Salm 33:18-22

SALM 33:18-22

¹⁸"Ha khmih, ka khmat U Trai ka don ha kita kiba sheptieng ïa u, ha kita keiñ kiba kyrmen ha ka jingisynei jong u; ¹⁹ïa ka ban pyllait ïa ka mynsiem jong ki na ka jingïap, bad ban sumar im ïa ki ha ka 'nemsniew. ²⁰Ka mynsiem jong ngi ka la ap ïa U Trai : u long ka jingïarap jong ngi bad ka stieh jong ngi. ²¹Naba ka dohnud jong ngi kan leh kmen ha u, namar ngi la shaniah ha ka kyrteng bakhuid jong u. ²²To ka jingisynei jong me, A Trai , kan long halor jong ngi, kat kumba ngi la kyrmen ha me. 

Ka theme jong kane ka long 'Ka jingsheptieng ia U Trai '

Haba ngi pule ha kane ka Salm ngi iohi ia ki 6 tylli ki bynta, kiba long ki jingkyrkhu haba ngi sheptieng ia U Trai. Ngin ia peit kawei hadien kawei pat.

1. Ka khmat U Trai ka don ha kita kiba sheptieng ia u. Kane ka kren ia ka favour jong U Blei, ka kren ia ka jingdon ryngkat jong U Blei. (Ekso.33:13-16). 

(The phrase the eyes of the Lord articulates the omniscience, omnipresence, and always caring nature of God toward His children)

Haba ka khmat U Trai ka don halor kita kiba sheptieng ia u ka don ka jingkyrkhu bakhraw. Ka pyni ba U Blei u peit u jngoh bad u sumar ia ngi, un ym shah ba u Soitan un leh donbor. 

SALM 33:18 KHACLBSI

U Trai u khmih sumar ïa kito kiba kohnguh ïa u, ïa kito kiba shaniah ha ka jingieit baneh jong u.

 

Psalms 33:18 NLT

But the Lord watches over those who fear him, those who rely on his unfailing love.

 

Ha kane ka pyrthei shai mynta ki briew ki ju buh ia ki CCTV, bad haba don CCTV ki riew sniew ki shynraiñ ban leh ia kano kano ka kam sniew, i.e: ban tuh thiem, ban pynjot pynsniew, etc

Katno tam lei haba da ka khmat jong U Blei ba khraw bor tam kan peit ia ngi na jrong, ka don ka jingshngaiñ kaba khraw. Amen 

SALM 118:6

U Trai u ha ka liang jong nga; ngan ym sheptieng: u briew (nongshun) u lah ban leh aïu ïa nga?

2. Ia ka ban pyllait ia ka mynsiem jong ki na ka jingiap. Kaba nyngkong kaba U Blei u pyrkhat (consent) ka long ia ka mynsiem jong ngi. Haba ngi sheptieng ia u, un nym shah da lei lei ba u bymman un ktah ia ka mynsiem jong ngi lano lano ruh. Ngi iohi shaphang u Job u briew uba sheptieng ia U Blei, u Soitan um lah satia ban ktah ia ka mynsiem jong u. Kane ruh kan long na ka bynta jong phi baroh kiba sheptieng ia U Trai.

U David uba sngewthuh ia ka jingkular U Trai, u ong ngan ym iap… (Salm 118:17) ha kawei pat ka mynta u ong watla nga iaid ia ka them ka syrngiew ka jingiap ngan ym sheptieng ia kaba sniew, namar me don ryngkat ma me bad nga. (Salm 23:4)

Haba ka khmat U Trai ka don halor jong ngi, ngin ym sheptieng, U Trai un pyllait ia ngi na ka jingiap. Ha kawei pat ka bynta u ong 'Ngan pyllait ia me na ka shangkhawiah jong u nongriam.' (Salm 91:3)

3. Bad ban sumar ia phi na ka nemsniew. Ka nemsniew ka ju jia na ka por sha ka por, naduh ki sngi jong u Abraham, ha ki sngi jong u Elijah, ter ter haduh kine ki sngi ki nemsniew ba har rukom ki iai jia. Hynrei na ka bynta kita kiba sheptieng ia U Trai, ka don ka jingsumar ba kyrpang jong U Blei. 

Wat ha ka khim khait, U Blei u ju plie ka lad ba kita kiba sheptieng ia U kin nym iap ha kata ka nemsniew. Amen

Ngi pule ha ka kitab 1 Ki Syiem 17:1-7 ngi iohi kumno U Blei u sumar ia u Elijah na ka nemsniew. Ha kaba ka ri baroh kawei ka don ha ka jingtyrkhong bakhraw, wat tang ka um ban dih ruh kim ioh shuh, hynrei na ka bynta u Elijah, U Blei u la pynkhreh kyrpang ia kawei ka wah ba u Elijah un ioh dih na ka, ym tang ka um ban dih hynrei wat ia ka jingbam ruh la pyndap.

Une u dang long u juh U Blei u ban sumar iaphi kiba sheptieng ia U ha kine ki sngi. To ngim nym sheptieng haba ka nemsniew ka wan ha ka ri, U Blei un ym iehnoh ia la ki briew.

4. U long ka jingiarap jong ngi. Kampher kaei ka jingeh ngi mad, ngi ia kynduh, U Blei u long u Nongiarap ba hajan eh jong ngi. U Nongrwai Salm u ong, "U Blei u long ka jaka rieh bad ka bor jong ngi, ka jingïarap bahajan eh ha ka jynjar." SALM 46:1

SALM 34:19 

Ki jingjynjar u bahok ki long shibun: hynrei, U Trai U pyllait ïa u na ki baroh.

 

Kampher katno ngi mad jingeh, hynrei to ngin tip ba U Trai u long u nongiarap ba hajan eh jong ngi, u ban pyllait ia ngi na kita ki jingjynjar baroh. Hallelujah!

5. U long ka stieh. Ka stieh ka kren ia ka jingiada kaba khlain. Haba U Trai u long ka stieh jong ngi, ka mut ngi don ka jingshngaiñ kaba khraw. Ha ka kitab Salm la ju kren barobor shaphang ba U Trai u long ka stieh jong ngi. 

SALM 91:4, "Un tap ïa me da la ki sner, bad hapoh ki thapniang jong u men ïoh rieh ïa lade: ka jingshisha jong u ka long ka stieh bad ka 'tiehbah."

6. Ka dohnud jong ngi kan lehkmen ha U. Haba ngi tip ba ka khmat jong U Trai ka don halor jong ngi (kiba sheptieng ia U Trai), ngim donkam ban sheptieng ia kano kano ka jingbna basniew, namar U Trai u long u Nongpyllait ia ka mynsiem jong ngi, un ym shah ba u bymman un leh donbor halor ka mynsiem jong ngi. Un sumar ia ngi na kano kano ka nemsniew kaba wan ha kano kano ka rukom ne ka dur. U Trai un iarap ia ngi haba ngi don ha ki jingeh jong ka jingim. Dei namar kata ka daw, ai ba ka dohnud jong ngi kan kmen.

Lehse teng teng ngi sngew kumba ym don lad shuh, hynrei to ngin tip ba U Trai un ym iehnoh ia kita kiba sheptieng ia U.

To ngin long ba la pynshaitbor da kane ka Ktien U Blei. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 22, 2021