kita kiba pyrkhat bad puson ha ka Ktien U Blei kin long kiba suk bad ba la kyrkhu. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 14, 2021 | 5:00 AM